Лышхымрэ дезодорантхэмрэ

Зэманым декIур лIыфIщ жиIами, а зэманым къыздихь щIэщыгъуэхэр цIыхум къыщыхуэмысэбэпи щыIэщ. Уеблэмэ арыншэу гъащIэр ди нэгу къытхущIэмыгъыхьэу къыддекIуэкI хьэпшыпхэмрэ Iэмэпсымэхэмрэ узыфэ мыхъужыныр къыщызэщIагъэуши къохъу.

Дохутырхэм зэрыжаIэмкIэ, бгъэ лышхыр ныбжьыщIэхэми къезыгъэфыкI щхьэусыгъуэхэм тIукIэ къахэхъуащ - дуфачымрэ пщIэнтIэпсымэр зыгъэкIуэду блэгущIэм щахуэ дезодорантхэмрэ. Илъэси 100 хуэдизкIэ узэIэбэкIыжмэ, дуфачыр апхуэдизкIэ гъуэтыгъуейти, ар зымыцIыхуххэ щыIэт. Нобэ ар Iэмал имыIэу пщыгъын хуейуэ ягъэувауэ, бзылъхугъэ пхъуантэм нэхъыбэу дэлъхэм ящыщщ. Пэж дыдэу ар апхуэдизу зэранрэ ирагъэлейрэ къэтщIэн папщIэ, медицинэ къэхутэныгъэхэм дриплъэнщ.

- Дуфачыр къызэрежьамрэ нобэ игъуэта теплъэмрэ шурэ лъэсрэ я зэхуакущ жыхуаIэм хуэдэщ, апхуэдизкIэ зихъуэжащи. Ауэ занщIэу къыхэзгъэщынур ар узыншагъэ мыхъуу, дахагъэм тещIыхьауэ къызэрагупсысарщ. Пэжу, иужьрей зэманым щыIэщ бзылъхугъэ куэд дуфачыр къайхьэлъэкIыу щызыхыжыпа. Ар къыщежьари бгъэ лышхыр дуфачым къыхэкIыу дохутырхэм ягъэхъыбара нэужьщ. 2015 гъэм онкологиемкIэ США-м и Лъэпкъ университетым и щIэныгъэлIхэм утыку кърахьащ илъэс бжыгъэкIэ ирагъэкIуэкIа къэхутэныгъэхэм къагъэлъэгъуар… 21-нэ лIэщIыгъуэм нэхъри ета бгъэ лышхымрэ дуфачымрэ зэхуаIуэхур къащIэн папщIэ цIыхубз мини 5-м кIэлъыплъат ахэри, бгъэмрэ блэгущIэмрэ хэлъ лимфоузелхэр икъузурэ тэмэму имыгъэлажьэу, лъыр зримыгъакIуэу къахутащ. Лимфоузелым и къалэн нэхъыщхьэр - цIыхум и Iэпкълъэпкъым токсину илъыр игъэкъэбзэну аращи, ар хуэмыгъэзащIэ, уеблэмэ фIейр зэхуихьэс хъуа нэужь шын мэхъури, ар лышхым хуокIуэж, зэрыжаIэмкIэ. Си щхьэкIэ, абы арэзы сытехъуэфынукъым. Лышхыр щхьэусыгъуэ зэхуэмыдэхэм къыхокI. Абыхэм ящыщщ кавкасион лъэпкъхэм ар анэдэлъхуу къазэрыдэгъуэгурыкIуэр, цIыхубзым и гормонхэр зэрызэтекIыр. Къыхэгъэщыпхъэщ цIыхубзхэм я закъуэ мыхъуу, цIыхухъухэми бгъэ лышхыр къащеуалIэ зэрыщыIэр. Ауэ абыхэм дуфач зэрахьэркъым! Дэнэ къыздрахыр?! Дуфачым теухуауэ сэ жысIэфынур зы закъуэщ: абы уикъузу е пхуэлалэу щытын хуейкъым. Мыбдежи щыуагъэ куэд яIэщIокI а фэилъхьэгъуэр зыдхэм - бзылъхугъэхэр псори зэхуэдэкъыми, щхьэж и Iэпкълъэпкъ хуэфIу иувэн хуейщ ар. Псалъэм папщIэ, франджы бзылъхугъэхэр IэмащIэлъэмащIэщи, дуфач ящымыгъми мэхъу. Ауэ щыIэщ бгъэшхуэхэр, цIыхубз Iувхэр. Апхуэдэхэм я Iэпкълъэпкъым хуэфIу екIуэкIын, дуфач лIэужьыгъуэ щхьэхуэхэр зэрамыхьэмэ, я щIыбыр къыдишынущ, я пщэр къришэхынущ. КъищынэмыщIауэ, бгъэр нэхъ иныху, дуфачыпсхэри нэхъ бгъуэуэ щытыпхъэщ. А псоми къыдэкIуэу - лимфэр тэмэму игъэлажьэу, зэран хуэмыхъуу, имыкъузу. Пэжщ, мыхэр зэхуэбгъэхъуну гугъущ, ауэ япэ къэсыр къэпщэхунри тэмэмкъым, - жеIэ медицинэ щIэныгъэхэмкIэ кандидат, акушер-гинеколог Усовэ Аннэ.

