Урысей Федерацэм цIыхухэм щIэныгъэ нэхъыщхьэ щрагъэгъуэт и IэнатIэм щIыхь зиIэ и лэжьакIуэ, Къэрэшей-Шэрджэс, Къэбэрдей-Балъкъэр республикэхэм щIэныгъэхэмкIэ щIыхь зиIэ я лэжьакIуэ, филологие щIэныгъэхэмкIэ доктор, профессор БакIуу Хъанджэрий Ильяс и къуэр ящыщщ лъэпкъ щIэныгъэм и зыужьыныгъэм хэлъхьэныгъэ ин хуэзыщIа ди IэщIагъэлI пажэхэм. Филолог-еджагъэшхуэр ЩIДАА-м и академикщ, Къандурым и цIэр зезыхьэ дунейпсо саугъэтым и лауреатщ. БакIуум къыфIаща щIыхьыцIэхэм иджыблагъэ иджыри къахэхъуащ. ИлъэсыщIэм ипэ къихуэу абы къыфIащащ «Адыгэ Республикэм щIэныгъэхэмкIэ щIыхь зиIэ и лэжьакIуэ» цIэ лъапIэр. Ар еджагъэшхуэм къихьащ адыгэ лъэпкъ щIэ-ныгъэм хьэлэлу зэрыхуэлажьэмкIэ. АР-м и Iэтащхьэ КъумпIыл Мурат дамыгъэр Хъанджэрий Мейкъуапэ къыщритыжащ дыгъэгъазэм и 28-м.
БакIуу Хъанджэрий Къэрэшей-Шэрджэсым хыхьэ Жьакуэ адыгэ жылэм 1940 гъэм фокIадэм и 17-м къыщалъхуащ. Абы дэт пэщIэдзэ школыр ехъулIэныгъэкIэ къиуха нэужь, еджэным щыпищащ Черкесск дэт интернатым, иужькIэ КъБКъУ-м и тхыдэ-филологие факультетым. Студент илъэсхэм къыщыщIэдзауэ къэхутэныгъэхэм дихьэхыу щIэзы-дза щIалэщIэр адыгэ литературэм и зэхэлъыкIэм, зыужьыкIэм кIэлъоплъ, куууэ щыгъуазэ зыхуещI, абыхэм ехьэлIа щIэныгъэ лэжьыгъэхэри зэфIихыу хуожьэ. 1969 гъэм БакIуур хъуащ СССР-м ЩIэныгъэхэмкIэ и академием Дунейпсо литературэмкIэ и институту М. Горькэм и цIэр зезыхьэм и аспирант. 1973 гъэм ирихьэлIэу Хъанджэрий игъэхьэзращ икIи Москва щыпхигъэкIащ «Адыгэ лъэпкъхэм я литературэмрэ абы щIэгъэхуэбжьауэ зэрызиужьымрэ» фIэщыгъэр зиIа и кандидат лэжьыгъэр.
- Си кандидат лэжьыгъэр щызгъэхьэзырым щыгъуэ, Мейкъуапэ сагъэкIуати, КIэрашэ Тембот и унэм секIуэлIауэ щытащ, - игу къегъэкIыж а зэманыр Хъанджэрий. - А адыгэлI щэджащэм и прозэм си къэхутэныгъэм и зэхуэдитIыр хухэсхати, и творчествэм, адыгэ тхыдэм, хабзэм ятеухуа псалъэмакъ купщIафIэ ди зэхуаку дэлъауэ щытащ. КIэрашэм къызжиIахэм ящыщ куэд къысхуэщхьэпауэ зэрыщытар ноби сощIэж.
