«Кавказым щащIащ» дамыгъэр дызыпэплъащ

Тулэ щащIа пряникыр, орен­бург цы IэлъэщIыр, адыгэ кхъуейр, къ­­рым шагъырыр – урысей хэгъэгу куэдым дуней псом цIэ­рыIуэ щыхъуа хьэп­шып­хэмрэ ерыскъыхэмрэ къы­зэ­рыщыщIагъэкIыр зым и дежкIи щэхукъым. Иджы лъэпкъ проектхэмрэ къэрал программэхэмрэ я фIыгъэкIэ апхуэдэ дамыгъэхэр (бренд­хэр) утыку нэхъ инхэм ихьэнущ. 

«Хьэрычэт Iуэху цIыкIумрэ ику итымрэ», «Дунейпсо кооперацэмрэ экспортымрэ» проектхэм я фIыгъэкIэ хэгъэгухэр зэгухьэурэ федеральнэ щIыналъэхэм къыщыщIагъэкI, щащI, щагъэкIхэр бренд щхьэхуэу къэрал кIуэцI, къэрал щIыб сатум хыхьэнущ. Мы мазэм ирагъэжьэнущ Кавказ Ищхъэрэм и ерыскъыхэмрэ хьэпшыпэмрэ я фIагъым и дамыгъэ телъыджэ - «Кавказым щащIащ» урысей маркэр. СыткIэ сэбэп хъуну ар ди щIыналъэм щылажьэ хьэры­чэтыщIэхэм я дежкIэ? 
«Кавказым щащIащ» урысей маркэм и къызэгъэпэщакIуэ Гуц Дианэ зэрыжиIэмкIэ, «бренд»-р ди гъащIэм апхуэдизкIэ куэду къыхыхьащи, ар зымыщIэ, езым и бренд иIэжыну щIэмыхъуэпс зыри щыIэкъым. 
Иджыпсту хьэпшып гупыр е ерыскъы гупыр зы сату маркэкIэ зэрапх. Апхуэдэу нэхъ тыншщ сату утыкум уихьэну, укъацIыхунымкIи ар сэбэпщ. Урысейм иIэщ «Удмуртием щащIащ», «Юграм щащIащ», «Ал­тайм щащIащ» маркэхэр. Апхуэдэ зы маркэм щIэт хьэп­шыпыр е ерыскъыр зэры­фIым, зэрыкъабзэм щыхьэт тохъуэ цIэ хэха зэриIэр.
Иджы Кавказым щагъэхьэ­зы­ра хьэпшыпыр, ерыскъы­хэкIыр «Кавказым щащIащ» да­мыгъэр тету къыдэкIмэ, ­цIы­хухэм къагурыIуэнущ ар ди лъа­хэм къызэрыщагъэкIыр, къы­зэрыщыщIагъэкIыр икIи фIагъым и дамыгъэ нэсу къа­лъы­тэнурэ къащэхуну нэхъ дзыхь ящIынущ. 
А хьэпшыпхэм е ерыскъыхэм я сертификатыр «Роскачество»-м къаритыну аращ. Мыбы ди хэгъэгур нэхъ цIэрыIуэ зэрищIынум и мызакъуэу, фIагъым и шэ­­сыпIэ нэс хъунущ. Къищы­нэ­мыщIауэ, ди лъахэм щащI­хэмрэ къыщыщIагъэкIхэмрэ хэд­гъэхъуэфынущ зэтщэнухэр нэхъыбэ къэхъумэ. Мы дамыгъэр къэзыщтэ хьэрычэтыщIэр реестр щхьэхуэм хагъэхьэнурэ хуэгъэкIуатэ гуэрхэр яIэу лэжьэнущ. 
«Зыужьыныгъэм хуэкIуэ зы лъагъуэщ фIамыгъым и дамыгъэу къыхалъхьар. Абы щIыпIэ хьэрычэт Iуэхур ипэкIэ игъэ­кIуэтэнущ. Кавказыр игъащIэ лъандэрэ и ерыскъыхэмкIэ и хьэщIэ егъэблэгъэкIэмрэ гъэ­хьэ­щIэкIэмкIэ цIэрыIуэщ. Иджып­стуи фIагъ лъагэ зиIэ шхыныгъуэ, псы зэмылIэужьыгъухэр къыщыщIагъэкI. А псори экологие и лъэныкъуэкIэ зыхуэдэ щымыIэу къабзэщ. Ди гуапэу Урысей псом я пащхьэ итлъхьэнущ фIагъ лъагэ зиIэ ерыскъыхэкIхэр, апхуэдэ щIы­кIэ­кIэ, ди хьэрычэтыщIэхэм дадэ­Iэпыкъунущ», - жеIэ «Кавказ.РФ»-м и генеральнэ уна­фэщI Юмшанов Андрей.