ЩыIэщ, дуфачым къищынэмыщIауэ, дезодорантхэми бгъэ лышхыр ирахужьэу жызыIэ. Абыи теухуауэ къэхутэныгъэ зэмылIэужьыгъуэхэр ирагъэкIуэкIати, къэрал зэхуэмыдэхэм щыщ щIэныгъэлIхэм зэдэарэзыуэ къызэдащтащ дезодорантым хэлъ бзэхум, пэж дыдэу, бгъэ лышхыр къызэрызэщIигъэушэр.

ПщIэнтIэпсымэр игъэкIуэд закъуэ мыхъуу, ар къызыпкърыкI железахэм я лэжьыгъэр къызэтезыгъэувыIэр бзэхурщ. Ар нэхъ шынагъуэщ пщIэнтIэпсымэр къыпщIимыгъэхьэу зыгъэкIуэдхэм елъытауэ. ЕтIуанэхэм мэр нэхъ гуащIэж зыщI бактериехэр яукIыу аращ, железам и лэжьыгъэм лъэмыIэсу. Ди жагъуэ зэрыхъунщи, цIыхухэр а псоми емыгупсысу, дезодорантым и зэхэлъыкIэм емыджэу, я нэ къыфIэнэр къащэху. Ауэ, къызэрыщIэкIащи, бзэхур гынщ, икIи щIыфэм кIуэцIрокIри лимфэм зэран хуохъу, Iэпкълъэпкъым зреубгъуэ.

- Бзэхум и мэ къудей зыщыуа хьэпшыпхэм нэхъ жыжьэIуэу дыкъыпекIуэкIмэ нэхъыфIу къысщохъу, - жеIэ онколог цIэрыIуэ Саппино Андре-Паскаль.

Рединг университетым онкологиемкIэ и профессор Дарбре Филиппэщ япэ дыдэу бзэхумрэ бгъэ лышхымрэ зэзыпхыу къэпсэлъар. ИкIи 1995 гъэ лъандэрэ къэхутэныгъэ зэмылIэужьыгъуэхэр ирегъэкIуэкIри, жеIэ:

- Сэ езым пщэдджыжь къэс зыщысхуэу щытащ дызытепсэлъыхь дезодорантхэм щыщ. Ауэ езгъэкIуэкI къэпщытэныгъэхэм апхуэдизкIэ сыкъагъэгузэвати, зэуэ пысчат. Мазэ бжыгъэкIэ спкърыкIыжауэ щытащ апхуэдизрэ зыщысхуа дезодорантыр, си блэгущIэхэр зэщIэбэгауэ, мэ Iей дыдэ иIэу цIантлъэ гуэрхэр щIищIэу. Мазищ дэкIри, тэмэм хъужащ псори икIи махуэм тIэунейрэ зыстхьэщIмэ нэхъыби хуэмейуэ сызэтеувэжащ.

Дэ, къызэрыгуэкIхэм, сыт тщIэн хуейр жыфIэмэ, щхьэж езым и гупсысэкIэмрэ Iуэху еплъыкIэмрэ теухуащ псори. Е къэхутэныгъэхэр ди фIэщ хъунщи, дызыхуэсакъын щIэддзэнщ, е къэхъунум дежьэнщ…