Сыт хуэдэ IэнатIэми зиужьын, ехъулIэныгъэхэр зыIэригъэхьэу щыIэфын папщIэ, абы хэт лъэныкъуэ псоми зэхуэдэу гугъу зрагъэхьын хуейщ, я пщэрылъхэмкIэ жэуап яхьу. Апхуэдэхэм ящыщщ зэхъуэкIыныгъэшхуэхэр сыт щыгъуи щекIуэкI егъэджэныгъэ-гъэсэныгъэ IэнатIэри. Абы щекIуэкI Iуэхугъуэ псоми жыджэру хэтщ егъэджакIуэхэри, еджакIуэ цIыкIухэри, абыхэм я адэ-анэхэри, щхьэж и къалэн яIэжу.
КъБР-м Егъэджэныгъэмрэ щIэныгъэмкIэ и министерствэм лэжьыгъэшхуэ ядрегъэкIуэкI адэ-анэхэм, ахэр IэнатIэм щекIуэкI лэжьыгъэхэм жыджэру хишэу. Апхуэдэу, министерствэм къепхауэ ди щIыналъэм щолажьэ Адэ-анэхэр зыхэт жылагъуэ республикэ штаб. Абы и къалэн нэхъыщхьэхэм хохьэ егъэджэныгъэ IэнатIэм щекIуэкI ухуэныгъэщIэхэр, зэгъэпэщыжыныгъэ Iуэхухэр я нэIэм щIэгъэтыныр, лэжьыгъэхэр зэрекIуэкIым набдзэгубдзаплъэу кIэлъыплъыныр.
Штабым хэтхэм я зэхуэс иджыблагъэ щекIуэкIащ министерствэм. Абы и лэжьыгъэм хэтащ КъБР-м егъэджэныгъэмрэ щIэныгъэмкIэ и министрым и къуэдзэ Мысост Екатеринэ, Адэ-анэхэр зыхэт жылагъуэ штабым и пашэ Добросердовэ Лилие, адэ-анэ жыджэрхэр. ЗэIущIэм къыщыпсэлъа Мысост Екатеринэ зэрыжиIамкIэ, Адэ-анэхэм я жылагъуэ штабым хэтхэр набдзэгубдзаплъэу кIэлъоплъ егъэджэныгъэ IэнатIэм щекIуэкI ухуэныгъэ-зэгъэпэщыжыныгъэ лэжьыгъэхэм, ар зэIухауэ, пэжыр я тегъэщIапIэу зэрыщытыр къапщытэу. «Нобэ дэ къытпэщылъ къалэн нэхъ инхэр епхащ егъэджэныгъэм щызекIуэ иджырей дунейпсо мардэхэм хуэкIуэ Iэмал пэрытхэр сабийхэм къахузэдгъэпэщыным, - къыхигъэщащ Мысостым и псалъэм. - Хуабжьу ди гуапэщ адэ-анэхэм ящыщу нэхъ жыджэрхэр, жэуаплыныгъэ зыхэзыщIэхэр а Iуэхум набдзэгубдзаплъэу зэрыкIэлъыплъыр, школхэм, гъэсапIэхэм щекIуэкI ухуэныгъэ-зэгъэпэщыжыныгъэ лэжьыгъэхэр абыхэм я нэIэм зэрыщIагъэтыр. Адэ-анэхэм я жылагъуэ штабым щыгъуазэ зыхуещI а Iуэхум хуэщIа къэрал программэхэм, проектхэм къыщыгъэлъэгъуахэм тету лэжьыгъэхэр зэрызэфIахым, абыхэм я фIагъым гулъытэ хэха хуащIу».
КъулыкъущIэм зэрыжиIамкIэ, мы зэманым ирихьэлIэу Къэбэрдей-Балъкъэрым и школ пщIы бжыгъэхэм щокIуэкI зэгъэпэщыжыныгъэ лэжьыгъэ инхэр. 2022 гъэм къриубыдэу нэсу зэрагъэпэщыжащ еджапIэ 30. Абыхэм яхыболъагъуэ къызэрызэIуах лъандэрэ апхуэдэ лэжьыгъэхэр щемыкIуэкIахэри. Ухуэныгъэхэм я ныбжьым уеплъмэ, абыхэм яхэтщ илъэс 70 хъухэри, илъэс 20-м нэсахэри.
ЕджапIэхэм щекIуэкI зи чэзу лэжьыгъэхэм Iуэхугъуэ куэд къызэщIаубыдэ. Апхуэдэхэщ, псалъэм папщIэ, унащхьэхэр хъуэжыныр, лъэгухэр щIэуэ идзыныр, бжэ-щхьэгъубжэщIэхэр хэлъхьэныр, унэ кIуэцIхэр, щIыбхэр зехьэныр, инженер-коммуникацэхэр, электрокъару зэрыкIуэ кIапсэхэр, псы щIыIэмрэ хуабэмрэ зрикIуэ бжьамийхэр хъуэжыныр, школ пщIантIэхэр зэпэщ щIыныр, нэгъуэщIхэри. А псоми набдзэгубдзаплъэу зэрыкIэлъыплъыным хущIокъу Адэ-анэхэм я жылагъуэ штабыр. Абы иригъэкIуэкI лэжьыгъэхэм зэпкърыхауэ тепсэлъыхьащ штабым и унафэщI Добросердовэ Лилие. Абы зэрыжиIамкIэ, адэ-анэхэр макIуэ ухуэныгъэхэр, зэгъэпэщыжыныгъэхэр щекIуэкI еджапIэхэм, гъэсапIэхэм. Ахэр гупсэхуу йопсэлъылIэ лэжьыгъэхэр езыгъэкIуэкI ухуакIуэхэм, Iуэхур зэрызэфIэкIымрэ абы хэлъ лъэпощхьэпохэмрэ щIоупщIэ. КъинэмыщIауэ, ахэр кIэлъоплъ проектхэм къыщыгъэлъэгъуа унэлъащIэхэмрэ техникэ пэрытхэмкIэ школхэр къызэрызэрагъэпэщ щIыкIэми. ЗыгуэркIэ сэбэп хъуфынуми, лъэныкъуэ зрагъэзыркъым.
ЕджапIэхэм щекIуэкI лэжьыгъэхэр къызыхуэтыншэу, нэгъэсауэ икIи и пIалъэм зэфIэгъэкIыным хущIэкъу ухуакIуэхэри, ахэр зэрекIуэкIым кIэлъыплъ къэрал, жылагъуэ IэнатIэхэри - псори зэлIалIэр зыщ: щIэныгъэ зэзыгъэгъуэт ныбжьыщIэхэм IэмалыфIхэр къахузэгъэпэщынырщ. Апхуэдэ сабийхэм заужьынущ я акъылкIи, я гупсысэкIи, я дуней еплъыкIэкIи.
