ТекIуэныгъэм хуэпабгъэу

Къэбэрдей-Балъкъэрым щыщ Прохладнэ щIыналъэм и Приближнэ къуажэм зи узыншагъэкIэ сэкъат зиIэ сабийхэр щрагъаджэу дэт школ-интернат №2-м и гъэсэн цIыкIухэр къыщыхэжаныкIащ Сочи къалэм и «Сириус» федеральнэ щIыпIэм футболымкIэ иджыблагъэ щрагъэкIуэкIа «FONBET Стальная воля» урысейпсо зэхьэзэхуэм.

Ар къызэригъэпэщащ «Фонбет» букмекер IуэхущIапIэм икIи абы хэтащ ди къэралым и щIыналъэхэм ящыщу 31-м, Белоруссиемрэ Къэзахъстанымрэ я топджэгу ныбжьыщIэу 600-м щIигъу, я ныбжькIэ илъэс 15 - 18-хэм къриубыдэу.

НыбжьыщIэхэр дихьэхыу, нэжэгужэу зыхэта зэпеуэм Къэбэрдей-Балъкъэрым и командэм (тэмэму зэхэзымыххэм я деж) ещанэ увыпIэр къыщихьащ.

«Стальная воля» зэхьэзэхуэм, дуней псом щыяпэу, щызэхуашэсащ зи узыншагъэм сэкъат зэхуэмыдэхэр иIэ топджэгу ныбжьыщIэ цIыкIухэр. Абыхэм яхэтащ зи Iэ, зи лъакъуэ къызыдэмыбзхэр, зи нэхэм тэмэму ямылъагъухэр, зи тхьэкIумэхэм фIыуэ зэхамыххэр, гу цIыкIум ису къэзыкIухьхэр, нэгъуэщIхэри. Ахэр къызэгъэпэщакIуэхэм ягъэгушхуащ, егугъумэ, ерыщу загъасэмэ, куэд зэрахузэфIэкIынур я фIэщ ящIащ.