Урысейм теухуа тхылъ нэхъыфI

Абы зи лэжьыгъэр фIы дыдэу къыщалъытахэм ящыщщ ди лъахэгъухэу Котляровхэ Мариерэ Викторрэ. Урысей Федерацэм и лъэпкъ тхылъ тедзапIэ нэхъыфIу къыхагъэщхьэхукIа IуэхущIапIитхум я унафэщIхэм яхэту ахэр ди къэралым и Къэрал Думэм ирагъэблэгъащ, Лъэпкъ IуэхухэмкIэ комитетым и унафэщI Семигин Г. Ю. IущIащ. Бысымымрэ хьэщIэхэмрэ тепсэлъэхьащ тхылъ къыдэгъэкIыным, ахэр щIэджыкIакIуэхэм яIэрыгъэхьэным пыщIа Iуэхухэм, ар урысейпсо щэнхабзэм и зы IыхьэфIу зэрыщытым, тхылъ тедзапIэ нэхъыфIхэм а лэжьыгъэм хуащI хэлъхьэныгъэм, Лъэпкъ тхылъхэм я фестиваль егъэкIуэкIын зэрыхуейм, нэгъуэщIхэми. 

Тхылъ къыдэзыгъэкIхэм я  Урысей Ассоциацэм (АСКИ) и президент Чеченёв Константинрэ IуэхущIапIэм и вице-президент Филимонов Олегрэ псалъэ гуапэ куэд хужаIащ Котляровхэ Мариерэ Викторрэ я тхылъ тедзапIэм.

Къыхэбгъэщмэ, «я лэжьыгъэм зэрыхуэIэзэм, апхуэдэуи Урысейм щыпсэу лъэпкъхэм я щэнхабзэ хъугъуэфIыгъуэхэр нэгъуэщIхэм къегъэцIыхуным зэрыхэлIыфIыхьым папщIэ» Урысей Федерацэм и Федеральнэ зэхуэсым, Къэрал Думэм Лъэпкъ IуэхухэмкIэ и комитетым я фIыщIэ тхылъхэр, Урысейм щыпсэу лъэпкъхэм я щэнхабзэ щIэиным и илъэсым теухуауэ ирагъэкIуэкIа тхылъ гъэлъэгъуэныгъэм и дыжьын дипломыр къратащ.

АСКИ-м иригъэкIуэкIа «2023 гъэм и тхылъ нэхъыфIхэр» зэпеуэм  кърикIуахэр фестивалым наIуэ щыхъуащ. Котляровхэ Мариерэ Викторрэ томитI хъууэ къыдагъэкIа «Кабардино-Балкария: природный курорт, всероссийская здравица, туристическая Мекка» сурэтылъэм «Урысейм теухуа тхылъ нэхъыфI» унэтIыныгъэм къыщыхуагъэфэщащ лауреатым и дипломыр. Къыхэгъэщыпхъэщ зэхьэзэхуэм и унэтIыныгъэ 12-м Урысейм и щIыналъэ 49-м дунейм къыщытехьа тхылъ 512-рэ зэрыхэтар.