И IэщIагъэм хуэпэжу

Зэман кIыхькIэ узыдэлэжьа, гуфIэгъуи гугъуехьи Iэджэрэ къыбдэзыIэта цIыхум уи нэ мыджылу щытхъупс къебгъэжэхыныр къысхуегъэзэгъыркъым. Езы Мухьэмэди апхуэдэ щытхъум хуэныкъуэу къыщIэкIынукъым. Алыхьым къритауэ абы иIэщ дэтхэнэри зыщIэхъуэпс фIыгъуэ псори - акъыл жанрэ IэщIагъэ нэсрэ, унагъуэ дахэ, бын дыгъэхэр, ныбжьэгъу пэжхэр. Насып псори зэуэ зы махуэм къемыуэлIами, зауэ нэужь щIэблэм ятехуа хьэлъэм щыщ езыми къылъысами, щымыIэ фIыгъуэхэр къилъыхъуэну Шалыр зэи хэлъэдакъым, атIэ къызэрыжэпхъыу гъунэ зрилъа Iуэхум пищэу, а лэжьыгъэр щIигъэхуабжьэу икIи иригъэфIакIуэу нобэм къэс къокIуэкI.

Илъэс тхущIым щIигъу япэкIэ Мухьэмэд гъунэ зрилъауэ щыта Iуэхум зэреджэр газет лэжьыгъэщ. А лэжьыгъэм упэрытын хуейщ къызэрыгуэкI мэкъумэшыщIэм и ерыщагърэ егугъуныгъэрэ пхэлъу, махуэмрэ жэщымрэ зэпыувапIэ зэраIэр къыумылъытэу. Ауэ Iэмэпсымэу щыIэм ящыщу уиIэр къызэрыгуэкI адыгэ псалъэрщ. Аращ уи вабдзэри, уи къитхъри, уи выуэчри. А Iэмэпсымэр тэмэму къыпхуэгъэсэбэпрэ - уи хьэсэр зехьа хъунщ, уи гуащIэм хуэфэщэн пщIэ уэри бгъуэтынщ.
 Сэ сфIэгъэщIэгъуэну куэдрэ сыкIэлъыплъащ Мухьэмэд и лэжьэкIэм. Дунейм, къэралым, ди щIыналъэм къыщыхъуа Iуэхухэм япэджэжын щыхуейм деж публицистым и гупсысэр гъэхуащ, и псалъэр шэрыуэщ. Зилъэфыхьи хьэлъэхулъи къыхимыгъэкIыу ар компьютерым ирилажьэм бгъэдотIысхьэри, гурыгъуазэкIэ къыхуоджэ теIэзэщIыхьыж щымыIэу газетым традзэ зи чэзу статьям. 
 Апхуэдэ зэфIэкIыр щIэзыIыгъэр Мухьэмэд и адэ-анэм - къуажэдэс лэжьакIуэ емызэшхэм - къыIуралъхьа анэдэлъхубзэ къулейрщ, а фIыгъуэшхуэр нэхъри щIэзыгъэбыдэн щIэныгъэ щIалэм университетым къызэрыщIихарщ. Бзэ шэрыуэмрэ щIэныгъэ нэсымрэ я къару зэхэлъырщ Шалым и къалэмыпэр зыгъэжаныр.
 Псалъэми гупсысэми я шхуэмылакIэр шэщIауэ зыIыгъ, и зэфIэкIым зэпымыууэ хигъахъуэу къэгъуэгурыкIуэ ди ныбжьэгъум зылI хуэфэщэн лэжьыгъэ къигъэтэрэзауэ и юбилейм ирихьэлIащи, тыншыгъуэрэ гуфIэгъуэрэ щымыщIэу дяпэкIэ екIуэкIыну сохъуэхъу. Шэч къытесхьэркъым Шал Мухьэмэд и тхыгъэ гъэщIэгъуэнхэм «Адыгэ псалъэ» газетыр иджыри илъэс куэдкIэ зэрагъэдэхэнум.