Адыгэхэм я махуэр щагъэлъапIэм ирагъэхьэлIэри, Кэнжэ къуажэм къыщызэIуахащ боксым зыщыхуагъасэ спортзалыщIэ. Абы и хэщIапIэ хъуар курыт еджапIэ №20-рщ.
Урысей Федерацэм и Президентым унафэ ищIауэ щытащ физкультурэм, спортым, егъэджэныгъэм ехьэлIауэ щыIэ законодательствэхэр зэуIуу зэдэгъэлэжьэным теухуауэ. Ар ягъэзащIэкIэрэ, республикэм япэу щаухуа объектщ мыр.
Кэнжэдэсхэм, еджакIуэ цIыкIухэм, спортым дихьэххэм я гуфIэгъуэр даIыгъыну абы кърихьэлIащ Къэбэрдей-Балъкъэрым спортымкIэ и министр Хьэсанэ Ислъам, КъБР-м егъэджэныгъэмкIэ и министр Езауэ Анзор, спортсмен цIэрыIуэхэр, къуажэ администрацэм и лэжьакIуэхэр, нэгъуэщIхэри. ГуфIэгъуэ Iуэхугъуэм ехьэлIауэ школ пщIантIэм къэрал ныпхэр лъагэу щаIэтащ.
Зэхуэсым къыщыпсэлъахэм къыхагъэщащ къытщIэхъуэ ныбжьыщIэхэм я дежкIэ спортым мыхьэнэуэ иIэр, Iэпкълъэпкъыр зэрипсыхьым нэмыщI, абы акъылым зэрызригъэужьыр, еджэнымкIи сэбэп зэрахуэхъур, уэрамым къызэрыдишыр, мыхъумыщIагъэхэм зэращихъумэр.
«Шэч къытесхьэркъым, нобэрей спортзалыщIэм фIы куэд къызэрыдэкIуэнум, республикэр зэрыгушхуэн спортсмен цIэрыIуэхэр къызэрыщIэкIынум», - жиIащ Хьэсанэ Ислъам.
ХьэщIэхэм къаплъыхьащ иджырей мардэм къитIасэ спортзалыщIэр икIи ялъэгъуахэмкIэ арэзы хъуащ. Ар къызэгъэпэщащ боксым зыхуэбгъэсэн щхьэкIэ узыхуэныкъуэну IэмэпсымэхэмкIэ. Бокс Iэлъэр пIэрыгъыу IэкIэ узэуэ фэ къэпхэр (грушэхэр), тренажерхэр ярикъуу щыIэщ. КъБР-м СпортымкIэ и министерствэм боксёрхэр щызауэ профессиональнэ рингыр къахуищэхуащ.
БоксымкIэ секцэр къызэрагъэпэщащ Кэнжэ дэт «Пять колец» спортакадемием и дэIэпыкъуныгъэкIэ икIи абы и лэжьыгъэм пыщIауэ щытынущ. Нобэ спортакадемием къокIуалIэ ныбжьыщIэу 900-м нэблагъэ. Абыхэм зыщыхуагъасэ тхэквондом, бэнэкIэ хуитым, дзюдом, гимнастикэм, футболым, иджы боксыр къахыхьащ.
БоксымкIэ сабийхэм ядэлэжьэнур Урысей Федерацэм спортымкIэ и мастер КIыщ Залымщ. Ар мызэ-мытIэу урысейпсо зэхьэзэхуэхэм щытекIуащ, призер хъуащ. Абы зэрыжиIамкIэ, секцэм иджыпсту зыхезыгъэтхар ныбжьыщIэ 25-щ, ауэ абыхэм я бжыгъэм къызэрыхэхъуэнум шэч къытрихьэркъым.