Шыгъу зышхар псы йофэж, жаIэ. Ар пэжщ, ауэ Iуэхур а псыр дыдж дыдэу къызэрыщIэкIынурщ. Апхуэдэщ Iулъхьэри. Абы дихьэхар увыIэжыфыркъым теунэхъуэху, уеблэмэ и кIуэдыр къикIыху.
А мыгъуагъэм и бий бэнэныгъэр щрагъэкIуэкI зи щхьэ пщIэ хуэзыщIыжыф къэрал псоми. Ар языныкъуэхэм щынэхъ ткIийщ, адрейхэм щынэхъ щабэщ - тетыгъуэр зейхэр зэрыбгъэдыхьэм елъытащ.
Китайр Iулъхьэ къеIызыххэм сыт щыгъуи хуэткIиям, ауэ Си Цзиньпин 2012 гъэм жьантIэр лъыса иужь, мыбы къаруущIэкIэ щапэщIэуващ къамылэжьа мылъку зэзылъэфалIэхэм. Нэмысыр къэпщытэнымкIэ комиссэ нэхъыщхьэм - аращ мы IэнатIэм нэхъыбэу къыщызыгъэшыр - я IэнатIэхэм трахуащ къулыкъущIэшхуэхэу минипщIхэр. ЗэрыгурыIуэгъуэщи, абыкIи зэфIэкIакъым. Псом хуэмыдэу нэхъ гуэщIащ 2022 гъэм елъытауэ процент 40-кIэ нэхъыбэ яхъхэм къыщихуа блэкIа илъэсыр. Нэхъ жьгъейуэ яIэрыхьэхэм я гугъу тщIыхэнкъым - ахэр бжыгъэншэщ.
Нэгъабэ и гъатхэм къапщытащ, ахъшэ щызэрагъакIуэхэри яхэту, къэрал IуэхущIапIэ инхэу 30. Абы иужькIэ чэзур къалъысащ сымаджэщхэм. Хэбгъэзыхьмэ, къащыгъупщакъым спортри, нэхъ щхьэтечу жыпIэмэ, футболри. ХьэрэмыгъэкIэ мылъку зэрагъэпэщу сэтей къащIахэр иджы лъэхъуэщым исщ.
Зи гугъу тщIа бэнэныгъэм фэрыщIагъэ е хуэдэчыхыныгъэ гуэри хэлъкъым: властхэр хущIокъу зыми екIурабгъу зыхуамыIэу цIыхубэм и пащхьэм зыкъыщагъэлъэгъуэну ирагъэщри а мурадырщ. Куэдым ягу ирихьащ хьэжьвакъэжьышххэм ятеухуауэ Си Цзиньпин жиIар: «Дэ властыр къыдэзытар цIыхубэрщ икIи дэ тщIэну ди къалэныр тщIэн хуейщ: зи жагъуэ щIыпхъэхэм я жагъуэ тщIын хуейщ. Абыхэм я жагъуэ дымыщIмэ, дэ ди къэралым и цIыху мелардрэ мелуан 300-м я жагъуэ тщIынущ».
Синьхуа ЗыужьыныгъэмкIэ и къэрал банкым и вице-президент «хьэпшыпкIи ахъшэкIи тыгъэхэр къыIихырт, ефэешхэхэм, нэгузегъэужьакIуэ ежьэхэм, гольф джэгухэм яхэтт. А псори къызэзыгъэпэщыр мылъкушхуэ зыбгъэдэлъхэрт.
Цзанеи провинцэм и ЦIыхубэ лIыкIуэхэм я зэхуэсым Зэпымыууэ иIэ комитетым и Iэтащхьэм и къуэдзэу щыта Инь Мэтэнь «хабзэм тетын зэрыхуейр къыгурыIуэжыртэкъым. Хьэпшып ахъши тыгъэу къыIихырт, ефапIэхэм кIуэрт, нэмысыр фIэкIуэдат, хьэжьвакъэжьышххэм запищIат».
Спортым и IуэхущIапIэ нэхъыщхэм и унафэщIым и къуэдзэ Ду Чжаоцэй и фIэщхъуныгъэхэр фIэкIуэдащ, пщэрылъ щащIахэм къытекIри, спортыр шхапIэ ищIащ, лэжьакIуэхэр къыщищтэкIэ и къулыкъур къигъэсэбэпырт езым и фейдэ хэлъу». Апхуэдэ хъыбархэр кIэншэщ.
УкъыщIэхуамэ-щэ? ФIы щIэпхынукъым. Мис а Синьхун агентствэ дыдэм къита хъыбархэм щыщхэр.
