Трошев Геннадий ящыгъупщэркъым

Къэбэрдей-Балъкъэрым СпортымкIэ и министерствэм къызэритамкIэ, Армавир къалэм Дзюдомрэ самбэмкIэ и комплексым урысейпсо зэхьэзэхуэ иджыблагъэ щекIуэкIащ. СамбэмкIэ зэпеуэр щытащ Урысей Федерацэм и ЛIыхъужь Трошев Геннадий и фэеплъу.

Я хьэлъагъ елъытауэ бэнакIуэ ныбжьыщIэхэр, илъэс 16 - 18 зи ныбжьхэр, гупибгъуу гуэшауэ щытащ, псори зэхэту 200-м нэблагъэ.

Къэбэрдей-Балъкъэрым и щIыхьыр яхъумэу абы щыбэна щIалэхэм ящыщу щым медаль зэхуэмыдэхэр къахьащ.

Килограмм 64-рэ зи хьэлъагъхэм я деж Шыкълъашэ Елдар дыщэ медалыр къыщихьащ. Соблыр Атмир апхуэдэ дыдэ ехъулIэныгъэ щызыIэригъэхьащ килограмм 71-рэ хъухэм я деж. Бэждыгъу Аскэр дыжьын медаль къыщихьащ килограмм 64-рэ хъухэр зыхэт гупым.

Ди щIалэхэм я тренерщ Ким Русланрэ ГъущIапщэ Самиррэ.