ЗэIузэпэщ ящI

КъБР-м и Iэтащхьэ КIуэкIуэ Казбек лэжьыгъэ IуэхукIэ Шэрэдж районым щыIащ. Абы зригъэлъэгъуащ Къэщкъэтау  и гъуэгу нэхъыщхьэм – Уянаевым и цIэр зезыхьэм – и щытыкIэр. Ар мыгувэу зэрагъэпэщыжын щIадзэнущ.  
Гъуэгум и кIыхьагъыр километри 3,2-рэ мэхъу. Зи гугъу тщIы Iыхьэр йокIуалIэ жылэм дэт сабий гъэсапIэм, курыт еджапIэм, къуажэ, щIыналъэ администрацэхэм я унэхэм, спорт IуэхущIапIэхэм. 
Республикэ унафэщIым къулыкъущIэхэм къалэн ящищIащ гъуэгур икIэщIыпIэкIэ зэрагъэзэхуэн хуейхэм хагъэхьэну. Абы и сметэр дяпэкIэ ящIыну аращ. 
Зыхуей хуагъэзэжынухэм ящыщщ Балъкъэр Ипщэм ухуэзышэ федеральнэ гъуэгури. Ар республикэм и гъуэгу Iыхьэ нэхъ гугъухэм икIи нэхъ инхэм ящыщщ. Ауэ турист щIыпIэхэм ухуэзышэ а гъуэгур нэхъ тынш, хуит, щынагъуэншэ щIын хуейщ. Балъкъэр Ипщэ къуажэм Iэтащхьэр щынэсым абы щекIуэкI псэукIэм щIэупщIащ, ныкъусаныгъэхэр зригъэщIащ. 
АдэкIэ КIуэкIуэ Казбек дыхьащ Аушыджэр жылэми. Абы федеральнэ проектым ипкъ иткIэ, щызэрагъэзэхуэжащ Сатушир-Аушыджэр псы зэрыкIуэ, километр 11 зи кIыхьагъ бжьамийр. Абырэ нэхъапэкIэ зэрагъэпэщыжа Къэщкъэтау-Аушыджэр бжьамиймрэ я фIыгъэкIэ къуажэр псы хуэлIэнукъым, абы и районыщIэри къызэгъэпэща хъунущ. 
ЦIыху 300 щIэхуэу Аушыджэр дащIыхь къуажэ клубми дяпэкIэ и бжэхэр къызэIуихынущ.