Зыужьыныгъэм и шэсыпIэхэм хохьэ

УФ-м и Федеральнэ налог къулыкъущIапIэм дызэрыт илъэ­сым къриубыдэу щызэфIагъэкIа Iуэхугъуэхэм иджыблагъэ тепсэлъыхьащ республикэм и Iэтащхьэ КIуэкIуэ Казбекрэ IэнатIэм КъБР-м щиIэ управленэм и унафэщI ГуэбэщIыкI Аслъэнрэ. 

2023 гъэм и мазитхум къриу­быдэу Къэбэрдей-Балъкъэр Рес­публикэм и бюджетым къихьащ IэнатIэ зэмылIэужьыгъуэхэм я бюджетым къыхэкI налогыу сом меларди 7,6-рэ. Нэгъабэ и иджы хуэдэ лъэхъэнэм еплъытмэ, ар проценти 8,5-кIэ нэхъыбэ мэхъу. Ахъшэр нэхъыбэу къыхэкIащ зэгухьэныгъэ зэмылIэужьыгъуэхэм зрагъэгъуэт мылъкум, IэщIагъэм епхауэ къалэжьхэм, хьэрычэт Iуэху зыублагъащIэхэм я хэ­хъуэхэм. Мылъкум и куэдагъым зэрыхэхъуам и щхьэусыгъуэ нэхъыщхьэхэм ящыщщ зыуэ щыт налог къэбжыкIэм псори зэ­рытехьар. 
Къэралри республикэри зэрыт щытыкIэ ткIийм емылъытауэ, щIыналъэ бюджетым къихъуэ мылъкур нэхъыбэ зэрыхъур къы­щыхагъэщащ зэIущIэм. КъБР-м и Iэтащхьэм зэригъэбелджыламкIэ, ар мэхъу республикэм и IэнатIэ нэхъыщхьэхэу егъэджэныгъэм, узыншагъэр хъумэным, щэнхабзэм, спортым, цIыхухэр социальнэу хъумэным епхахэм нэхъыфIу адэкIи зегъэужьынымкIэ шэсыпIэфI.