БэнакIуэ цIэрыIуэм и фэеплъ зэхьэзэхуэмУрысей Федерацэм спортымкIэ щIыхь зиIэ и мастер, бэнэкIэ хуитымкIэ спортсмен цIэрыIуэу щыта Кудухов Бесик и урысейпсо фэеплъ зэхьэзэхуэ Краснодар къалэм иджыблагъэ щекIуэкIащ. «Баскет-Холл» спорт комплексым къыщызэхуэсат къэралым и щIыпIэ куэдым къикIа ныбжьыщIэу 330-м щIигъу. Я хьэлъагъ елъытауэ ахэр гупипщIу гуэшауэ щытащ. Къэбэрдей-Балъкъэрым СпортымкIэ и министерствэм и пресс-IуэхущIапIэм къызэритамкIэ, республикэм и бэнакIуэхэм зэхьэзэхуэм хъарзынэу зыкъыщагъэлъэгъуащ икIи ехъулIэныгъэхэр яIэу къагъэзэжащ. Килограмм 86-рэ зи хьэлъагъхэм я деж щыбанэ Джыджий Тамирлан зэпеуэм и кIэух зэIущIэм къыщыпэщIэтащ Юграм и ныпым щIэту зыкъэзыгъэлъагъуэ Исламгереев Бозигит. Дыщэ медалым щIэбэна ди щIалэм ар къытекIуащ, абы къыхэкIыуи етIуанэ увыпIэрщ къихьар. ЕхъулIэ Азэмэт зэхьэзэхуэм хухаха зэманыр и кIэм нимыгъэсу Къэрэшей-Шэрджэсым щыщ бэнакIуэ Токъу Эмирлан тридзащ икIи домбеякъ медалыр зыIэригъэхьащ. Ди щIалэр щыбанэр килограмм 97-рэ зи хьэлъагъхэм я дежщ. Абы нэмыщI, Къэбэрдей-Балъкъэрым и гъэсэнхэр иджыри тIэунейрэ ещанэ увыпIэм дэкIуеящ. Къэжэр Ислъам килограмм 70 зи хьэлъагъхэм я деж домбеякъ медалым щхьэкIэ къеныкъуэкъуа, Дагъыстэным щыщ Джанмирзаев Магомед-Эмин зэIущIэм и бжыгъэр 13:0-у хигъэщIащ. Iэщын Алихъан килограмм 61-м щыбанэ гупым я деж къыщыпэщIэта дагъыстан щIалэ Кадилов Джамалудин къызэрытекIуэн зы Iэмали иримыту зэIущIэм и бжыгъэр 10:0-у къыфIихьри, ещанэ хъуащ.
Поделиться:
Читать также:
25.04.2024 - 17:30 →
Олимп чемпионыр ящыгъупщэркъым
25.04.2024 - 17:00 →
Кубокыр къыздашэ
23.04.2024 - 17:06 →
Гуп зэпеуэм япэ щыхъуащ
23.04.2024 - 15:26 →
Урысейм щынэхъ лъэщхэр
17.04.2024 - 12:56 →
Къапэлъэщын къахэкIакъым
|