Сальвадор Республикэм иджыблагъэ щекIуэкIа «Дунейпсо тхьэIухуд 2023» 72-нэ зэпеуэм щытекIуащ Никарагуа щыщ, илъэс 23-рэ зи ныбжь Паласиос Шейннис. Япэ вице-мисс хъуащ Тайландым щыпсэу Порсильд Аннтоние. ЕтIуанэ вице-мисс щIыхьыцIэр лъагъэсащ Австралием щыщ Уилсон Морайя.
«Дунейпсо тхьэIухуд - 2023» зэхьэзэхуэм къэрал 90-м нэблагъэм щыщ хъыджэбзхэр хэтащ. Зэпеуэм и тажыр къэзыхьа Паласиос Шейннис мыр и щыпэ текIуэныгъэкъым. НэхъапэIуэкIэ абы къихьащ «Мисс подросток Никарагуа-2016», «Мисс Мира Никарагуа-2020» зэпеуэхэр. Шейннис щеджащ Америкэм и университетым цIыхубэ коммуникацэхэмкIэ и факультетым. Ар волейболым дихьэхыу, университетым и гупым щыджэгуу щытащ. КъыжыIапхъэщ, Никарагуа щыщ хъыджэбз япэу а зэпеуэм зэрыщытекIуэр. Телевиденэм и лэжьакIуэ Шейннис иджыблагъэ иригъэжьащ «Пойми свой разум» Iуэхур. Ар хуэгъэпсащ цIыхум и псэ узыншагъэм.
Зэпеуэм щытекIуэным и пэ къихуэу, Шейннис Интернетым щитхащ зи хъуэпсапэ зэзыгъэхъулIэну щIэхъуэпс дэтхэнэ зыми зэрызыхуигъазэ тхыгъэ. Абы итт гугъуехьхэм щымышынэу, къимыкIуэту, ерыщагъ яхэлъу я хъуэпсапIэм хуэкIуэну, зыхущIэкъур зрамыгъэхъулIэфыну къащыхъуми, я зэфIэкIым шэч къытрамыхьэну.
- Зы цIыхубз цIэрыIуэ зы илъэскIэ и пIэ укъихутэну апхуэдэ Iэмал уиIатэмэ, хэтыт къыхэпхынур? – жаIэу щеупщIым, жиIащ XVIII лIэщIыгъуэм псэуа инджылыз тхакIуэ, гупсысакIуэ цIэрыIуэ Уолстонкрафт Мэри и гъащIэмрэ гуащIэмрэ зэрыдихьэхыр икIи щапхъэу къызэрилъытэр. Шейннис къыхигъэщащ цIыхухъухэм я хуитыныгъэхэм хуэдэ бзылъхугъэхэм яIэ зэрыхъуар абы зэрифIыгъэр.
Къэрал зэмылIэужьыгъуэхэм щыщ, илъэс 18 - 28 ныбжьым ит, дахагъэмкIэ лъэпкъ зэхьэзэхуэхэм щытекIуа, теплъэ, Iэпкълъэпкъ зэкIуж зиIэ хъыджэбзхэм Iэмал яIащ зэпеуэм я зэфIэкI щеплъыжыну. Нэхъыщхьэр – пщащэхэм къэрал хабзэхэм тетын хуейт. Псом хуэмыдэу гъэщIэгъуэнт зэпеуэм хэтхэм я лъэпкъ фащэхэм уеплъыну.
Урысейм и цIэкIэ зэпеуэм хэтащ Санкт-Петербург щыщ, илъэс 22-рэ ныбжьым ит, Урысей таможеннэ академиемрэ Москва щэнхабзэмкIэ и къэрал институтым музыкэ гъуазджэмкIэ и къудамэмрэ зэуэ щеджэ Голубевэ Маргаритэ. Илъэс ныкъуэм и пIэкIэ, абы зэхьэзэхуэм зэрызыхуигъэхьэзырар тхьэмахуищ къудейщ. Хъыджэбзыр уэрэд жыIэным дехьэх. 2021 гъэм музыкэ зэпеуэ цIэрыIуэм и зэфIэкI щеплъыжащ. Сабийхэр уэрэд жыIэным щыхуагъасэ школ къызэIуихыну и хъуэпсапIэщ.
ДахагъэмкIэ зэпеуэм япэу хыхьащ Непал щыщ, илъэс 23-рэ ныбжьым ит, килограмм 80-м щIигъу зи хьэлъагъ, зи лъагагъыр 1 метррэ сантиметр 70-рэ хъу Дипик Джейн. Абы жиIащ, я инагъми хьэлъагъми емылъытауэ, цIыхубз псори зэрыгуакIуэр къигъэлъэгъуэн мурадыр иIэу зэхьэзэхуэм зэрыхэтар.