Хуабжьу хьэлэмэтщ БакIуум и доктор диссертацэри. Адыгэ усыгъэм и хэлъ щхьэхуэныгъэхэм ятеухуа а къэхутэныгъэр дунейм къытехьащ 1995 гъэм.Абы пщIэшхуэ щиIэщ щIэныгъэ дунейм. «Адыгэ усыгъэм хэлъ лъэпкъ нэщэнэхэмрэ усакIуэхэм я Iуэху еплъыкIэхэмрэ» фIэщыгъэр зиIэ а лэжьыгъэшхуэр лъэпкъ литературэм и теорием и хэлъхьэныгъэ инщ. Еджагъэшхуэхэм къызэра-лъытэмкIэ, БакIуум и диссертацэм къызэIуех Кавказым щыщу нэгъуэщI къэралхэм щыпсэухэм я литературэм теухуа щIэныгъэм и IыхьэщIэ. Ар тхылъ щхьэхуэу 1994 гъэм Адыгейм къыщыдагъэкIауэ щытащ, а республикэм и щIэныгъэ-къэхутакIуэ институтым и жэрдэмкIэ. А тхылъыращ БакIуум Къандур Иззэт и цIэкIэ щыIэ дунейпсо саугъэтыр къыщIыхуагъэфэщауэ щытар.
Къэрэшей-Шэрджэс къэрал университетым илъэс 32-кIэ щылэжьащ Хъанджэрий. А зэманым къриубыдэу ар пэрытащ жэуаплыныгъэ ин зыпылъ IэнатIэ зыбжанэм: егъэджакIуэ нэхъыжь, доцент, кафедрэм и унафэщI, филологие факультетым и декан, филологие институтым и директор. Сыт хуэдэ IэнатIэ пэрытами, БакIуур лэжьащ ныкъусаныгъэншэу, Iуэхур иригъэфIакIуэу, зригъэужьу.
Мы гъэм илъэс 20 мэхъури, Хъанджэрий IэщIагъэлI нэхъыжьу, пашэу щолажьэ Къэбэрдей-Балъкъэрым Гуманитар къэхутэныгъэхэмкIэ и институтым.БакIуум и гъащIэр, дэнэ щIыпIэ щылажьэми емылъытауэ, зэпхауэ екIуэкIыр лъэпкъ (адыгей, къэбэрдей, шэрджэс) литературэр, хэхэс адыгэхэм я литературэр джынырщ, ахэр зи лъабжьэ къэхутэныгъэхэр егъэкIуэкIынырщ. А Iуэхугъуэхэм ехьэлIащ абы и къалэмыпэм къыпыкIа щIэныгъэ лэжьыгъэхэр, статья купщIафIэхэр, монографие щхьэхуэхэр. Апхуэдэу ар жыджэру хэтщ литературэм епхауэ лъэпкъ телевиденэм, радиом къыщызэрагъэпэщ нэтынхэм. Хъанджэрий и тхыгъэ купщIафIэхэр щIэх-щIэхыурэ къытохуэ лъэпкъ газетхэмрэ журналхэмрэ. Зытепсэлъыхьым ар хуабжьу зэрыхуэIэзэр къагъэлъагъуэ тхылъыщIэхэм, диссертацэхэм, авторефератхэм папщIэ итх рецензэхэмрэ тхыгъэхэмрэ. ПщIэшхуэ хуащIу, еджагъэшхуэр хагъэхьащ КъБКъУ-м, АКъУ-м диссертацэхэр щыпхагъэкI я советхэм.
Литературэм ехьэлIа щIэныгъэхэр хэIущIыIу щIыным емышу дапщэщи хущIокъу БакIуу Хъанджэрий. Ар зи Iуэху еплъыкIэрэ гупсысэ щIэщыгъуэ-рэ зиIэ щIэныгъэлIщ. Адыгэ хабзэр, анэдэлъхубзэр хъумэным, лъэпкъым къыдекIуэкI щэнхабзэ лъагэр гъэбэгъуэ-ным зи гуащIи гъащIи щхьэузыхь хуэзыщI адыгэлI щыпкъэм дохъуэхъу нобэ хуэдэу жыджэру, гуащIафIэу куэдрэ псэуну. Апхуэдэхэращ лъэпкъыр зыгъэлъапIэри зыгъэдахэри.
ЖЫЛАСЭ Маритэ.