ЩIэблэр узыншэу прсэуным хуаущий

Бахъсэн районым щекIуэкIащ наркотикым пэщIэтыным теухуа зэхуэс.  Кыщпэк (Тыжьей) къуажэм ЩэнхабзэмкIэ и унэм  щызэхэтащ «Блын, губгъуэ къабзэхэр»  республикэ  акцэ. Ар хуэунэтIащ  щIалэгъуалэр наркотикым пэIэщIэным, къытщIэхъуэ щIэблэр узыншэу псэуным.     

  ЩIалэгъуалэм яхуэзащ Бахъсэн район администрацэм и Iэтащхьэм  хабзэхъумэ  IэнатIэхэм ядэлэжьэнымрэ коррупцэм пэщIэтынымкIэ     и къуэдзэ  Тохъутэмыщ Мухьэмэд,  КъБР-м Узыншагъэр хъумэнымкIэ и министерствэм   Медицинэ профилактикэмкIэ  и республикэ центрым и дохутыр  психиатр-нарколог Лобжанидзе Анзор,  дохутыр  психиатр-нарколог ПащIэ Артур.  

ЕгъэджэныгъэмкIэ управленэм и лэжьакIуэ Албот Людмилэ  къыхигъэщащ  къытщIэхъуэ щIэблэм дежкIэ  гугъуехьу къилъытэ а Iуэхур икIи къызэхуэсахэр къыхуриджащ зэIухауэ абы тепсэлъыхьыну. 

Лобжанидзе Анзор жиIащ  синтетикэ наркотикхэм я зэраныгъэр, ар зэзыхьэлIэхэм я узыншагъэм зэраныгъэу  иритыр,    апхуэдэуи наркотикхэр зыгъэхьэзырхэр, зыхъумэхэр икIи изыгъэкIхэр  уголовнэ жэуапым зэрырашалIэр.  Илъэс куэд хъуауэ лажьэ дохутырым и щапхъэхэр къихьурэ   ныбжьыщIэхэм жриIащ   наркотик зэхьэлIэным кърикIуэр. «Мы зэхыхьэм и мурад нэхъыщхьэр  наркотикым зэраныгъэу пылъыр щIалэгъуалэм я деж нэхьэсынырщ, ныбжьыщIэхэр  ар зрамыхьэлIэным   къыхуеджэнырщ», -  къыхигъэщащ  дохутырым.     

  Тохъутэмыщ  Мухьэмэд  ныбжьыщIэхэр къыхуриджащ щIэпхъаджащIэхэм  я жыIэм емыдэIуэну, мыхъумыщIагъэхэм зыхрамыгъэшэну, сыту жыпIэмэ, абы укъыхэкIыжу псэукIэ тэмэмым утехьэжыныр  пхузэфIэкIыжынукъыми.

Акцэм и кIэухыу  абы кърихьэлIа псоми  иратащ акъылыр зыгъэутхъуэ пкъыгъуэхэм, фадэмрэ тутынымрэ  я зэраныгъэ къызытещ, абыхэм япэIэщIэным къыхуезыджэ  тхылъымпIэхэр.  

Чылар Аринэ,

Бахъсэн район администрацэм

и пресс-IуэхущIапIэм и унафэщI.