Сабийхэр ягъэгуфIэ

             КъБР-м щыIэ МВД-м Наркотикхэр зэрызэрагъэкIуэкIым кIэлъыплъынымкIэ и управленэм и лэжьакIуэхэмрэ Налшык къалэм и УМВД-м балигъ мыхъуахэм я IуэхухэмкIэ и инспекторхэмрэ хэтащ «Къызэдэжэ гуапэ» социальнэ акцэм. 

         Налшык къалэ округым лэжьыгъэмкIэ, цIыхухэм социальнэ дэIэпыкъуныгъэ етынымкIэ и центрымрэ «Налшык» спорт школымрэ, КъБР-м щыIэ МВД-м и УНК-м,  Налшык къалэм щыIэ УМВД-м, КъБР-м щыIэ УФСИН-м и Уголовнэ-гъэзэщIакIуэ инспекцэм, УФ-м и Следственнэ комитетым и Следственнэ комитетым СледствиемкIэ и управленэу  КъБР-м щыIэм, республикэ МФЦ-м даIыгъа    Iуэхур щекIуэкIащ  «Спартак» республикэ стадионым. 

Къызэдэжэныр хуэунэтIат зи узыншагъэм сэкъат иIэ сабийхэм  защIэгъэкъуэным.  

Къызэхуэсахэм фIэхъус псалъэкIэ зыхуагъэзащ Налшык къалэ округым лэжьыгъэмкIэ, цIыхухэм социальнэ дэIэпыкъуныгъэ етынымкIэ и центрым и къудамэм и унафэщI Бэдракъ Аминэ,  «Налшык» спорт школым и унафэщI  Сурженкэ Руслан, КъБР-м щыIэ МВД-м Наркотикхэр зэрызэрагъэкIуэкIым кIэлъыплъынымкIэ и управленэм  и лэжьакIуэ   Давыдовэ Иринэ,  УФСИН-м и Уголовнэ-гъэзэщIакIуэ инспекцэм и  лIыкIуэ КIуэкIуэ Алим,  УФ-м и СК-м СледствиемкIэ и  управленэу   КъБР-м щыIэм къикIа Ульяновэ Иринэ, КъБР-м щыIэ МФЦ-м и унафэщI  АфIэунэ Аслъэн сымэ.

Къызэдэжэным  хуэгъэпса Iуэхум  хэтхэм ящыгът #дыгъэм и сабийхэр, #уэшхым и сабийхэр жиIэу    зытетха футболкэхэр.

Махуэшхуэм щIидзэри,  аниматорхэм зэпеуэхэмрэ джэгухэмрэ хэтхэр ягъэгуфIащ, адэкIэ метри 100 къыщызэдэжащ, я узыншагъэ елъытауэ зэхэдз ямыщIу.   ЗэщIыгъуу щIэпхъуахэщ ныбжьыщIэхэри, абыхэм я адэ-анэхэри, КъБР-м щыIэ МВД-м и УНК-м и лэжьакIуэхэмрэ   ПДН-м и инспекторхэмрэ,   хьэщIэхэри.  

Къызэдэжэхэм даIыгъащ республикэм щекIуэкI   «Къэбэрдей-Балъкъэрыр - наркотикыншэу»  акцэр икIи  псори гъащIэ узыншэм къыхураджащ.  

         Сабийхэр насыпыфIэт,  ахэр зэщIиIэтат сэбэп зыпылъ Iуэхум.    Абы хэта псоми иратащ фэеплъ тхылъхэр,  медалхэмрэ топ дахэхэмрэ. 

                                                                        УАРДЭ  Жантинэ.