Псэм уздишэр Хэкужьырщ

Илъэс зыбжанэ хъуауэ Къэбэрдей-Балъ­къэрым гъэмахуэм къыщызэрагъэпэщ «Дунейм и ныбжьыщIэхэр» зыфIаща щIэныгъэ-щэнхабзэ лагерыр. Дунейпсо Адыгэ Хасэм и жэрдэмкIэ, Президент грантхэм я фондым и мылъкукIэ мы гъэми зэгухьэныгъэм апхуэдэ бадзэуэгъуэ нэгузыужь къахузэригъэ­пэщащ Сирием щыщ сабий 25-м. НыбжьыщIэхэм зыщагъэпсэху «Горный родник» санаторэм. 

- Иорданиеми, Израилми, Сириеми, Тыр­куми къитшурэ, ипэ илъэсхэм мып­хуэдэ лагерхэм сабий нэхъыбэ къэтшэфу щытащ, - жеIэ ДАХ-м и тхьэмадэ Сэхъурокъуэ Хьэутий. - Псори дызыщIэхъуэпс мамырыгъэр тепщэ хъужмэ, дяпэкIи ар зэдгъэхъулIэфынущ. 
Мы гъэм къэрал щIыбым щекIуэкI Iуэху­хэри, Тыркум къыщыхъуа щIыхъейри я щхьэусыгъуэщ сабийхэм я бжыгъэр зэрынэхъ мащIэм, тхьэмадэм зэрыжиIэмкIэ. Къэбэрдей-Балъкъэрым щрахьэкIыну махуэ 21-м сабийхэм я нэгу зрагъэужьыну къудейкъым. НыбжьыщIэхэм папщIэ адыгэбзэмрэ урысыбзэмкIэ дерсхэр ирагъэкIуэкIынущ. «Горный родник» зыгъэп­сэхупIэм гъэмахуэр щрахьэкI нэгъуэщI щIыпIэ къикIа сабийхэми, аращи, дерсым щызрагъащIэр уэршэрым щыщIагъэбы­дэжыфынущ цIыкIухэм. 
- Сабийхэр ди лъэпкъэгъухэр щыпсэу къэралхэрщ къыздикIар, - пещэ Сэхъурокъуэ Хьэутий и гупсысэм. - Ди деж                               гъащIэр зэрыщекIуэкIым щыгъуазэ защIыну, абы зэрызыхазэгъэну щIыкIэм ­хуэдунэтIыну дыхуейщ цIыкIухэр. Ныб­жьы­щIэхэм щапхъэфI егъэлъагъупхъэщ. Псори дызэкъуэту, ди акъыл зэтехуэу ­        дызэ­дэпсэуныр зэрынэхъыфIыр къагу­­­рыд­гъэIуап­хъэщ абыхэм. Зэры­хъукIэ цIыху нэхъыбэ къэтшэжыну ди мурадщ, дэтхэнэ зыми ди Хэкушхуэр иригъэфIэ­кIуэну, Урысейм щыпсэу лъэпкъхэм я зэ­хуа­ку дэлъ зэныбжьэгъугъэмрэ зэ­къуэ­шыгъэмрэ зрагъэубгъун хуэдэу. 
Зэгухьэныгъэм лъэкI къигъэнэнукъым сабийхэм я зыгъэпсэхугъуэр ягу къинэ­жын щхьэкIэ. Сэхъурокъуэ Хьэутий фIы­щIэшхуэ яхуещI «Горный родник» санаторэм и лэжьакIуэхэм. ГъэсакIуэхэмрэ вожатэхэмрэ я пщэ къыдэхуэ жэуаплы­ныгъэм и инагъыр фIыуэ къагуроIуэ, лъэп­къым и щIэблэм я пщэдейрей махуэр ялъагъу. 
- Урысейм дэтхэнэ лъэпкъми и пщIэр щылъагэщ, псоми щIыхь щыхуащI. Дэри абы щыпсэухэм я тхыдэм, я псэукIэм щыгъуазэ зытщIыпхъэщ. Мыдрейуэ, Чувашиеми, Тэтэрстанми, Къэбэрдей-Балъкъэрми урыс щэнхабзэм и мыхьэнэр фIыуэ къа­щыгуроIуэ. Ди зэкъуэтыныгъэрщ ди сабийхэм я къэкIуэнум и лъабжьэр, - жеIэ ДАХ-м и тхьэмадэм. 
Псом нэхърэ нэхъыщхьэр, Сэхъуро­къуэм зэрыжиIэмкIэ, ныбжьыщIэхэм я Хэкужьыр фIыуэ ялъагъуу, я гур я адэш­хуэхэм я къежьапIэм кIэрыпщIауэ ягъэ­зэжынырщ, дэтхэнэ зыри и псэм Къэбэрдей-Балъкъэрым къишэжын хуэдэу. 
КЪУДЕЙ  Iэминэ.