Ляонин провинцэм и ЦIыхубэ-политикэ консультативнэ советым и комитетым и унафэщIым и къуэдзэу щыта Ли Вэньси ягъэкъуэншащ доллар мелуан 78-м щIигъу мылъку зэрилъэфэлIауэ. Абы и хьэкумэр укIкIэ ящIащ, суд унафэр щагъэзэщIэнур илъэси 2-кIэ ягъэIэпхъуэри. А пIалъэр икIмэ, ар дунейм ирагъэхыжынущ, нэгъуэщI щIэпхъаджагъэхэри зэхищIыхьауэ къыщIагъэщмэ. Сэтей къахуэмыщIмэ, тезырыр игъащIэкIэ лъэхъуэщым исыну хузэрахъуэкIынущ, илъэс 25-м хуагъэкIуэжынкIи мэхъу. КIэщIу жыпIэмэ, узижагъуэнщ.
Апхуэдэ къапхъэн бзаджэм ихуахэм яхэтщ КНР-м и Суд нэхъыщхьэм и унафэщIым и япэ къуэдзэу щыта Шэнь Джон, илъэс 15 зытралъхьар, 2010 гъэм къыщыщIэдзауэ мылъку зэрызэрилъэфэлIам къыхэкIыу, а IуэхущIапIэм щыщу жэуапым ирашэлIа цIыху ещанэщ. Доллар мелуан 9-кIэ «хэIэбати» илъэс 15 тралъхьащ. КъэнэкIафIэщ!
АрщхьэкIэ доллар мелуан 45-рэ «зыгъэкIуэщIа» Вэн Бинь, страхованэмкIэ корпорацэм и Iэтащхьэу щытам, и хьэкумэр укIкIэ ящIащ, суд унафэр щагъэзэщIэну пIалъэр зэрыжытIам хуэдэу илъэси 2-кIэ хуагъэIэпхъуэри.
Куэд мэхъури, къедбжэкIыныр Iэмалыншэкъым. Ауэ мыбдежым къыщыдгъэлъэгъуэнщ тезыр къудейкIэ я Iуэхур зэрызэфIэмыкIыр. Апхуэдэхэм я мылъкур къанэ щымыIэу къытрах, уеблэмэ къуэдыхэри хущIагъу. Зыри къыхуагъанэркъым. Псалъэм и хьэтыркIэ иджыблагъэ доллар мелуани 4-кIэ Пекин и кум щащащ КНР-м юстицэмкIэ и министру щыта Фу Чжанхуа и фэтэр зыкъизыхыр, псори зэхэту метр зэбгъузэнатIэ 236-рэ къызэрыкIыр. Ар зеям Iулъхьэу доллар мелуани 136-рэ къыIихауэ ягъэкъуаншэри, и хьэкумэр укIкIэ ящIащ. Хэбгъэзыхьмэ, щIэпхъаджагъэр щалэжьа зэманыр зэрыхэкIэсари сэбэп къахуэхъуркъым. Къапщтэмэ, транспорт бюром къулыкъушхуэ щызыIыгъа Чжун Бэнзие пенсэм зэрыкIуэрэ илъэс 16-м щIигъуат, арщхьэкIэ зэхищIыхьахэр къыхуэгъуакъым… и къуэрылъху хъыджэбз цIыкIум и зэранкIэ: ар и ныбжьэгъухэм я пащхьэм и щхьэм щыщытхъужат я унэм юань мелуани 100 и уасэ мылъку (доллар мелуан 1,4-рэ) зэрыщIэлъымкIэ. Iуэхур щызэхагъэкIым, хабзэхъумэхэм тыншу сэтей къащIащ Чжун Iулъхьэ къаIихыу зэрыщытар. Ар партым хадзащ, хьэрэмыгъэкIэ зэрилъэфэлIа мылъкур къытрахри.
Нэхъ лъэрызехьэхэм нэгъуэщI къэралхэм зыщагъэпщкIуф. АрщхьэкIэ ари тезырым ущызыхъумэ мэIуэхукъым: Китайм и Компартым и унафэм щIэту ирагъэкIуэкI «Бажэхэр къэубыдын» Iуэхур. Нэгъабэ и закъуэ апхуэдэ цIыху 582-рэ КНР-м иратыжащ, нэгъуэщI къэралхэм щаубыдри. Абыхэм ящыщу 100-м щIигъум щIэпхъаджагъэ хьэлъэхэр ялэжьат.
Зэрытлъагъущи, «шыгъу зышхар псы ефэжын хуейщ» фIэкIыпIэ имыIэу. Абы къегъэлъагъуэ Iулъхьэ къеIызыххэм иращIэкIа бэнэныгъэр фэрыщIыгъэу зэрыщымытыр. Дызыхыхьа илъэсым ар нэхъ ткIииж хъунущ гъатхэпэм и 1-м къэралым и УК-м зыхуэфащэ зэгъэзэхуэжыныгъэхэр халъхьа иужь.
