Дзэлыкъуэ щIыналъэм и гъуэгухэр

«ФIагъ лъагэ зиIэ гъуэгу шынагъуэншэхэр» лъэпкъ проектымрэ гъуэгум ехьэлIауэ щIыналъэм щылажьэ программэхэмрэ япкъ иткIэ, 2023 гъэм Дзэлыкъуэ щIыналъэм щызэрагъэпэщыжащ псори зэхэту километр 20-м щIигъу зи кIыхьагъ автомобиль гъуэгухэр.

Псалъэм папщIэ, республикэм и мылъкум къыхэкIыу, Светловодскэ жылэм и уэрам нэхъыщхьэм, километри 2,8-рэ зи кIыхьагъым, асфальтыщIэ тралъхьащ. Абы къыдэкIуэу, пкъохэм иджырей лампIхэр фIадзащ, лъэс лъагъуэхэр хашащ. Апхуэдэуи Къармэхьэблэрэ Хьэбэзрэ зэпызыщIэ, километр 11,5-рэ зи кIыхьагъыр, автомобиль гъуэгу ухуэным ехьэлIауэ щыIэ хабзэм тету зэрагъэпэщыжащ. Абы ухуешэ къуажэхэм я еджапIэхэм, амбулаторэм, мэжджытым.

Псынэдахэ къуажэм и гъуэгу километрищым нэблагъэ зи кIыхьагъри къагъэщIэрэщIэжащ. Апхуэдэ лэжьыгъэхэр щекIуэкIащ Бэтэх жылэм и Колхознэ уэрамым. Ар йокIуалIэ курыт еджапIэм, сабий садым, ФАП-м, нэгъуэщI IуэхущIапIэхэми. Дзэлыкъуэдэс къуажэм и Октябрьскэ уэрамри зэтес ящIыжащ.

2024 гъэм зэрагъэпэщыжынущ Дзэлыкъуэ щIыналъэм Светловодскэрэ Дзэлыкъуэрэ зэпызыщIэ, километрым щIигъу зи кIыхьагъ автомобиль гъуэгур, абы къыдэкIуэу Шордакърэ 6-нэ Золкэ жыхуиIэмрэ зэпызыщIэ гъуэгур, километр 16 хъур. Абы тетщ къуажэ еджапIэр, администрацэр, абы нэмыщI, Совхознэ къуажэм и кхъэми йокIуалIэ.