Дыжьын медаль куэд

Тулэ къалэм дэт «Арсенал» спорткомплексым щекIуэкIащ Урысейм атлетикэ хьэлъэмкIэ и зэхьэзэхуэ. Абы хэтащ ди къэралым и щIыналъэ куэдым икIа, зи ныбжьыр илъэс 15 - 18, 19 - 20-хэм ит спортсмен 500-м щIигъу.

ПщIэшхуэ зиIэ зэхьэзэхуэм и саугъэтым зи хьэлъагъыр килограмм 71-м нэблагъэхэм яхэту щIэбэнащ Къэбэрдей-Балъкъэрым щыщ Скрипко Аланэ. ДвоеборьемкIэ зэхэту абы къиIэтащ килограмми 192-рэ (84/108). Ар зымащIэкIэ къыкIэрыхуащ Осетие Ищхъэрэ - Аланием икIа Гусаловэ Заринэ икIэ дыжьын медалыр къылъысащ.

Ди республикэм и медалхэм иджыри зы дыжьын хэлъхьэныгъэ хуищIащ Гулиев Тамерлан. Зи хьэлъагъыр килограмм 73-м нэблагъэхэм я зэпеуэм двоеборьемкIэ абы къыщиIэтащ килограмм 285-рэ (125/160).

Зэпеуэм и иужьрей махуэм утыкур хуит хуащIащ спортсмен нэхъ хьэлъэ дыдэхэм. ДвоеборьемкIэ Ширдий Ислъам килограмм 310-рэ къиIэтащ икIи етIуанэ увыпIэр иубыдащ. Ар хэтащ зи хьэлъагъыр килограмми 102-м нэблагъэхэм я гупым.

Иджыри зы дыжьын медаль зэхьэзэхуэм щызыIэригъэхьащ зи хьэлъагъыр килограмми 109-м щIигъу Мариев Тимур. И плIэм фэбжь зэригъуэтам емылъытауэ абы псори зэхэту двоеборьемкIэ къиIэтащ килограмм 360-рэ.

Къэбэрдей-Балъкъэрым щыщ спортсменхэр зэхьэзэхуэм хуагъэхьэзыращ Шэкэм Михаилрэ Щауэ МуIэедрэ.