УФ-м Къэрал кIуэцI IуэхухэмкIэ и министерствэм и къудамэу Къэбэрдей-Балъкъэрым щыIэм и коллегием и зэхуэсым. КъБР-м и Iэтащхьэ КIуэкIуэ Казбек хэтащ
Къэбэрдей-Балъкъэрым и УнафэщIыр ирагъэблэгъащ Къэрал кIуэцI IуэхухэмкIэ министерствэм 2023 гъэм зэрылэжьар къызэщIэубыдауэ къыщипщытэжа зэIущIэм. Видеоконференц жыпхъэкIэ абы хэтащ УФ-м Къэрал кIуэцI IуэхуэмкIэ и министерствэм ЩIэпхъаджагъэхэр къыщIэгъэщынымкIэ и управленэм и унафэщI Монахов Сергей, КъБР-м и Парламентым и УнафэщIым и къуэдзэ Жанатаев Сэлим, республикэм и хабзэхъумэ IуэхущIапIэхэм я унафэщIхэр, министерствэм и лэжьакIуэхэр, жылагъуэм и лIыкIуэхэр.
Хабзэхъумэхэм ирагъэкIуэкIа оперативнэ лэжьыгъэхэм я фIыгъэкIэ яIэ ехъулIэныгъэхэр къызэщIиубыдэу, утыкум къыщыпсэлъащ УФ-м Къэрал кIуэцI IуэхухэмкIэ и министерствэм и къудамэу КъБР-м щыIэм и унафэщI Павлов Василий. Абы къыхигъэщащ укIыгъэхэр, цIыхум фэбжьрэ уIэгъэрэ щытралъхьэ щIэпхъаджагъэхэр, цIыхухэр хъунщIэныр, абыхэм уэрамым щебгъэрыкIуэныр, ныбжьыщIэхэр зыхэпщIэ мыхъумыщIагъэхэр нэхъ мащIэ зэрыхъуар. Электрон Iэмэпсымэхэм епхауэ зэрахьэ щIэпхъаджагъэхэр нэхъ къыщIагъэщыф хъуащ, гъуэгум къыщыхъу гузэвэгъуэхэм хэкIуадэхэм я бжыгъэми хэщIащ. Министрыр тепсэлъыхьащ 2024 гъэм гулъытэ нэхъыбэ зыхуэщIыпхъэ лъэныкъуэхэм.
Зэхуэсым къеблэгъахэм захуигъазэу, КIуэкIуэ Казбек министерствэм и лэжьакIуэхэм аргуэру фIыщIэ яхуищIащ жэуаплыныгъэ яхэлъу IэнатIэм зэрыбгъэдэтым щхьэкIэ, министерствэм и фIыгъэщ цIыху куэд щызэхуэс махуэшхуэхэр мамыру зэрекIуэкIри, хамэ къэралхэм цIыхухэм я гупсысэкIэр къагъэутхъуэн папщIэ ялъэкI къыщамыгъанэ зэман гугъум республикэм и жылагъуэ гъащIэр арэзы укъищIу зэрызэпIэзэрытри. Республикэм и УнафэщIым къыхигъэщащ абы щхьэкIэ лэжьыгъэр къэбгъэтIасхъэ зэрымыхъунур, наркотикхэр зыщэ-къэзыщэхухэм япэщIэтын зэрыхуейр, ныбжьыщIэхэм уахуэбэлэрыгъынкIэ Iэмал зэримыIэр, компьютер Iэмэпсымэхэр къагъэсэбэпурэ лей зезыхьэхэм цIыхухэм зыкърамыгъэгъэпцIэн папщIэ, набдзэгубдзаплъэу ядэлэжьэн зэрыхуейр.
Хабзэхъумэ IуэхущапIэхэм я лэжьыгъэр зытегъэпсыхьа къудамэхэм язщ экономикэр къызыхуэтыншэу зекIуэнымрэ коррупцэм (Iулъхьэ къеIыхын-тынымрэ къэрал мылъкум хэIэбэнымрэ) пэщIэтынымрэ. «Бюджет мылъкур зытхьэкъухэм ткIийуэ япэщIэтын хуейщ, псом хуэмыдэу Президентым и унафэкIэ лъэпкъ проектхэмрэ жылагъуэ программэхэмрэ папщIэ къаутIыпщ ахъшэм хэIэбэхэм. 2023 гъэм гъуэгум текIуэдахэр нэхъ мащIэу щытми, апхуэдэ къэхъукъащIэхэм я бжыгъэм хэгъэщIыныр Къэрал кIуэцI IуэхухэмкIэ министерствэм и къалэн нэхъыщхьэу къонэ», - къыхигъэщащ КIуэкIуэ Казбек. УнафэщIыр щхьэхуэу къытеувыIащ зи чэзур къэблагъэ президент хэхыныгъэхэм щIэпхъаджагъэ къыщымыгъэхъуным хуэсакъын зэрыхуейм, къэралыр дяпэкIэ зэрыпсэунур абы зэрелъытам. «ХэхыпIэхэм хабзэр зытетыпхъэ мардэм тету щызегъэкIуэныр къалэн пажэхэм язщ», - жиIащ КIуэкIуэ Казбек.
ЗэIущIэм и лэжьыгъэр къызэщIикъуэжкIэрэ, республикэм и УнафэщIым жиIащ зэхуэсым зи цIэ къыщраIуа къалэнхэр гъэзэщIа хъун папщIэ, щIыналъэм унафэр щызезыхьэ къудамэ псори зэдэлэжьэн зэрыхуейр. «Шэч къытесхьэркъым КъБР-м и хабзэхъумэ IуэхущIапIэхэм я лэжьакIуэхэр, къатехуэ жэуаплыныгъэр куууэ зэрызыхащIэм къыхэкIыу, щIэпхъаджагъэхэр къэмыгъэхъуным яужь дяпэкIи зэритынум, ди щIыналъэм цIыхубэр мамыру, къызыхуэтыншэу щыпсэуным къарууэ яIэр зэрырахьэлIэнум».