Индием хуаIэ пыщIэныгъэхэр ирагъэфIакIуэМэзкуу къалэм и «Урысейр нобэ» мультимедийнэ пресс-IуэхущIапIэм иджыблагъэ щызэхэтащ Индиемрэ Урысей Федерацэмрэ я ХIV бизнес-зэIущIэ. Ар теухуауэ щытащ къэралитIым я сату, хьэрычэт зэпыщIэныгъэхэм зегъэужьыным. Къэбэрдей-Балъкъэрым къыбгъэдэкIыу зэIущIэм хэтащ КъБР-м и Iэтащхьэм къэрал властым и федеральнэ органхэмрэ Мэзкуу и Правительствэмрэ ядэлэжьэнымкIэ и лIыкIуэу Мэзкуу щиIэ - КъБР-м и Правительствэм и УнафэщIым и къуэдзэ Губин Геннадий. «Якутскрэ Индием и Гуджарат штатым и къалащхьэ Гандинагарэрэ я зэхуаку километр мини 10 хуэдиз дэлъщ, ауэ ди зэпыщIэныгъэхэм зедгъэужьын абы щхьэкIэ къанэркъым. Къэралым и щIыналъэхэм Индием и штатхэм хуаIэ лэжьыгъэ зэпыщIэныгъэхэм махуэ къэс заубгъу» - къыхигъэщащ УФ-м экономикэ зыужьыныгъэмкIэ и министрым и къуэдзэ Вольвач Дмитрий. «Индиемрэ Урысей Федерацэмрэ я сату зэпыщIэныгъэхэр дапхуэдэ щIыкIэкIэ зэпэдмылъытми, бизнес-проектхэр нэхъыбэу зыпыщIар къэралым и щIыналъэхэрщ, къалэхэрщ, уеблэмэ, муниципалитетхэмрэ IуэхущIапIэхэмрэщ», - жиIащ министрым и къуэдзэм. Илъэс къэс мин бжыгъэкIэрэ Индием щыщ туристхэр Урысей Федерацэм къокIуэ. КъэралитIым я правительствэхэм зэращIылIэ зэгурыIуэныгъэм ипкъ иткIэ, УФ-ми Индиеми я цIыхухэр турист гупхэм яхэту къэралхэм ущыIэн папщIэ хуит узыщI дэфтэрхэр ямыIэу зэкIэлъыкIуэ хъунущ. Иджы екIуэкIа зэIущIэр къызэрагъэпэщащ Мэзкуу къалэм экономикэмрэ дунейпсо зэпыщIэныгъэмкIэ и департаментым, Индием дэлэжьэнымкIэ бизнес советым, Индием и бизнес зэгухьэныгъэм, «Росконгресс» фондым. 2023 гъэм къриубыдэу Къэбэрдей-Балъкъэрымрэ Индиемрэ сатууэ зэдащIэм и куэдагъым процент 62,9-кIэ хэхъуащ, абы ипэ ита илъэсым зэрыщыта бжыгъэхэм елъытауэ. ХЬЭЩЫКЪУЕЙ Олег.
Поделиться:
Читать также:
01.05.2024 - 13:43 →
«ТекIуэныгъэм и диктантым» зрагъэубгъу
01.05.2024 - 11:18 →
CурэтыщI ныбжьыщIэхэр утыку къохьэ
01.05.2024 - 10:01 →
ЗэчиифIэм и щапхъэ
01.05.2024 - 08:58 →
Дызэкъуэтмэ, дызэрыIыгъмэ...
30.04.2024 - 12:00 →
Италием бзылъхугъэу исым дахагъэкIэ ефIэкI адыгэ анэт
|