Хабзэ дахэ хъуауэ, Налшык къалэ клиникэ сымаджэщ №1-м и пщIантIэм дэт фэеплъым деж ТекIуэныгъэм и махуэм щокIуэкI Хэку зауэшхуэм хэкIуэда медицинэ лэжьакIуэхэр ягу къыщагъэкIыж зэIущIэ.
Илъэс 40-м щIигъужащ а фэеплъыр зэрагъэуврэ, абы текIуэда мылъкур дохутырхэмрэ медсестрахэмрэ зэхуахьэсауэ щытащ. Къалэ клиникэ сымаджэщ №1-р республикэм и медицинэ IуэхущIапIэ нэхъ жьы дыдэщ. Зауэ зэманым Урысей Ипщэм и госпиталь нэхъ ин дыдэр абы къыщызэIуахауэ щытащ. УIэгъэ хъуа сэлэт мин бжыгъэхэм я узыншагъэр щызэфIагъэувэжурэ зауэ IэнатIэ гугъум пэрыувэжырт. Апхуэдэ тхыдэ зэриIэрщ а сымаджэщым и пщIантIэм фэеплъыр щIыщагъэувам и щхьэусыгъуэри.
ЗэIущIэм хэтащ КъБР-м узыншагъэр хъумэнымкIэ и министр Къалэбатэ Рустам. Ар и лэжьэгъухэм ехъуэхъуащ махуэшхуэмкIэ икIи фIыщIэ яхуищIащ мамыр гъащIэр къытхуэзыхьа лIыхъужьхэм я фэеплъыр зэращымыгъупщэм, ахэр гъэлъэпIэнымкIэ нэхъыжьхэм къыхалъхьа хабзэм къызэрыпащэм папщIэ.
- Медицинэм и лэжьакIуэхэми лIыгъэ зэрахьэу Хэку зауэшхуэм зэрыхэтам теухуа хъыбар куэдым дыщыгъуазэщ, - жиIащ министрым. - Зауэ щытыкIэ хьэлъэм иту я IэщIагъэм къалэн къащищIар къэмылэнджэжу ягъэзэщIащ. Дрогушхуэ абыхэм зэрахьа хахуагъэм икIи я фэеплъыр зэрытхъумэным адэкIи дыхущIэкъунущ. Дэтхэнэ зэманми езым и лIыхъужьхэр иIэжщ. Иджыпстуи медицинэм и лэжьакIуэхэр дзэ Iуэху хэхам хэту къэралым пщэрылъ къыщищIар ягъэзащIэу я къулыкъур ирахьэкI.
ЗэIущIэ нэужьым министрымрэ Налшык къалэ клиникэ сымаджэщ №1-м и дохутыр нэхъыщхьэ Кумыщ Анзоррэ щыIащ Хэку зауэшхуэм и ветеран Калабуховэ Валентинэ и деж икIи ТекIуэныгъэм и махуэмкIэ ехъуэхъуахэщ.
КъБР-м и Iэтащхьэ КIуэкIуэ Казбек и унафэкIэ республикэм и Парламентым и депутатхэм, министерствэхэм, ведомствэхэм, щIыпIэ самоуправленэмкIэ органхэм я унафэщIхэм Хэку зауэшхуэм хэтахэр я нэIэ щIагъэуващ, псэукIэ и лъэныкъуэкIэ зыIууэ гугъуехьхэр зэфIэхынымкIэ дэIэпыкъуэгъу яхуэхъун папщIэ. Калабуховэ Валентинэ къыкIэлъоплъ КъБР-м Узыншагъэр хъумэнымкIэ и министерствэр. Абы и лъэIукIэ къащэхуа телевизорыр махуэшхуэм ирихьэлIэу ветераным хуишэжащ министрым.
Валентинэ къыхуеблэгъахэм яхуиIуэтэжащ зауэ илъэсхэм езым и нэгу щIэкIахэр. Фронтым ар щыIащ медсестрауэ, бзылъхугъэр сэбэп яхуэхъуащ уIэгъэ хъуа сэлэт щэ бжыгъэхэм. Ар хэтащ Сталинград деж щекIуэкIа зэхэуэм, зауэлI уIэгъэхэр Индыл псым зэпрышынымкIэ дэIэпыкъуэгъушхуэ хъуащ. Абы къыхуагъэфэщащ Хэку зауэ орденым и II нагъыщэр, ЩIыхь орденым и III нагъыщэр, юбилей медалхэр.
Къалэбатэ Рустамрэ Кумыщ Анзоррэ зауэ гугъуехьхэр зыгъэунэхуа бзылъхугъэм ехъуэхъуащ узыншагъэ быдэ, гукъыдэж иIэу, бэIутIэIуншэу псэуну.
