МыкIуэдыжын лъэужь

КъыдэкIуэтей щIэблэр театр гъуазджэм дегъэхьэхыным теухуауэ ди къэралым пэхуэщIэ  купщIафIэхэр къыхилъхьащ. Куэд зэрыщыгъуазэщи, иужьрей зэманым цIыхухэм IэщIыб ящIу хуежьащ тхылъыр, театрыр, н. къ. Апхуэдэ Iуэху бгъэдыхьэкIэм псэкупсэ къулейсызыгъэ къахуехь лъэпкъым и къэкIуэнур зей щIалэгъуалэм.

ПэхуэщIэхэм япкъ иту къэралым и щIыналъэ псоми къыщагъэщIэрэщIэжащ ЩэнхабзэмкIэ унэхэр, библиотекэхэр, театр студиехэр. ЗэманкIэ дызэIэбэкIыжмэ, Къэбэрдей-Балъкъэрым щынэхъыфIхэм ящыщу Бахъсэн щIыналъэм иIащ цIыхубэ театр. Нэхъыжьхэм пхаша лъагъуэм тету нобэ мэлажьэ «Кругозор» щIалэгъуалэ театр студиер.

Бахъсэнёнкэ къуажэм дэт ЩэнхабзэмкIэ унэм щагъэлъэгъуащ ЩоджэнцIыкIу Алий и «Мадинэ» поэмэм къытращIыкIа спектаклыр.

Артист ныбжьыщIэхэр къыхуагъэфэща ролхэм хуэнэIуасэу, щIэблэ куэд зыщIапIыкIа поэмэр гурэ псэкIэ зэрызыхащIэр плъагъуу джэгуащ, дэтхэнэ зы теплъэгъуэми удихьэхрэ ди лъэпкъ хабзэхэмрэ тхыдэмрэ къызэранэкIа гъуэгуанэ жыжьэм уриплъэжу.  Сыт хуэдэ зэманми хэзагъэ поэмэ купщIафIэм щыджэгухэм гурыгъу-гурыщIэкIэ япэджэжырт абы еплъхэри.

 Лъэхъэнэ къэс езым и артистхэри абыхэм я джэгукIэхэри щIэрыщIэу къегъэщI, сыт хуэдизрэ уемыплъами, щIэщыгъуагъ хилъхьэу.  НыбжьыщIэхэм яIурылъ, ижь лъандэрэ Бахъсэн щIыналъэм къыдекIуэкI адыгэбзэ къабзэм хьэщыкъ уещI.  ФIыщIэ лей хуэфащэу спектаклыр зыгъэувари, абы щыджэгухэр зыхуеину псомкIи къызэзыгъэпэщари  ЩэнхабзэмкIэ унэм и методист, республикэм фIыуэ къыщацIыху усакIуэ  Зэгъэщтокъуэ Людэщ. Абы дэIэпыкъуахэщ адыгэбзэмрэ литературэмкIэ езыгъаджэхэу Даур Заремэрэ Абрэдж ФатIимэрэ, ЩэнхабзэмкIэ унэм и художественнэ унафэщI Щхьэгъум Борис сымэ.

«Мадинэ» спектаклым щыджэгуахэщ Ерыджокъуэ Альберт (Заур), Жанджэрий Алинэ (Мадинэ),  Щхьэгъум Марат (Умар), Ерыджокъуэ Аслъэн (Алий), Тажджэ Залинэ (Дадусэ), Багъ Тарлан (Къасым), Бакъей Мансур (Пылыжь Джэрий), ХьэкIагуэ Дисанэ (Хьэлимэт), Абрэдж Альбинэ (КIуэкIуринэ), Абрэдж Миланэ (Лалинэ), Уэзрокъуэ Лаурэ (Жэхурэт),  Ерыджокъуэ Дамир (молэ), ХьэкIагуэ Дамир (япэ щIалэ цIыкIу),  Цагъэ Батрэз (етIуанэ щIалэ цIыкIу),  Щхьэгъум Борис (гъуо), уэрэдыр зыгъэзэщIари аращ. Звукооператорыр Нартокъуэ Мухьэмэдщ. Спектаклым еплъыну кърихьэлIахэщ щIыналъэм  и КДЦ-м и унафэщI Тембот Хьэчим, методист Шэмзокъуэ Эльвирэ сымэ. Ар зыгъэувахэм фIыщIэ  псалъэкIэ зыхуагъэзащ спектаклыр щагъэувым гулъытэ къахуэзыщIахэу Дэдэхъу Джылахъстэн, БатитI Мухьэмэд, Хьэтэжьыкъуэ Ларисэ, Гъут Феня сымэ. Гъэлъэгъуэныгъэр ягъэдэхащ Куба къуажэм дэт ЩэнхабзэмкIэ унэм и къэфакIуэ гупым.

 Псом ящхьэр цIыхур гъащIэм хуэзыущий театрым и къуэпсыр мыкIуэдыным, щIэблэр абы дегъэхьэхыжыным, лъэпкъ щэнхабзэм зегъэужьыным телажьэ цIыху гуащIафIэхэр зэрыдиIэрщ. Спектаклыр телевиденэмкIэ къагъэлъэгъуэжынущ, а махуэм иримыхьэлIахэр еплъыжыфын хуэдэу.

Шэрэдж Дисэ.