Кавказым къыщыщIагъэкI­хэр псори ерыскъы хьэ­лэлщ икIи «щхъуантIэщ» - экологие и лъэныкъуэкIэ къабзэщ. Кавказ Ищхъэрэ федеральнэ щIыналъэм апхуэдэ ерыскъыхэкI къы­щIэзыгъэкI, мы маркэр къэзыщта IуэхущIапIитху итщ, щыр - Ставрополь, тIур Къэбэрдей-Балъкъэрым щолажьэ. Иджып­сту IуэхущIапIи 111-р а Iуэхум иужь итщ. Абыхэм я нэхъыбэр ерыскъы къыщIэзыгъэкIхэращ, ауэ узыншагъэр хъумэным, IэнатIэхэм епхахэри яхэтщ. 
«Кавказым щащIащ» дамыгъэр зытетыр нэхъыфIу ящэ­ным­­кIэ «Роскачество»-р дэIэ­пы­­къуэгъу хъунущ. Абы нэ­мыщIу, а дамыгъэр зыIэрагъэ­хьэну хуейуэ зи дэфтэр зытахэм я хьэрычэт Iуэхур нэхъыфI, тынш хъунущ, къэпщытэныгъэ лей хэмыту ягъэлэжьэнущ, ап­хуэдэуи Урысей Федерацэм и Правительствэм и Саугъэтыр зыIэрагъэхьэнымкIэ зэпеуэм хэтыну Iэмал яIэнущ, жыпIэнурамэ, IуэхущIапIэм лэжьэкIэм зе­зыгъэужьыну щыIэ псори къыхуэгъэсэбэпынущ.
КъызэгъэпэщакIуэхэр наб­дзэгубдзаплъэу зи ужь итхэм ящыщщ «Кавказым щащIащ» урысей маркэм щIэупщIэ иIэу, дэбгъуэн хэмыту, хабзэкIэ щIэгъэбыдауэ зэтрагъэпсы­хьы­ныр. 
ХьэрычэтыщIэм апхуэдэ дамыгъэр къигъэсэбэпу щытмэ, дзыхь хуэпщI зэрыхъунур къегъэлъагъуэ, апхуэдэуи гугъуехь хэмыту Урысейм и къалэш­хуэхэм дэт сату щIыпIэ нэхъ инхэм я IэрыкIыр щащэну Iэмал къарет. Ар хьэрычэтыщIэ Iуэху нэхъ иныр ику итымрэ цIыкIумрэ зэрыдэIэпыкъу зы хэкIыпIэу къигупсысащ къэралым. 
Гуц Дианэ зэрыжиIэмкIэ, мып­хуэдэ гупсысэм ар хуэ­кIуащ 2019 гъэм Къэрэшей-Шэрджэс Республикэм ще­кIуэ­кIа хьэрычэт-форумым иужь­кIэ. «Абы щыгъуэ къызгуры­Iуащ хьэрычэтыщIэ Iуэху цIы­­кIухэмрэ езыхэм я уней хьэрычэт Iуэху зиIэхэмрэ сайт къудей зэрамыгъэлъажьэр, социальнэ сетхэм зэримытыр, нэгъуэщIу жыпIэмэ, къыщIагъэкIыр зыхуэдэр зыми зэримыщIэ», - жеIэ Гуц.
Брендым и къызэгъэпэща­кIуэхэм къалэн зыщащIыж мар­кетингым епха лэжьыгъэ­хэр, хьэпшыпым трагъэуэну дамыгъэхэри зралъхьэнухэри гъэ­­хьэзырыныр, къищынэ­мы­щIауэ, къыщIагъэкIар гъэлъэ­гъуэныгъэхэмрэ зэхыхьэ щхьэ­­пэхэмрэ утыку къыщрахьэну. Абы щхьэкIэ зэгуры­Iуэныгъэ епщIылIэн хуейуэ аращ. 
