Нэхъыщхьэхэр къыхигъэщу

КъБР-м и Iэтащхьэ КIуэкIуэ Казбек и телеграм-каналым къритхащ УФ-м и Президент Путин Владимир Киселев Дмитрий ирита интервьюр къызэрыщыхъуар икIи абы фIэгъэщIэгъуэну зэреплъар жиIащ. «Абы щызэпкърахащ къэрал унафэщIым УФ-м и Федеральнэ Зэхуэсым Зэрызыхуигъэзам зи гугъу щищIа экономикэ щытыкIэмрэ абы зэрызегъэужьыпхъэмрэ. 
Интервьюр экономикэ, туризм, ухуэныгъэ IуэхухэмкIэ къыщIедзэри, санкцэхэр къыщытхуагъэува лъэхъэнэм къэралым зэрызиужьым, ди цIыху бжыгъэм зэрыхэхъуэм, унагъуэхэмрэ сабийхэмрэ ягъуэт дэIэпыкъуныгъэм топсэлъыхь Президентыр. Абы зэрыжиIэмкIэ, унагъуэхэмрэ сабийхэмрэ ядэIэпыкъуным илъэсихым къриубыдэу сом триллион I4 тригъэкIуэдэнущ къэралым. 
Ди республикэми апхуэдэ ахъшэ сабий мини I40-м папщIэ ярет адэ-анэм. Абы къэралым гулъытэшхуэ щIыхуищIыр, унагъуэр Урысейм и лъабжьэр зыгъэбыдэу зэрыщытырщ. Абы ипкъ иткIэ, Путиным аргуэру къыхилъхьащ «Унагъуэ», «ГъащIэ кIыхь», «Урысейм и щIалэгъуалэ» лъэпкъ проектхэр. Унагъуэм хуэунэтIа Iуэхугъуэ куэд хэтщ егъэджэныгъэ, спорт, медицинэ, щэнхабзэ, ухуэныгъэ IэнатIэхэм епха программэхэми. 
УФ-м и Президетным къыхигъэщащ ди экономикэм зэрызиужьыр, зи экономикэр нэхъ лъэрызехьэу къалъытэ къэралитхум Урысейр зэращыщыр. Си фIэщ мэхъу ди УнафэщIым къигъэува къалэнхэр дяпэкIи къызыхуэтыншэу къэралым зэрыщызэфIахынур», - щетх КIуэкIуэм телеграм-каналым.