Анэм и махуэм теухуауэ КъБР-м и Правительствэм Iуэхугъуэ гуапэ щекIуэкIащ.
Къэбэрдей-Балъкъэрым и Iэтащхьэ КIуэкIуэ Казбек и УнафэкIэ, «Анэм и щIыхь» медалыр хуагъэфэщащ бынитхурэ нэхъыбэрэ зыпI бзылъхугъэ 21-м. Абыхэм щехъуэхъум, республикэм и Iэтащхьэм къыхигъэщащ цIыхум дежкIэ нэхъ лъапIэ дыдэу щытыр анэр зэрыарар икIи абыхэм жэуаплыныгъэшхуэ яхэлъу я щIэблэм гугъу зэрыздрагъэхьыр.
- Анэхэращ унагъуэхэм насып, гуапагъэ изылъхьэр. Ахэращ зи IэмыщIэ илъыр ди щIэблэр узыншэу, губзыгъэу къэхъуныр, ди республикэр, къэралыр езыгъэфIэкIуэн къащIэхъуэныр. Сыхуейт дэтхэнэ зы анэми жесIэну фIыщIэ зэрыхуэсщIыр, гущIэгъу зэрахэлъым, махуэ къэс зыпэ-рыт IэнатIэ мытыншым зэрыпэлъэщым папщIэ, - жиIащ КIуэкIуэ Казбек. - Псом хуэмыдэу нобэ псалъэ гуапэхэр яхуэгъэзащ сабий куэд зиIэхэм, зыгъасэхэм. Абыхэм я къалэныр гугъуми, нэрылъагъущ бынунагъуэшхуэм къыщыхъухэм хьэлыфIхэр яхэпща зэрыхъур - гущIэгъу, зэхэщIыкI, нэхъыжьым пщIэ хуэщIын, нэхъыщIэм хуэсакъын, зэкъуэтын жыхуэтIэхэр. Жылагъуэр лъэрызехьэ зыщIыр апхуэдэ гъэсэкIэрщ, хабзэфIхэрщ. Дэтхэнэми икъукIэ пщIэшхуэ худощI. Иужьрей илъэсхэм бынунагъуэшхуэхэм къэралыр зэрыдэIэпыкъу Iэмалхэр куэд дыдэ хъуащ, фэтэр къыщащэхум банкым къыщащта щIыхуэр яхуэпшыныжынымкIэ щIэгъэкъуэн хъунри яхэту. Къыхэзгъэщыну сыхуейт нэгъабэ «Анэ лIыхъужь» цIэ лъапIэр къызэрыдэтхыжари. КъищынэмыщIауэ, Урысей Федерацэм и Президент Путин Владимир иджыблагъэ Iэ щIидзащ 2024 гъэр Унагъуэм и илъэсу зэрагъэувым.
КIуэкIуэр тепсэлъыхьащ бынунагъуэшхуэхэм защIэгъэкъуэным тещIыхьауэ республикэм щрагъэкIуэкI Iуэху щхьэхуэхэми. Абыхэм ящыщ зыщ «Анэм и щIыхь» медалыр щраткIэ, унагъуэм къыщыхъу сабий къэс сом мин 30 зэрыратыр. Мы гъэм ягъэлъапIахэм яхэт, Нарткъалэ дэс Хадарцевэ Инессэ бын 11 зэрипIым къыхэкIыу, ахъшэм къыдэкIуэу, автобус цIыкIу иратащ.
- Къэбэрдей-Балъкъэрым мы зэманым жыджэру дыщолэжь егъэджэныгъэмкIэ, узыншагъэр хъумэнымкIэ, спортымкIэ IэнатIэхэр егъэфIэкIуэным, сабий творчествэмкIэ IуэхущIапIэхэр къызэIудох. Абыхэми елъытащ унагъуэхэр зэIузэпэщу псэуныр. ДяпэкIи бынунагъуэшхуэхэм защIэдгъэкъуэныр, ди щIэблэм зэрызаужьын Iэмалхэм елэжьыныр, узыншэу, насыпыфIэу, губзыгъэу, жэуап яхьыфу, Хэкум хуэфащэу къэгъэхъуныр ди къалэн нэхъыщхьэхэм ящыщу щытынущ, - пищащ КIуэкIуэм.
