ИгъащIэкIи яхъумэнущ

Къэбэрдей-Балъкъэрым щыщу дзэ Iуэху хэхам я къалэныр ягъэзащIэу щыхэкIуэда сэлэтхэм къэралымрэ дзэ къудамэ щхьэхуэхэмрэ къыхуагъэфэща дамыгъэ лъапIэхэр игъащIэкIи яхъумэну я унагъуэхэм яритыжащ КъБР-м и Iэтащхьэ КIуэкIуэ Казбек. 

ЛIыгъэ, хахуагъэ, псэемыблэжыныгъэ къызэрагъэлъэгъуам папщIэ, УФ-м и Президентым и унафэкIэ ЛIыхъужьыгъэм и орден хуагъэфэщащ (дунейм ехыжахэу): Гаджиев Мурад Идрис и ­къуэм, Дэхъу Къантемыр Харитон и къуэм, ДыщэкI Мурат МуIэед и ­къуэм, Котов Андрей Василий и къуэм, Уянаев Асад Расул и ­къуэм. 
 ХэкIудахэм я Iыхьлыхэмрэ благъэхэмрэ захуигъазэу, республикэм и Iэтащхьэм жиIащ: «Ди лIыхъужьхэм, ди лъахэгъухэм я цIыхухъу, зауэлI къалэныр ягъэзащIэу, къэралымрэ дяпэкIэ дунейм къытехьэну щIэблэмрэ къахъумащ. Си щхьэми Къэбэрдей-Балъкъэрым щыпсэу псоми къабгъэдэкIыу, сыфхуогузавэ. Зэи иремыкIуэд ди щIалэхэм, ди лIыхъужьхэм я фэеплъыр. Абыхэм я цIэхэр зэи темыкIыжыну тхыдэм и напэкIуэцIым иратхакIэщ. Къэбэрдей-Балъкъэрым къыщIэхъуэну щIэблэм дежкIэ ахэр ­игъащIэкIи щапхъэу щытынущ. ЛIыгъэ яхэлъу я къалэныр ягъэзэщIащ абыхэм. Я унагъуэхэм, къащIэна я бынхэм зэрызащIэдгъэкъуэн зы Iэмали къэдгъэнэнукъым. Фи гуауэр вдыдогуэш, ар хэщIыныгъэшхуэщ псом ди дежкIи. ХэкIуэдахэм я ныбжьэгъухэр щIытIхэм исщ, абыхэм ирашэжьа Iуэхум адэкIэ пащэу. Псоми дахуолъаIуэ текIуэныгъэр я Iэпэгъуу, узыншэу я жьэгу ­пащхьэ къекIуэлIэжыну. Гурэ псэкIэ фIыщIэ фхузощI апхуэдэ ­бын зэрывгъэсам щхьэкIэ». 
 ЗауэлIхэм я Iыхьлыхэм дамыгъэ лъапIэхэр езытыжахэм яхэтащ КъБР-м и Правительствэм и УнафэщI Мусуков Алий, ­КъБР-м и Iэтащхьэм и Администрацэм и УнафэщI Къуэдзокъуэ Мухьэмэд, КъБР-м и федеральнэ инспектор нэхъыщхьэ Мэкъуауэ Тимур, УФ-м и Лъэпкъ гвардием и управленэу КъБР-м щыIэм и унафэщI Васильев Сергей, УФ-м ШынагъуэншагъэмкIэ и федеральнэ IуэхущIапIэм и управленэу КъБР-м щыIэм и унафэщI Громушкин Пётр, КъБР-м къэрал кIуэцI IуэхухэмкIэ министру щыIэ Павлов Василий, КъБР-м и дзэ комиссар Пахомов Дмитрий, КъБР-м Экономикэ, жылагъуэ шынагъуэншагъэмкIэ и советым и секретарь Тату Казбек, КъБР-м и прокурор Хабаров Николай, Налшык къалэ администрацэм и унафэщI Ахъуэхъу Таймураз сымэ.