Спорт

Теннис

Дыжьынрэ домбеякърэ Осетие Ипщэм къраш

Къэбэрдей-Балъкъэрым и теннисистхэм медалитI къыщахьащ Цхвинвал щекIуэкIа дунейпсо зэхьэзэхуэм.

Осетие Ипщэ Республикэм щыIэ сабий-ныбжьыщIэ базэм къыщызэрагъэпэща IХ дунейпсо теннис зэхьэзэхуэр ирагъэхьэлIат Осетие Ипщэм щхьэхуиту зыкъыщилъытэжа махуэр щагъэлъапIэм. Зэпеуэм хэтащ Урысейм, Абхъазым, Осетие Ипщэм щыщ спортсмен 60-м нэблагъэ.

Финалым Ацкъан Артур къыщыпэщIэува, Ставрополь щыщ Украинский Иван къыхигъэщIа нэужь, дыжьыныр къылъысащ. Домбеякъыр зыIэригъэхьащ Сибэч Къантемыр.

А зэхьэзэхуэм КъБР-м ТеннисымкIэ и федерацэм и унафэщI Климов Андрей иригъэкIуэкI гъэсэныгъэ лэжьыгъэхэм, апхуэдэуи лъэпкъхэм я зэхуаку дэлъ зэныбжьэгъугъэр гъэбыдэным и къару емыблэжу зэрытелажьэм папщIэ щIыхь тхылъ къыхуагъэфэщащ.

Дзюдо

ДыжьынитI къахьащ

Санкт-Петербург и «Юбилейный» спорткомплексым «Рахлин Анатолэ и кубокыр» къэхьыным хуэгъэзауэ дзюдомкIэ XI зэхьэзэхуэ щекIуэкIащ. Абы хэтащ Урысейм и щIыналъэхэм, апхуэдэуи гъунэгъу къэралхэм къикIа, илъэс 15-17-хэм итын итын щIалэрэ хъыджэбзхэу 700-м нэблагъэ. А зэхьэзэхуэм КъБР-м и спортсменхэм медалитI къыщахьащ.

Зи хьэлъагъыр килограмм 55-рэ хъухэм я деж  щыбанэу, Куж Тамерлан текIуэныгъэу 5 къихьауэ, финалым къыщыпэщIэува Сардарян Станислав къыхигъащIэри, дыжьыныр къылъысащ.

А зэхьэзэхуэм апхуэдэуи дыжьыныр къыщихьащ ТекIужь Астемыр (кг 81-рэ).

Нард

Газетым и махуэм хуэгъэзауэ

Къэхъун къуажэм иджыблагъэ щекIуэкIащ, нардымкIэ республикэпсо зэхьэзэхуэ. А зэпеуэр къызэригъэпэщащ икIи иригъэкIуэкIащ  КъБР-м СпортымкIэ и министерствэм и нэIэ щIэт, Къэбэрдей-Балъкъэрым нардымкIэ и жылагъуэ федерацэм. Классическэ нардымкIэ зэпеуэр къызэIуахащ «Кабардино-Балкарская правда» газетым къыдэкIын зэрыщIидзэрэ илъэси 101-рэ щрикъу махуэм ирихьэлIэу.

 Зэхьэзэхуэм япэ увыпIэр щиубыдащ Црым Аскэр, етIуанэ хъуащ Жу Марат, ещанэщ Шыгъушх Ратмир.

ЦIыхубзхэм щыщу япэ увыпIэр къихьащ Зыхъэ Iэсият, етIуанэр Балъкъэр Марианнэ, ещанэр Унэж Хьэлимэт.

ТекIуахэмрэ къыхэжаныкIахэмрэ КъБР-м  СпортымкIэ и министерствэм къыбгъэдэкI дипломхэмрэ медалхэмкIэ ягъэпэжащ.

Самбэ

Къудей Беслъэн и ехъулIэныгъэ

Къэбэрдей-Балъкъэрым щыщ спортсмен ныбжьыщIэ Къудей Беслъэн самбэмкIэ урысейпсо зэхьэзэхуэм етIуанэ увыпIэр къыщихьащ. Апхуэдэ хъыбар къитащ республикэм самбэмкIэ и гуп къыхэхам и тренер нэхъыщхьэ Уэщхъун СулътIан.

Новгород Ищхъэрэ областым щыщ Кстовэ къалэм щекIуэкIа зэхьэзэхуэм хэтащ Урысейм и щIыналъэ куэдым икIа, илъэс 12-14-хэм ит спортсмен щIалэщIэхэр.

Ди щIалэр финалым нэсауэ, Кемеровэ областым щыщ Штурман Арсений къытекIуэри, дыжьыныр къылъысащ.

НАФIЭДЗ Мухьэмэд.