Республикэм и Iэтащхьэм къыхигъэщащ мы зэманым Украинэм щекIуэкI дзэ Iуэхухэм хэтхэм я бынхэми гулъытэ хэха зэрыхуащIынур. «Къэрал дэIэпыкъуныгъэ щыIэхэр абыхэм зыхащIэн папщIэ тхузэфIэкI къэдгъэнэнукъым. Щхьэхуэу фIыщIэ яхуэсщIыну сыхуейт лIыгъэрэ хахуагъэрэ яхэлъу нобэ зи Хэкур зыхъумэ ди щIалэхэр зыгъэсахэм. Дэтхэнэ бзылъхугъэми пщIэрэ щIыхьрэ хуэфащэщ: унагъуэ Iуэхум и закъуэкъым фэ фызыхунэсыр, ехъулIэныгъэ фиIэу республикэм и IэнатIэ зэмылIэужьыгъуэхэми фи гуащIэ хыволъхьэ, цIыхубэм зывогъэужь», - жиIащ КIуэкIуэ Казбек.
Бынитху зыпI Луговая Марие республикэм и Iэтащхьэм фIыщIэ щыхуищIым къыхигъэщащ къыхуащIа гулъытэр зэращымыгъупщэнур. «Дэтхэнэри дыхущIокъу Хэкум хуэфащэн щIэблэ зэрыдгъэсэнум. ЗэрытхузэфIэкIкIэ ди бынхэм яхыдолъхьэ щIэныгъэри, я лъахэр фIыуэ ялъэгъунри, ди лъэпкъ хабзэхэр ящIэнри. ЩIыналъэ унафэщIхэм зыкъызэрытщIагъакъуэм мыхьэнэшхуэ иIэщ. Анэхэр, унагъуэхэр щагъэлъапIэ Iуэхугъуэхэр иужьрей зэманым куэду ирагъэкIуэкIри, ди къэкIуэнур дахэ зэрыхъунум ущегъэгугъ. ЩIыналъэ унафэщIхэм фIыщIэ фхудощI фыкъызэрытхуэсакъым папщIэ», - жиIащ абы.
- КъБР-м и Iэтащхьэм, ди Правительствэм, район унафэщIхэм я жэрдэмкIэ нобэ дызэрагъэлъапIэм ди дежкIэ уасэ иIэкъым. Псом хуэмыдэу Анэм и махуэм ирихьэлIэу апхуэдэ гулъытэ къыпхуащIыныр гуапэ дыдэщ. Бзылъхугъэхэм псоми сехъуэхъуну сыхуейщ я бынхэм я ехъулIэныгъэ куэд ялъагъуну, узыншэну, дыщIэукIытэн къахэмыкIыу ди щхьэр лъагэу дэзыгъэIэтын щIэблэ диIэну. Аращ анэм дежкIэ нэхъыщхьэ дыдэр, - жиIащ Темыржан Жанеттэ. Бзылъхугъэм щхьэгъусэхэми фIыщIэ яхуищIащ, ахэр щIэгъэкъуэну ямыIамэ, яхузэфIэкIыныр зэрымащIэр къыхигъэщу.
ФIыщIэ псалъэхэмкIэ КъБР-м и Iэтащхьэм зыхуагъэзащ Хадарцевэ Инессэрэ Шыбзыхъуэ Залинэрэ.
- Нобэ «Анэм и щIыхь» дамыгъэр зыхуэдгъэфэща дэтхэнэми сынывохъуэхъу. Си гугъэмкIэ, сыт хуэдэ анэм дежкIи и дамыгъэ нэхъ лъапIэ дыдэр и быным зыхищIыкIынырщ, абы и ехъулIэныгъэхэр илъагъунырщ. Аращи, фи щIэблэм фи гум ежэлIэн зэи къывжамыIэну, фагъэгушхуэ зэпыту фыпсэуну си гуапэщ. Къэралым и гулъытэр нэхъыбэу зытриухуэр унагъуэхэращи, абыхэм ехьэлIа Iуэхухэр адэкIи едгъэфIэкIуэнущ, - жиIащ КъБР-м и Iэтащхьэм.
