КъБР-м и Парламентым и УнафэщI Егоровэ Татьянэ «ХъуэпсапIэхэм я псей» псапащIэ Iуэхум хыхьэу игъэзэщIащ Къэбэрдей-Балъкъэрым и ныбжьыщIэхэм я хъуэпсапIэхэр.
Республикэм и хабзэубзыху IэнатIэм и унафэщIым сабийхэр Парламентым и унэм иригъэблэгъащ, ИлъэсыщIэмкIэ ехъуэхъун, ахэр дэзыхьэхэмрэ къэкIуэнум хуаIэ мурадхэмрэ зригъэщIэн папщIэ.
ЗэрыцIыхуныгъэр къыщIадзащ гупым нэхъыщIэ дыдэу яхэт, илъэси 7 зи ныбжь Таймураз цIыкIукIэ. Абы зэрыджэгу хьэпшыпыр езым къыхихыжыну хуейти, «Детский мир» тыкуэным и картэмрэ IэфIыкIэрэ тыгъэ хуащIащ.
ХьэщIэ ныбжьыщIэхэм яхэтт Хэку зауэшхуэм и ветеран Ожередэ Максим и къуэм и къуэрылъху. Артур и илъэсы-щIэ хъуэпсапIэт КъБР-м и Парламентым кIуэуэ хабзэубзыху IэнатIэм и унафэщI Егоровэ Татьянэ зригъэцIыхуну.
- Дызытехьэ илъэсым Ожередэ Максим и ныбжьыр илъэси 105-рэ ирикъунущ. Сэ абы и деж хьэщIапIэ сыщыIащ, цIыху телъыджэщ, гъэщIэгъуэн куэдым топсэлъыхьыж. Артур и насыпщ Хэку зауэшхуэм и пэжыр къыжезыIэжыфыну адэшхуэ зэриIэмкIэ. Дэ дыхуейщ фэ, ныбжьыщIэхэм, ди къэралым и тхыдэр, абы зыIэригъэхьа текIуэныгъэр зыхуэдэр фIыуэ фщIэну. Ар-тур, уи адэшхуэм хуэфэщэн къуэрылъхуу щыт, абы и гугъу яхуэщI уи классэгъухэм, яхутепсэлъыхь Хэку зауэшхуэм текIуэныгъэр къыщахьын папщIэ ди нэхъыжь-хэм яхузэфIэкIахэм, - зыхуигъэзащ щIалэ цIыкIум Егоровэ Татьянэ.
Республикэм и хабзэубзыху IэнатIэм и унафэщIым къыхигъэщащ, илъэси 10 зи ныбжь Артур сурэт ищIын, усэ къеджэн, уэрэд жиIэн зэрыфIэфIыр, социальнэ сетхэм щиIэ напэкIуэцIхэр жыджэру зэрызэригъакIуэр икIи фэеплъ тыгъэкIэ хуэупсащ.
Даниял щызригъэцIыхум Егоровэ Татьянэ жиIащ ар щеджэ, Налшык дэт курыт школ №5-р езыми къызэриухар:
- ЕгъэджакIуэфIхэр щылажьэ школ хъарзынэщ ар. Сэ сощIэ уи анэшхуэр есэпымкIэ зэрыегъэджакIуэр, уэ езыр фIы дыдэу узэреджэр икIи щIэныгъэлI ухъуну узэрыщIэхъуэпсыр. Уэ иджыпсту 2-нэ классым ущIэсу аращ, 11-нэ классыр къыщыбухкIэ зы «плIы» къыхэмыхуэну сынохъуэхъу. Абы папщIэ, нэхъыфIыжу уеджэнымкIэ къыпхуэщхьэпэн тыгъэкIэ сыпхуоупсэ.
2022 гъэм «ХъуэпсапIэхэм я псей» псапащIэ Iуэхум хыхьэу республикэм и хабзэубзыху IэнатIэм и хьэщIэу щыта, илъэс 11 зи ныбжь ФатIимэ иджыри зэрыхуэзар фIэгъэщIэгъуэн зэрыхъуар жиIащ Егоровэ Татьянэ. Визажист хъуну щIэхъуэпс пщащэм, нэгъаби хуэдэу, къыIэрыхьащ хъыджэбз цIыкIухэм зэрызагъэдахэ хьэпшыпхэр. КъБР-м и Парламентым и УнафэщIым къызэрилъытэмкIэ, цIыхум и хъуэпсапIэхэр зэримыхъуэжыр и щыхьэтщ ар зэпIэзэрыту, зэфIэкI бгъэдэлъу зэрыщытым.
Илъэс 12 зи ныбжь Амир баскетбол секцэм макIуэ, абы ипкъ иткIи щIэхъуэпсырт спорт щыгъынрэ баскетбол топрэ тыгъэ къыхуащIыну. ХьэщIэ ныбжьыщIэм жиIащ а спорт лIэужьыгъуэмкIэ екIуэкIа зэпеуэхэм зэрыщытекIуар. Егоровэ Татьянэ абы ехъуэхъуащ илъэсыщIэми ехъулIэныгъэ куэд зыIэригъэхьэну.
Илъэс 15 хъу Иван и хъуэпсапIэр смарт-сыхьэтт. КъБР-м и Парламентым и УнафэщIым къыхигъэщащ щIалэ цIыкIур зи гъэсэн, Приближнэ станицэм дэт школ-интернатым зэрыщыIар икIи жиIащ саугъэ-тыр къыхуэщхьэпэну зэрыщыгугъыр.
Егоровэ Татьянэ сабийхэм ехъуэхъуащ узыншагъэ быдэ яIэну, зыхуеджэну IэщIагъэр щыуагъэншэу къыхахыну, я хъуэпсапIэхэр нахуапIэ хъуну.
НыбжьыщIэхэм ябзыщIакъым зэIущIэм зэрыщыгуфIыкIар икIи республикэм и хабзэубзыху IэнатIэм и унафэщIым фIыщIэ хуащIащ зыщIэхъуэпса тыгъэхэр къазэрыIэрыхьам папщIэ.
ПсапащIэ Iуэхум хэтахэм КъБР-м и Парламентым и унэм зыщрагъэплъыхьащ, IэнатIэм и лэжьыгъэм щагъэгъуэзащ. ЗэIущIэм и кIэм псоми зэгъусэу сурэт зэтрагъэхащ.
КъБР-м и Парламентым
и пресс-IуэхущIапIэ.