Республикэм ифI зыхэлъщ

Къэбэрдей-Балъкъэр Республикэмрэ Кавказ Ищхъэрэ федеральнэ университетымрэ дяпэкIэ зэрызэдэлэжьэнум теухуа дэфтэрым Iэ щIадзащ КъБР-м и Iэтащхьэ КIуэкIуэ ­Казбекрэ КИФУ-м и ректор Беспалов Дмит­рийрэ. А зэгурыIуэныгъэм ипкъ иткIэ, «Кавказ Ищхъэрэм и ОПК-м щылэжьэнухэр» ­проектыр ягъэзэщIэнущ. 

Фигу къэдгъэкIыжынщи, УФ-м и Прези­дентым и полномочнэ лIыкIуэу КИФЩI-м щыIэ Чайкэ Юрий и унафэкIэ, федеральнэ универ­ситетыр щIыналъэхэм ОПК-м епхауэ щыIэ ­IуэхущIапIэхэм щылэжьэнухэр щагъэхьэзырыну яубзыхуащ.  
- Кавказ Ищхъэрэ федеральнэ университетым къыщIигъэкIынущ зыхъумэжыныгъэ-про­мышленнэ IэнатIэм щылэжьэну IэщIагъэлI ­лъэ­рызехьэхэр, абы нэмыщIкIэ иджыпсту  дызы­хуэныкъуэ, бгым хъугъуэфIыгъуэхэр къы­щIэ­зыхынухэри щрагъэджэнущ. Дэ хуабжьу ­ды­хуейщ IэнатIэ зэмылIэужьыгъуэхэм къыщы­сэбэпын, иджырей Iэзагъхэр зыбгъэ­дэлъ, технологие и лъэныкъуэкIэ зи гугъу тщIы Iуэхухэм «псэщIэ» хэзылъхьэжын IэщIагъэлI ныбжьыщIэхэм. Нобэ Iэ зыщIэддза зэгурыIуэ­ны­гъэр Къэбэрдей-Балъкъэрым ифI зыхэлъ Iуэху зыбжанэм лъабжьэ яхуэхъунущ, - жиIащ КIуэ­кIуэ Казбек. 
- Ди пащхьэ къит къалэнхэм ящыщщ республикэм и ОПК-м щылэжьэну IэщIагъэлIхэр зыхуей хуэзэу гъэхьэзырыныр, абы папщIэ япэ игъэщыпхъэ къалэнхэр зэфIэдгъэкIыныр. Iуэ­хур нэхъыфIу къыдэхъулIэн папщIэ, Къэбэрдей-Балъкъэр Республикэм ит апхуэдэ IуэхущIапIэхэр нэхъ зыхуэныкъуэхэр къэхутэн хуейщ, апхуэдэуи я пащхьэ къит къалэнхэр зыгъэ­зэщIэфын щIалэгъуалэ яхуэдгъэкIуэжыныр ди пщэрылъщ, - къыхигъэщащ Беспалов Дмит­рий.
Зи гугъу ящI IэщIагъэлIхэм хуэдэхэр зэгъусэу ягъэхьэзырынущ Кавказ Ищхъэрэм щылажьэ университетхэм я консорциумым хыхьэ еджа­пIэ нэхъыщхьэхэм.