Псоми зэращIэщи, Кавказ Ищхъэрэм ис лъэпкъхэм дэтхэнэми IэщIагъэ зырыз яIэщ, ижь-ижьыж лъандэрэ лъэп­къым къыдекIуэкIыу. Мис ап­хуэдэ IэпщIэлъапщIэхэм я IэдакъэщIэкIхэри хабзэм къызэригъэувым тету яхуэщэнущ, зыри пэрыуэгъу къахуэмыхъуу. Щхьэж и лэжьыгъэр и гъунэгъу­хэм, цIыхугъэхэмрэ фIэкIа ­хуе­мыщэмэ, тыкуэн иIэу абы щIимылъхьэфмэ, хьэры­чэ­ты­щIэу къэралым щатхауэ щы­мыт­мэ, фейдэ къыпэкIуэркъым Iэп­щIэлъэпщIагъэм. НэгъуэщIу жы­пIэмэ, лъэпкъ щэнхабзэр хъума хъунымкIэ, ­хъугъуэфIыгъуэхэр къэгъэ­щIэ­рэ­щIэ­жы­нымкIи сэбэпщ мы проектыр. 
Гуц Дианэ зэрыжиIамкIэ, «Кавказым щащIащ» брендым и дамыгъэм и теплъэр къыхахын папщIэ зэпеуэ къызэрагъэпэщри, нэхъыфIу къалъытэ лэжьыгъэхэм ящыщ зым къы­теувыIащ. Дамыгъэр пхъэм къы­хэпIущIыкIыфу, гъущIым тебдзэфу, щэкIым щыхэбды­кIыфу щытын, а псом къищы­нэмыщIауэ, Кавказ Ищхъэрэм и шыфэлIыфэр къигъэлъэ­гъуэн хуейт, дэтхэнэ щIыналъэми и щыIэкIэ-псэукIэм хуэкIуэу. Ахэр псори къызыхуэтыншэу къызэрагъэпэщри, IуэхумкIэ сэбэп хъуну къулыкъущIапIэхэм зыпащIащ, зэдэлэжьэну зэгурыIуащ. Псалъэм къыдэкIуэу жыпIэмэ, брендыр иджы щы­щIэдзауэ долажьэ Урысей Федерацэм и Сату-промышленнэ палатэм, «Мой бизенс» центрым, экономикэ зэхыхьэ инхэм хэтщ, къэралри къыдоIэпыкъу, «Международная кооперация и экспорт» лъэпкъ проектыр къегъэсэбэп, «Экспортер года», «Со­циальный предпринима­тель года» урысейпсо зэхьэзэ­хуэхэм зи зэфIэкI щызыгъэлъагъуэ хьэрычэтыщIэхэм яхоплъэ, йопсалъэ. 
«Мы Iуэхум икъукIэ фейдэш­хуэ къыпэкIуэу зебгъэужьыфынущ. Псалъэм къыдэкIуэу жы­пIэ­мэ, етIанэгъэ гъэмахуэм ди мурадщ Кавказ Ищхъэрэм ­щащIхэмрэ къыщыщIагъэкI­хэм­рэ щагъэлъагъуэ шоурум Дубай къыщызэдгъэпэщыну. Аб­деж дуней псом щынэхъ лъэ­рызехьэ хьэрычэтыщIэхэм нэхъ дыкъыщацIыхунущ, зэдэлэ­жьэн­ри щызэтебублэфынущ, - къыпещэ Дианэ. – Дэ дыхуейщ хьэрычэт Iуэхум гурэ псэкIэ пэрыт, фIагъ зиIэ продукцэ къыщIэзыгъэкIхэр зэхуэтшэсыну, Кавказым и «напэу» къа­лъы­тэу, утемукIытыхьу икIи уте­мыгузэвыхьу урысейпсо, дунейпсо утыку ипшэ хъунухэм. Дэ апхуэдэхэр адэкIэ тхуэгъэ­кIуэтэнущ». 
«Роскачество»-мрэ «Кавказ. РФ»-мрэ зэдаубла Iуэхум къыпэкIуэнур аращи, мазэ къа­кIуэ щыщIэдзауэ хьэзыр хъунущи, ди къэралми нэгъуэщI щIы­пIэхэми я тыкуэнхэм дяпэкIэ фыщрихьэлIэнущ «Кав­ка­зым щащIащ» дамыгъэр зытет ерыскъы IэфIхэмрэ хьэпшып дахэхэмрэ. 
НэщIэпыджэ Замирэ.