ЦIыхубэм я Iуэху еплъыкIэхэр къэхутэнымкIэ урысейпсо центрым (ВЦИОМ) иджыблагъэ иригъэкIуэкIа къэпщытэныгъэхэм къызэрагъэлъэгъуамкIэ, «ГъуэгуфI шынагъуэншэхэр» лъэпкъ проектым (пэхуэщIэм) лъэныкъуэ зыбжанэмкIэ бжьыпэр щиIыгъщ къэралым.
Урысей Федерацэм щагъэзащIэ лъэпкъ проектхэм ящыщу цIыхухэм нэхъыбэу къыхагъэщхьэхукIхэм ар яхэтщ. Нэхъ тэмэму жыпIэмэ, ещанэ увыпIэм щытщ. ЩIэупщIэныгъэхэм хэтахэр арэзы нэхъ зытехъуэхэм я гугъу щащIым, абыхэм я процент 74-м Iэ яIэтащ гъуэгухэр егъэфIэкIуэным ехьэлIа проектым щхьэкIэ.
ЦIыхухэм къызэралъытамкIэ, «ГъуэгуфI шынагъуэншэхэр» лъэпкъ проектыр къэралым дежкIэ мыхьэнэшхуэ зиIэщ, сэбэпынагъ куэд къызыбгъэдэкIщ. Абы и лъэныкъуэкIэ етIуанэ увыпIэр абы иратащ.
ЩIэупщIэныгъэхэм хэтахэм я про-цент 29-м къыхагъэщащ а проектым лэжьэн зэрыщIидзэрэ къэралым и цIыхухэм зэхъуэкIыныгъэфI куэд къазэрыхуихьар. Абы нэмыщI, «ГъуэгуфI шынагъуэншэхэр» лъэпкъ проектым и лэжьыгъэм иджыри илъэситхукIэ къыпащэну зэрафIэигъуэр къыжаIащ IэIэтым хэтахэм ящыщу процент 98-м.
Фигу къэдгъэкIыжынщи, «ГъуэгуфI шынагъуэншэхэр» лъэпкъ проектым лэжьэн щIидзащ 2019 гъэм. Иджыпсту абы хэтщ УФ-м и щIыналъэу 84-рэ икIи, иужьрей илъэситхум къриубыдэу, проектым и фIыгъэкIэ псори зэхэту километр 87000-м нэблагъэ зи кIыхьагъ я гъуэгухэр иджырей мардэм тету зэрагъэпэщыжащ.
Зи гугъу тщIы лъэпкъ проектыр Къэбэрдей-Балъкъэрым щылэжьащ 2019 гъэм щегъэжьауэ. Дызэрыт илъэсым къриубыдэу щIыналъэм и жылэ 25-м псори зэхэту километр 70 хъу гъуэгухэр зэпэщ ящIащ. Абы нэмыщI, мылъкушхуэ зытекIуадэу гъуэгу хозяйствэм и объекти 9-м ехьэлIа лэжьыгъэхэр зэфIагъэкIащ.
Налшык къалэм и Къэбэрдей, Осетинскэ уэрамхэр, Къалмыкъым, Мовсисян, Идарым, Щоджэным я цIэхэр зезыхьэ уэрамхэр къагъэщIэрэщIэжащ, абыхэм я нэхъыбэм асфальтобетон зэхэлъхэр щIэуэ тралъхьащ, зыхуей-зыхуэфIхэмкIэ къызэрагъэпэщащ.
Апхуэдэ лэжьыгъэхэр щекIуэкIащ Къармэхьэблэ, Хьэбэз, Псынэдахэ, Лэскэн ЕтIуанэ, Ново-Ивановскэ, Каменскэ, Щхьэлыкъуэ, Светловодскэ жылэхэми. «Iуащхьэмахуэ» лъэпкъ паркым и «Шхельдэ», «Жантыгъуэн» альпинист лагерхэм екIуалIэ автомобиль гъуэгухэри зэпэщ ящIащ. Бахъсэн Ипщэм, Iуащхьэмахуэ жылэхэм щекIуэкIа лэжьыгъэхэри и кIэм нагъэсащ. Апхуэдэуи Бахъсэн щIыналъэм лъэмыжитI щIэуэ Бахъсэныпс щызэпрадзащ.