ЕхъулIэныгъэхэр мащIэкъым

КъБР-м и Правительствэм и Унэм ­республикэм и Iэтащхьэ КIуэкIуэ Казбек щригъэкIуэкIащ Инвес­тицэхэмрэ хьэрычэт IуэхумкIэ сове­тым хэтхэм я зэIущIэ. Абы щытеп­сэ­лъыхьащ а IэнатIэхэмкIэ ди щIыналъэм игъуэт зыужьыныгъэм.

КъБР-м и Iэтащхьэм зэрыжиIамкIэ, иужьрей илъэсхэм республикэм и IэнатIэ зэмылIэужьыгъуэхэр егъэфIэкIуэ­ным мылъку зэрыхалъхьэ щIыкIэхэм ­зеужь. АбыкIэ иджыблагъэ ирагъэкIуэ­кIа Лъэпкъ рейтингым къегъэлъагъуэ апхуэдэ индексыр 7-кIэ нэхъыбэ хъуауэ. Абы ипкъ иткIэ, щIыналъэм къыщалэжь продукцэм, республикэ бюджетым хэ­хъуэнущ.
Къэбэрдей-Балъкъэрым щаубзыхуащ ЩIыналъэпсо инвестицэ мардэ хэха.  Абы и мурад нэхъыщхьэщ къэралым мылъку зыхилъхьэ жэрдэмхэр дэIыгъыныр, хьэрычэт Iуэхум нэхъри зегъэу­жьыным Iэмалхэр къыхузэгъэпэ­щы­ныр. Апхуэдэ Iуэху зехьэкIэм зыщрагъэужьынущ республикэм хыхьэ щIы­пIэхэ-ми.
А Iуэхум къихьахэм ящыщу къыхэбгъэбелджылыкI хъунущ мылъку зыхалъхьэ проектхэм зэрыхэхъуар, хьэрычэт мащIэмрэ курытымрэ нэхъри зэрызаужьыр, нэгъуэщIхэри. Ап­хуэдэхэм я бжыгъэр хуэдитIкIэ нэхъыбэщ, 2021 гъэм еплъытмэ. Зи щхьэ Iуэху зезыхуэжу лэжьыгъэ езыхьэкIхэм я бжыгъэр цIыху мин 70 хуэдиз мэхъу. КъинэмыщIауэ, лэжьапIэншэу зезыгъэтхыу щытахэм я бжыгъэм хощI. Дызэрыт илъэсым и ­жэпуэгъуэ мазэм ирихьэлIэу апхуэдэхэм я бжыгъэр лэжьэфыну ныбжьым итхэм я процент 0,9-рэ хъумэ, нэгъабэ ар процент 1,7-рэ хъурт.
«Абы къыдэкIуэу лъэпкъ экономикэр хущощIэ IэщIагъэлIхэм. ЩIыналъэм и IуэхущIапIэхэр зыхуеину лэжьакIуэ Iэ­кIуэ­лъакIуэхэмкIэ къызэгъэпэщыным хуэ­щIащ курыт щIэныгъэрэ IэщIагъэрэ ­щрагъэгъуэт еджапIэхэм адэкIи зэрызедгъэу­жьыр», - жиIащ КIуэкIуэ Казбек.
ЗэIущIэм и кIэухыу республикэм и пашэм фIыщIэ яхуищIащ хьэрычэтыщIэ IэнатIэм и лIыкIуэхэм, ди щIыналъэм щыщу СВО-м хэт щIалэхэм гулъытэ зэры­хуащIым папщIэ. КъБР-м и Iэтащхьэм къыбгъэдэкI ФIыщIэ тхылъхэр яритащ хьэрычэтыщIэ зыбжанэм.