Къэбэрдей-Балъкъэрым иужьрей лъэхъэнэм къыщызэIуахауэ щолажьэ «Зыужьыныгъэм и къежьапIэ» («Точка роста») еджапIэ центр куэд. «Егъэджэныгъэ» лъэпкъ проектым и гуэдзэну щыт «Иджырей школ» щIыналъэ Iыхьэм къыщыгъэлъэгъуахэр и лъабжьэу яухуэ ахэр. Къыщызэрагъэпэщри къалэ мыинхэмрэ къуажэхэмрэ щылажьэ курыт школхэращ.
Егъэджэныгъэмрэ щIэныгъэмрэ я фIагъыр къэзыIэт а IэмалыфIым нэхъри зыщеубгъу ди щIыналъэм. Нобэ ди республикэм щолажьэ «Зыужьыныгъэм и къежьапIэ» центру 150-м щIигъу. Абыхэм я щIэныгъэм щахагъахъуэ къуажэдэс ныбжьыщIэ минхэм. ЕкIуэлIэну гукъыдэж зиIэхэми къахэхъуэ зэпытщ, сыту жыпIэмэ а центрхэр сэбэп мэхъу щIэблэм ябгъэдэлъ зэфIэкIхэр нэхъ наIуэ къэщIынымкIэ, егъэджэныгъэр творческэу егъэкIуэкIынымкIэ. Естественнэ-щIэныгъэ, техникэ, бжыгъэр зи лъабжьэ, гуманитар программэхэмкIэ щIэныгъэм щыхагъахъуэ IэнатIэ хъуащ ахэр. «Зыужьыныгъэм и къежьапIэхэм» къаруущIэ къыхалъхьэ республикэм и егъэджэныгъэ IэнатIэм къызэщIиубыдэ IуэхущIапIэхэм, ди сабийхэм я зэхэщIыкIым, гупсысэм, къэухьым нэхъри зрагъэужьу.
Апхуэдэ IэнатIэхэр еджапIэхэм къызэрыщызэIуахым и фIыгъэкIэ, еджапIэхэм я мылъку-техникэ лъабжьэр зэрырагъэфIакIуэм къыхэкIыу, куэдкIэ нэхъыфI хъуащ къуажэхэм щылажьэ школхэм ныбжьыщIэхэм «Технологие», «Информатикэ», «ОБЖ», «Физикэ», «Химие», «Биологие» унэтIыныгъэхэмкIэ ягъуэт щIэныгъэхэр. А центрхэм школакIуэхэр ехъулIэныгъэ яIэу хуагъэхьэзыр олимпиадэхэм, нэгъуэщI зэпеуэ зэмылIэужьыгъуэхэм. КъинэмыщIауэ, мыхьэнэшхуэ иIэщ апхуэдэ школхэр еджапIэ нэхъыщхьэхэм япыщIауэ, ресурс центрхэм, нэгъуэщI егъэджэныгъэ IэнатIэхэм ядэлажьэу зэрыхъуами.
«Зыужьыныгъэм и къежьапIэ» центрхэм щолажьэ «Инфознайкэ», «Робототехникэ», «3D-моделированиемрэ программированиемрэ», «Графикэ дизайн», «КъегъэлакIуэ», «Промышленнэ дизайн. Проект лэжьыгъэхэр», «Геоинформацэ технологиехэр», «Балъкъэр щэнхабзэм и музей», «ИнджылызыбзэкIэ екIуэкI театр», «ИнджылызыбзэкIэ допсалъэ», «Уэрэд жыдоIэ», «Творческэ проектхэр», «Информатикэм лъэбакъуэщIэ худоч», «ЗэгъащIэ! ЗылъэгъэкI! ГъэзащIэ!», «Спортым ухуэзышэ джэгукIэхэр», «Къэгупсыс, щIы, къэхутэ!», «Химие калейдоскоп», «Теплъэгъуэ телъыджэхэр», «Ладья хужь», «Эколог-къэхутакIуэ» гупжьейхэр, мастерской зэмылIэужьыгъуэхэр. ИлъэситI лъандэрэ «Зыужьыныгъэм и къежьапIэ» центрхэм еджэныгъэр щрагъэкIуэкI сабийхэм я гупсысэм зезыгъэужь программэ 500-м нэсыр я лъабжьэу. Абы щезыгъаджэхэм къагупсысауэ мэлажьэ «КъегъэлакIуэ ныбжьыщIэ», «Журналист ныбжьыщIэ», «Художественнэ проектированием и лъабжьэр», «Шахматхэр» программэхэр, нэгъуэщIхэри.
Центрхэм я унафэщIхэмрэ абыхэм я IэщIагъэлIхэмрэ я зэфIэкIым, щIэныгъэм щыхагъэхъуащ УФ-м ЕгъэджэныгъэмкIэ и министерствэм къепхауэ лажьэ Егъэджэныгъэм и мардэщIэхэм зегъэужьынымкIэ академием. Абыхэм щIэныгъэщIэ щызэзыгъэгъуэта IэщIагъэлIхэм иджырей техникэмрэ технологие пэрытхэмрэ хуиту къагъэсэбэпыф, программированием, 3D-моделированием, дизайн-анализым хуэIэижьу щытщ. «Зыужьыныгъэм и къежьапIэ» IэнатIэхэм щекIуэкI лэжьыгъэ псори зэзыгъэуIур КъБР-м Егъэджэныгъэмрэ щIэныгъэмкIэ и министерствэм ЕгъэджакIуэхэм я щIэныгъэм щыхагъахъуэ и центрыращ.
Мы махуэхэм къахохъуэ ди республикэм щылажьэ апхуэдэ IэнатIэхэм. Къапщтэмэ, Май щIыналъэм фокIадэм и 1-м къыщыщIэдзауэ щылэжьэнущ «Зыужьыныгъэм и къежьапIэ» центру 4. Ахэр къыщызэIуахынущ Май къалэм дэт курыт школхэу езанэм, етIуанэм, етхуанэм, епщIанэм. Иджыпсту центрхэр къызэрагъэпэщ унэлъащIэ екIухэмрэ иджырей егъэджэныгъэ мардэм хуэкIуэ техникэ пэрытхэмкIэ. Псори зэхэту центрхэм программэм и лейуэ щIэныгъэ гуэдзэн щызрагъэгъуэтыфынущ щIыналъэм и еджакIуищэхэм. Абы къыдэкIуэ фIагъхэм ящыщщ ныбжьыщIэхэм ябгъэдэлъ зэфIэкIхэр нэхъ наIуэ зэрыхъури, сабий зэчиифIэхэм нэхъ ядэлажьэгъуафIэу къызэрыщIэкIри.