Лъэужь дахэ къигъэнащ

ЩакIуэ Мусэлийрэ сэрэ зы илъэсым дыкъалъхуат, сэ нэхърэ тIэкIу нэхъыщIэт. КъищынэмыщIауэ, дызэблагъэт, сэ си анэм и анэр ЩакIуэхэ япхъут, Къэбэрдей-Балъкъэрым и Шэджэм къалэм щыщт. Мусэлии къызыхэкIа лъэпкъым и  къежьапIэр мыбыкIэ зэрыщыщыр,  Шэджэм псы Iуфэм зэрыIукIар ищIэу апхуэдэт. Абы къыхэкIыу, Мусэлий сэрэ дызэныбжьэгъу къудейтэкъым, атIэ зэкъуэшым хуэдэу дызэхущытащ.

ИгукIэ и псэкIэ нэгъэсауэ адыгэлIт Мусэлий, цIыху губзыгъэт, хьэлэлт. Лъэпкъ Iуэхум зегъэужьыным, анэдэлъхубзэр хъумэным,  хэкур егъэфIэкIуэным телэжьащ псэуху икIи хэлъхьэныгъэ ин хуищIащ зи гугъу тщIы Iуэхухэм. Абы и IэщIагъэр зыхуигъадэ щыIэтэкъым. Псэуху, лэжьэху хуэпэжащ журналистикэм, адыгэм и цIэр фIыкIэ зэригъэIуным, и шыфэлIыфэр екIуу къызэригъэлъэгъуэным, Iуэхуу къехъулIэр зэриIэтыным иужь итащ.

«Черкес хэку» газетым щыщылэжьами, телевиденэм щыщыIами  Iуэху дахэ куэдым я къызэгъэпэщакIуэу къекIуэкIащ, тхыгъэфIхэр и Iэдакъэ къыщIэкIащ, нэтын купщIафIэхэр игъэхьэзыращ. Зэи къэхъуакъым абы адыгэхэм ятеухуа хъыбарыфIхэр къимыту.

Куэдрэ Къэбэрдейм къакIуэрт ЩакIуэр. Ди цIыху цIэрыIуэхэм яхуэзэрт, щэнхабзэм, гъуазджэм, литературэм и лэжьакIуэхэм нэтын гъэщIэгъуэнхэр яхуищIырт, ар Къэрэшей-Шэрджэс телевиденэм къыщигъэлъэгъуэжырт. КъызытекIухьа Iуэхум махуитIи-махуищи тригъэкIуэдэфынут Мусэлий, арат гугъэзагъэу, къызыхуэт щымыIэу и лэжьыгъэр къыщIехъулIэри.  

И адыгэбзэр егъэлеяуэ шэщIат икIи дахэт журналист цIэрыIуэм. Телевизореплъхэр сыт щыгъуи къыхуэарэзыуэ,  зытепсэлъыхь Iуэхухэр  яку дыхьэу, и лэжьыгъэм щIэупщIэ иIэу апхуэдэт. Хасэ Iуэху къетхьэжьами, дунейпсо мыхьэнэ зиIэ лъэпкъ Iуэху дэтхми, псом япэ иту къэсырти, зэхыхьэри игъэдахэрт, ар екIуу цIыхухэм я пащхьэ кърилъхьэжырт.

Ди къуэш шэрджэсхэм цIыху гу къабзэ, хэкупсэ, лъэпкъыпсэ  яхэтмэ, япэ ит цIыхуитхум ящыщт ЩакIуэ Мусэлий.

Ди жагъуэ зэрыхъущи, коронавирус уз зэрыцIалэр къыжьэхэуа нэужь, и узыншагъэр щIагъуэу зэтеувэжакъым ди ныбжьэгъум. Ар къытхэмытыжми, зыцIыхуу щытахэм зэи и цIэр тщыгъупщэнукъым, адыгэ лъэпкъми я гум фIыкIэ илъынущ. Сыт щхьэкIэ жыпIэмэ, Мусэлий лъэужь дахэ къигъэнащ.

ХЬЭФIЫЦIЭ Мухьэмэд,

Къэбэрдей Адыгэ Хасэм и тхьэмадэ.