Хьэрычэт IэнатIэм зыщIагъакъуэ
Урысей Федерацэм Экономикэ зыужьыныгъэмкIэ и министерствэр иджыблагъэ хэплъэжащ 2023 гъэм и япэ мазипщIым къриубыдэу «1764» зэрыхудачых Iэмалхэр и лъабжьэу щIыхуэ зэрат программэм кърикIуахэм. «А программэм тету 2023 гъэм и япэ мазипщIым сом мелард 566-рэ я уасэ кредит зэгурыIуэныгъэу мин 25-м щIигъу ятщIылIащ хьэрычэт щIэн Iуэхухэм хэтхэм. Ар хуэдэ 1,5-кIэ нэхъыбэщ 2022 гъэм и щIышылэ - жэпуэгъуэ мазэхэм нэхърэ. Япэ итхэм яхэтщ Мэзкуу, Санкт-Петербург къалэхэр, Мэзкуу, Свердловскэ, Челябинскэ, Новосибирскэ областхэр, Краснодар крайр, Тэтэрстаныр. Апхуэдэу щытми, зэрыхудачых Iэмалхэр зи лъабжьэ кредиту щIыналъэхэм я хьэрычэтыщIэхэм яхуэдутIыпщ ахъшэр зэхуэдэу тегуэша мэхъу. Абы къегъэлъагъуэ бизнесым хэтхэр, ар зезыгъакIуэхэр зэхуэдэ щытыкIэ зэритыр, икIи апхуэдэ кредитхэм дэнэкIи щIэупщIэ зэхуэдэу зэраIэр», - жиIащ УФ-м экономикэ зыужьыныгъэмкIэ и министрым и къуэдзэ Илюшниковэ Татьянэ. Хьэрычэт IэнатIэм кредит зэгурыIуэныгъэу банкхэм иращIылIам я процент 70-р къалъос «Сбербанк»-м, ВТБ-м, «Открытие» банкым, «Промсвязьбанк»-м, «Совкомбанк»-м. Зэрыхудачых Iэмалхэр зи лъабжьэ кредитыр лэжьыгъэ IуэхукIэ 2023 гъэм къеIызыхахэм я процент 75-р уней IуэхущIапIэ цIыкIухэм къалъос, процент 20-р - хьэрычэт IэнатIэ мыиным, проценти 5-р - хьэрычэт IэнатIэ курытым. Кредит ахъшэу къащтам и процент 52-р (сом мелард 294-рэ) иратащ машинэ зэпкърылъхьэн IэнатIэм, ерыскъыхэкIхэм елэжь, химие, дэрбзэр промышленностым, ухуэныгъэм ирахьэлIэ материалхэр къыщIэзыгъэкIхэм, нэгъуэщI IэнатIэхэми пэрытхэм. Транспортым, хьэпшып гъэтIылъыпIэхэм, хъумапIэхэм япыщIахэм иратащ щIыхуэу сом мелард 76-рэ. Мэкъумэш IэнатIэм пэрытхэм - сом мелард 30, хьэщIэщхэр гъэлэжьэным епхахэм – сом мелард 24-рэ. Кавказ Ищхъэрэм и щIыналъэхэм ящыщу зэрыхудачых щIыхуэ нэхъыбэ къэзыщтар Ставрополь крайрщ - сом мелард 566-м и процент 1,1-рэ. ЕтIуанэр Шэшэн Республикэрщ – процент 0,2-рэ, ещанэр Къэбэрдей-Балъкъэрырщ – процент 0,14-рэ. 2023 гъэм КъБР-м и хьэрычэтыщIэхэм кредит зэгурыIуэныгъэу 55-рэ банкхэм иращIылIащ, сом мелуан 750,7-рэ хуэзэу. Фигу къэдгъэкIыжынщи, «Хьэрычэт Iуэху мыинымрэ курытымрэ, уней хьэрычэт щIэн жэрдэмхэр» лъэпкъ проектым тету мэлажьэ «1764» зэрыхудачых Iэмалхэр и лъабжьэу щIыхуэ зэрат федеральнэ программэр. ХЬЭЩЫКЪУЕЙ Олег.
Поделиться:
Читать также:
01.05.2024 - 13:43 →
«ТекIуэныгъэм и диктантым» зрагъэубгъу
01.05.2024 - 11:18 →
CурэтыщI ныбжьыщIэхэр утыку къохьэ
01.05.2024 - 10:01 →
ЗэчиифIэм и щапхъэ
01.05.2024 - 08:58 →
Дызэкъуэтмэ, дызэрыIыгъмэ...
30.04.2024 - 12:00 →
Италием бзылъхугъэу исым дахагъэкIэ ефIэкI адыгэ анэт
|