Анэдэлъхубзэр зэраджын тхылъыщIэхэр

Дэтхэнэ лъэпкъми и блэкIари и нобэри къэзыгъэлъагъуэу, и тхыдэр, хабзэр, щэнхабзэр къэкIуэну щIэблэхэм яхуэзыхъумэу щыIэр абы и анэдэлъхубзэращ, и тхыбзэращ. Ди гуапэ зэрыхъущи, ди республикэм и щIэныгъэрылажьэхэм, егъэджэныгъэ IэнатIэм зегъэужьыныр зи пщэрылъ къулыкъущIэхэм гулъытэ хэха хуащI щIыналъэм къихъуэ щIэблэм лъэпкъ щIэныгъэ ябгъэ­дэлъхьэным.

А Iуэхугъуэм и Iыхьэхэм ящыщ зыуэ, КъБР-м и курыт еджапIэ­хэм мы махуэхэм яIэрохьэ школхэм анэдэлъхубзэхэр (къэбэрдей-шэрджэсыбзэмрэ литературэмрэ, балъкъэрыбзэмрэ литерату­рэмрэ) зэрыщаджыну тхылъыщIэхэр. Ди анэдэлъхубзэр хъумэным, ар егъэфIэкIуэным, къытщIэхъуэ щIэблэм ар яIурылъу къэхъуным хуэгъэпса а лэжьыгъэ щхьэпэр зэфIэхащ, «Къэбэрдей-Балъкъэр Республикэм егъэджэныгъэ IэнатIэм зыщегъэужьыным теухуауэ» щIыналъэ къэрал программэм къыщыгъэлъэгъуа Iуэхугъуэхэм         япкъ иткIэ. Адыгэбзэмрэ балъкъэрыбзэмкIэ егъэджакIуэ Iэзэхэр, щIэныгъэлIхэр, тхылъхэмкIэ эксперт IэкIуэлъакIуэхэр илъэс зыбжанэкIэ зэлэжьа тхылъыщIэхэр хьэзыр хъуащ иджыблагъэ.
КъБР-м Егъэджэныгъэмрэ щIэныгъэмкIэ и министерствэм Лъэпкъ щIэныгъэмкIэ и къудамэм и унафэщI Мыз Залинэ зэрыжиIэмкIэ, къызэднэкI тхьэмахуэм къриубыдэу тхылъыщIэхэр яIэ­рыхьэн щIадзащ курыт школхэм. Япэу абыхэм щыгуфIыкIыну Iэмал яIащ республикэм и къалащхьэм дэт курыт школхэм я еджакIуэхэм­рэ егъэджакIуэхэмрэ. Школхэм щылажьэ библиотекэхэм ират 5 - 6-нэ классхэм щIэс ныбжьыщIэхэм анэдэлъхубзэхэр зэраджыну тхылъыщIэхэр. Апхуэдэу абыхэм яIэрохьэ езанэ классым кIуэну сабийхэм папщIэ «Азбукэ» тхылъыщIэхэм я гуэдзэн Iэрытхыр.
 АнэдэлъхубзэхэмкIэ тхылъыщIэхэмрэ пособиехэмрэ, зэрылажьэ Iэрытххэри я гъусэу, къэкIуэну тхьэмахуэ зытIум къриубыдэу яIэрыхьэнущ республикэм и курыт школ псоми. Къыхэдгъэщынщи, иджыпсту хьэзыр хъуа тхылъ гупу 5 - 6-нэ классхэм ятещIыхьар ­ехъулIэныгъэкIэ пхыкIащ федеральнэ реестрым къигъэув мардэхэмрэ пщалъэхэмрэ. Абыхэм хэплъа эксперт цIэрыIуэхэм ахэр ­хъарзынэу зэхэгъэува хъуауэ къалъытащ.
ЖЫЛАСЭ Маритэ.