Анэдэлъхубзэр зэрырагъэджыну тхылъхэр

11 августа, 2023 - 09:34

КъБР-м Егъэджэныгъэмрэ щIэныгъэмкIэ и министерствэм хъыбар къызэрыдигъэщIамкIэ, Къэбэрдей-Балъкъэрым и курыт еджапIэхэм ирагъэшащ анэдэлъхубзэр зэрырагъэджыну тхылъхэр.

 
2023 - 2024 гъэ еджэгъуэм зэрызыхуагъэхьэзырым хыхьэу, республикэм и курыт еджапIэхэм къэбэрдей-шэрджэсыбзэмрэ литературэмрэ, балъкъэрыбзэмрэ литературэмрэ зэрырагъэджыну тхылъхэр ягъэшащ, 5 - 6 классхэм щеджэхэмрэ 1 классым кIуэхэм я Iэрытххэмрэ къызэщIиубыдэу. 
Псори зэхэту школхэм тхылъ 61160-рэ ирагъэшащ, лIэужьыгъуэу 16 хъууэ. КъБР-м Егъэджэныгъэмрэ щIэныгъэмкIэ и министерствэм егъэджакIуэхэм я щIэныгъэм щыхагъахъуэ и Центрым и пщэрылъщ иджырей мардэхэм къезэгъ тхылъхэр къыдагъэкIыным теухуа Iуэхухэр къызэрагъэпэщыныр. Центрым и сайтымкIэ зыщывгъэгъуазэ хъунущ а тхылъхэм я электроннэ лIэужьыгъуэм. 
Адыгэбзэмрэ литературэмрэ зэрырагъэджыну тхылъхэр ягъэхьэзыращ «Къэбэрдей-Балъкъэрым егъэджэныгъэм зыщегъэужьын» щIыналъэ къэрал программэм тету. Нэгъабэ республикэм и курыт еджапIэхэм я 1 - 4 классхэм щеджэхэм яIэрыхьащ иджырей мардэхэм тет тхылъ мин 98-м щIигъу. 
 

 

ТЕКIУЖЬ Заретэ.
  • 27 просмотров
Поделиться: