Илъэс лэжьыгъэр яубзыхуКъэбэрдей-Балъкъэрым Мэкъумэш хозяйствэмкIэ и министерствэм и нэIэ зытет Iуэху нэхъыщхьэхэм ящыщщ республикэм илъэсым къриубыдэу къэкIыгъэ лIэужьыгъуэу щыхасэнур зыхуэдэхэр, абыхэм хухахыну щIыпIэхэр убзыхуныр. Псалъэм папщIэ, гулъытэ нэхъыбэ ират хабзэщ щIыналъэм фIыуэ къыщыкI, щIэупщIэ зиIэ гъавэхэкIхэм - гуэдз, нартыху сыт хуэдэхэм. Абы нэмыщI, зы къэкIыгъэ лIэужьыгъуэр зэкIэлъыпыту илъэситI-щыкIэ зы щIыпIэм щыхамысэным яужь итщ, гъавэм и фIагъымрэ и бэвагъымрэ кIэрымыхун папщIэ. Апхуэдэу щIым чэзукIэрэ зрагъэгъэпсэху, къэкIыгъэхэр зэрызэблахъум къыщымынэу, щIыпIэ хэхахэм гъавэ щытрамысэххэ илъэсхэри къыхэхуэу. ДызыхуэкIуэ 2024 гъэм республикэм и мэкъумэшыщIэхэм гъавэм псори зэхэту ирагъэубыдынущ гектар мин 281-м щIигъу, абы щыщу гъатхасэм хухахынущ гектар мин 211-р. Министерствэм и пресс-IуэхущIапIэм къызэритамкIэ, гъатхасэм зыхуагъэхьэзыру бжьыхьэм лэжьыгъэ пыухыкIахэр хъарзынэу зэфIагъэкIащ, псалъэм къыдэкIуэу, гектар мини 120-рэ щIыуэ зэрагъэдзэкIащ. Абы нэмыщI, Бахъсэн щIыналъэм и администрацэм Мэкъумэш хозяйствэмкIэ, ерыскъымрэ щIы зэхущытыкIэхэмкIэ и управленэм иджыблагъэ къызэритамкIэ, куейм и мэкъумэшыщIэхэм бжьыхьэсэ лэжьыгъэхэр и кIэм нагъэсащ. ЩIыпIэ мэкъумэшыщIэхэм бжьыхьэсэ гуэдзыр тращIащ гектар 2755-м, хьэр гектар 274-м, рапсыр, куейм щыяпэу, - гектар 461-м. Псори зэхэту бжьыхьэсэм ирагъэубыдащ гектар 3490-рэ.
Поделиться:
Читать также:
01.05.2024 - 13:43 →
«ТекIуэныгъэм и диктантым» зрагъэубгъу
01.05.2024 - 11:18 →
CурэтыщI ныбжьыщIэхэр утыку къохьэ
01.05.2024 - 10:01 →
ЗэчиифIэм и щапхъэ
01.05.2024 - 08:58 →
Дызэкъуэтмэ, дызэрыIыгъмэ...
30.04.2024 - 12:00 →
Италием бзылъхугъэу исым дахагъэкIэ ефIэкI адыгэ анэт
|