Урысей Федерацэм и чемпион Бекъул Миланэ

Тхэквондо
 

ФокIадэм и 23 - 29-хэм Адыгейм и къалащхьэ Мейкъуапэ щекIуэкIа, Урысей Федерацэм щыщ цIыхухъухэмрэ цIыхубзхэмрэ тхэквондомкIэ (ВТФ - Олимп джэгухэм хохьэ) я чемпионатым иджыри зы гуфIэгъуэ хъыбар къытхуихьащ. Къэбэрдей-Балъкъэрым зэи къыщымыхъуауэ цIыхубзхэм я деж УФ-м и чемпион цIэ лъапIэр абы щызыIэригъэхьащ икIи дыщэ медаль къыщихьащ Бекъул Миланэ.

 
Зэпеуэхэр щызэхэтар Адыгэ къэрал университетым Къуэблэ Якъуб и цIэр зезыхьэ и спорт уардэунэрщ.
Килограмм 46-рэ зи хьэлъагъхэм я деж Миланэ зэIущIиплI щригъэкIуэкIати, ди пщащэм къыпэлъэщын абыхэм къахэкIакъым. КIэух зэпеуэм Миланэ ерыщу къыщыпэщIэтащ Къэрэшей-Шэрджэсым и гъэсэн Хутэ Аминэ, ауэ и хьэрхуэрэгъум хэпщIыкIыу ефIэкIыу чемпионатым и дыщэ медалыр абы къыфIихьащ. 
Апхуэдэ щIыкIэкIэ, Къэбэрдей-Балъкъэрым и командэм щыщу цIыхуитI Мейкъуапэ щекIуэкIа чемпионатым щытекIуащ. Фигу къэдгъэкIыжынщи, махуитI ипэкIэ Багъ Идар килограмм 58-рэ зи хьэлъагъхэм я деж япэ увыпIэр къыщихьащ икIи УФ-м тIэунейрэ и чемпион хъуащ иджы. 
Бекъул Миланэрэ Багъ Идаррэ зыщагъасэр Кэнжэ къуажэм дэт «Пять колец» спорт академиеращ. Абыхэм я тренерыр Ахъмэт Амирщ.