ЗэхъуэкIыныгъэ зыхалъхьэ унафэхэр

КъБР-м и Правительствэм и УнафэщI Мусуков Алий иригъэкIуэкIащ Iуэхугъуэ щхьэхуэхэм щыхэплъа зи чэзу зэIущIэ. 

Псоми япэу къащтащ «КъБР-м терроризмэмрэ экстремиз­мэмрэ щыпэщIэтынымкIэ и къэрал программэм зэхъуэкIыныгъэхэр хэлъхьэным теухуауэ» КъБР-м и Правительствэм и унафэм и проектыр. Ар игъэбелджылащ Правительствэм и УнафэщIым и къуэдзэ, министр Къуэшырокъуэ Залым. Проектыр тещIыхьащ КъБР-м и къэрал программэхэр Правительствэм 2023 гъэм жэпуэгъуэм и 4-м къищта унафэм техуэу щытыным. 
КъБР-м экономикэ зыужьыныгъэмкIэ и министр Рахаев Борис тепсэлъыхьащ республикэм и Правительствэмрэ фадэр, ту­тыныр зэрызэрагъэкIуэкIым кIэлъыплъ федеральнэ къулы­къум­рэ зэрызэдэлэжьэнумкIэ зэраухылIа зэгурыIуэныгъэм. 
ЗэIущIэм къыщащтащ IэмалыншагъэкIэ Херсон щIыналъэр зыбгынэу ди республикэм щыпсэуну къэкIуахэм псэупIэ зэрагъэпэщын папщIэ сертификаткIэ мылъку яхухэхынымрэ унэ къа­щэхун папщIэ зэ етыгъуэу Iэрагъэхьэну ахъшэмрэ теухуа проект щхьэхуэ. КъБР-м и Правительствэм игъэхьэзыра проектыр къыхилъхьащ КъБР-м ухуэныгъэмрэ псэупIэ-коммунальнэ хозяйствэмкIэ и министр Бэрбэч Алим. Херсон къиIэпхъукIхэм зэрадэIэпыкъуну мылъкур «ЩIыналъэхэм зегъэужьынымкIэ фонд» компанием республикэм къыхуиутIыпщынущ. 
Министрым и гугъу ищIащ фэтэр куэду зэхэт унэхэр зехьэнымрэ зыхуей хуэгъэзэнымрэ теухуа проект щхьэхуэми. Кхъа­хэ хъуауэ къызэралъытам къыхэкIыу программэм хагъэкIащ фэтэр куэду зэхэт зы унэрэ хабзэм къемызэгъыу зэрау­хуэм къыхэкIыу къызэтрагъэувыIа униплIрэ. 
- Фэтэр куэду зэхэт унэхэр зехьэнымкIэ щIыналъэ программэм хагъэхьащ зи ухуэныгъэр ирагъэжьэжа уни 187-рэ. 2023 гъэм зи унэ щIыбхэр зехьэн хуейхэм хабжащ Налшык, Лениным и цIэр зезыхьэ уэрамым тет унэ №39-мрэ КIэрашэм и цIэр зезыхьэм тет унэ №20 А-мрэ, - къыхигъэщащ Бэрбэчым. 
Министрыр щхьэхуэу тепсэлъыхьащ КъБР-м «Иджырей къалэ щытыкIэ къыщызэгъэпэщын», «КъБР-м и цIыхухэр псэупIэкIэ къызэгъэпэщын» къэрал программэхэм я паспортхэр гъэхьэзырыным. 
КъБР-м узыншагъэр хъумэнымкIэ и министр Къалэбатэ Рус­там зэIущIэм къыщыпсэлъащ республикэм узыншагъэр хъу­мэнымкIэ и IуэхущIапIэ щхьэхуэхэм я фIэщыгъэхэр зэрахъуэжынум, я къалэнхэми къазэрыхэхъуэнум ипкъ иткIэ Правительст­вэм игъэхьэзыра проектым теухуауэ. Налшык щыIэ кардиологие диспансерыр къалэ клиникэ сымаджэщ №1-м ха­гъэ­­хьэжынущ. Министрым къызэрыхигъэщамкIэ, иджырей технологиехэр къыщагъэсэбэп центрыр зэпэщ хъумэ, цIыхухэм иратыну медицинэ Iуэхутхьэбзэхэри нэхъыфI хъунущ. 
КъБР-м лэжьыгъэмрэ цIыхухэм псэуныгъэкIэ защIэгъэ­къуэнымкIэ и министр Асанов Алим зэIущIэм щытепсэлъыхьащ КъБР-м и цIыхухэм ядэIэпыкъуным теухуа проектитIым. 
КъБР-м щIалэгъуалэм я IуэхухэмкIэ и министр Лу Азэмэт тепсэлъыхьащ IэнатIэм зегъэужьынымкIэ щыIэ программэм папщIэ республикэм и бюджетым щыщ мылъку муниципали­тетхэм тегуэшэным хухэха проектым. Абы тету щIалэгъуалэ центрхэр къызэIуахынущ, Iуэхугъуэ щхьэхуэхэри ирагъэкIуэкIынущ.