Иджы хуэдэ бжьыхьэ зэманым къалэхэм я щIыпIэ щхьэхуэхэм уэру цIыхур щызэхуэс бэзэр цIыкIухэр щызэхэтщ. Абыхэм хэти къыщелъыхъуэ унагъуэ хадэм къыщыпача пхъэщхьэмыщхьэ, хэти щIымахуэ шхын гъэтIылъыгъэхэр къызыхищIыкIын хадэхэкI къабзэхэр.
ЗэманкIэ дызэIэбэкIыжмэ, абыхэм я хуитыныгъэр зэуэ дакъузауэ щытащ щIэуэ къэунэхуа мэкъумэш IуэхущIапIэ инхэм. Гугъу ехьу къуажэдэсхэм я хадэм кърахамрэ я жэмым къыщIаша гъэшымрэ езыхэр зэрыхуейуэ ящэным гугъуехь Iэджэ пыщIат: бэзэрынэм къищынэмыщIауэ, увыпIэ зимыIэр трагъэтыртэкъым, ар зэбгъэгъуэтынри тынштэкъым.
Нэгъабэ Iуэхум фIы и лъэныкъуэкIэ зихъуэжащ. Иджы цIыху къэс гугъу зыдехьа ерыскъыхэкIхэр дэнэ дежи щищэну хуитщ, къабзагъэ мардэхэм емыбакъуэ закъуэмэ. Фи нэгу къыщIэвгъэхьэт Ашуровымрэ Неделинымрэ (Искож хьэблэм), Кулиевымрэ Кировымрэ, Головкомрэ Шортэнымрэ я цIэхэр зезыхьэ уэрам зэхэкIыпIэхэм хуэзэ, мэ гуакIуэ къызыкIэрих унагъуэ мыIэрысэхэр, кхъужьхэр, къыпцIэхэр, къэбхэр, хризантемэ гъэгъа Iэрамэшхуэхэр зипэ-зипэкIэ щащэ плIанэпэ бэзэр цIыкIур щымыIэжу - куэдым я жагъуэ зэрыхъунум шэч хэлъкъым. Сыт щхьэкIэ жыпIэмэ, сату щIапIэхэм узыщримыхьэлIэ куэд къыщыбгъуэтынущ. Абы тетхэм ящэр джэдкъазмэ - яукIа къудейщ, хадэхэкIмэ - ущIытешыныхьыжын щымыIэу, къыщIачагъащIэщ, нобэ узыхуейр ямыIэрэ, пщэдей гуфIэжу къыпхуахьынущ…
Мы гъэм Къэрал Думэм къыхилъхьа законопроектыщIэм сату цIыкIуфэкIу зыщIхэм я Iуэхур къатригъэпсынщIащ. Бэзэр цIыкIухэм къищынэмыщIауэ, ахэр хуитщ автолавкэхэми сату щащIыну. Ауэ языныкъуэ щIыналъэ унафэщIхэм абыхэм жраIэн хуейщ зэгъэбыдылIауэ щытыну щIыпIэхэр.
Я транспортымкIэ щIыпIэ - щIыпIэхэр къызэхакIухьурэ сату ящIыну нэхъ къэзыщтэхэми зыри япэрыуэжыркъым, къабзагъэ мардэхэр къалъытэ закъуэмэ. Зыгуэр зыщэхэмрэ къэзыщэхухэмрэ езыхэр зэгурыIуэжу игъащIэм къокIуэкI. Абы хэлъхьэн хуейIауи къысщыхъуркъым, - жиIащ Урысейм и хьэрычэтщIакIуэхэм я зэгухьэныгъэм и унафэщI Бунич Сергей.
Абы къыхигъэщащ къалэ, щIыналъэ къэс япэм щыIа потребкооперацэхэр щызэфIэгъэувэжын зэрыхуейр, цIыху къэс езым и хадэхэкIхэм, пхъэщхьэмыщхьэхэм, гъэшым, лым яхуигъэува уасэмкIэ абыхэм иратын хуэдэу. Иджыпсту къэралыгъуэ куэдыр абы тету мэлажьэ. Псом япэ ар зиIар дэрати, тхъумакъым. Ауэ къэсащ ар къэдгъэщIэрэщIэжын щыхуей зэманыр. Езыхэм ящэжмэ нэхъ къэзыщтэхэм санитарнэ тхылъ яIыгъын хуейуэ аращ.
- Потребительскэ кооперацэр зэфIэгъэувэжын папщIэ псом япэу IыхыпIэ щIыпIэхэм пэмыжыжьэу пхъэщхьэмыщхьэ, хадэхэкI хъумапIэхэр къыщызэIухын хуейщ. АбыкIэ къэралыр субсидиехэмкIэ къадэIэпыкъуамэ, Iуэхур псынщIэу ипэкIэ кIуэтэнут, цIыхухэм яфIэфIыпсу щIы IэнэщIрэ хадэу яутIыпщыжар къащтэжынут, и пIэм иувэжынут мэкъумэшхэкIхэмкIэ сату щIынри, - жиIащ унафэщIым.