Гулъытэ хуащI

31 января, 2024 - 13:26
Республикэм и хьэрычэтыщIэхэм ящыщ гупышхуэм хьэпшып зэхуэмыдэхэмкIэ, щыгъынхэмкIэ, ерыскъыхэкIхэмкIэ мы махуэхэм ягъэгуфIащ щытыкIэ гугъу ит унагъуэ 15-м я сабий 56-рэ. Ар ирагъэкIуэкIащ «Хьэрычэт IэнатIэр доIэпыкъу» псапащIэ Iуэхугъуэм ипкъ иткIэ.
«Си хьэрычэт IэнатIэ» Къэбэрдей-Балъкъэр центрым фIыщIэ яхуищIащ Iуэхум хэлIыфIыхьа «Холодагроснаб», «Бахъсэн и жыг хадэхэр», «ЖАКО», «Эльбрус-К», «НМК», «Эрпак», «Горянка-А», «Эфстори», «Гранд-Кавказ», «Алания» IуэхущIапIэхэм, хьэщIэщхэм, апхуэдэуи Можгин Владиславрэ Шымэзокъуэ Миланэрэ. Iуэхум хэтахэу, ауэ я цIэр кърамыIуэмэ нэхъ къэзыщтахэри гулъытэншэ хъуакъым. 
«Си хьэрычэт IэнатIэ» щIыналъэ центрым и лIыкIуэ Можгин Владислав ерыскъырэ IэфIыкIэхэмрэ езым яхуишащ Прохладнэ къалэм щыпсэу цIыкIухэм.
Мы Iуэхур республикэм илъэсищ хъуауэ ирагъэкIуэкI «Хьэрычэт IэнатIэ мыинымрэ курытымрэ, щхьэзакъуэ хьэрычэтыщIэ жэрдэмыр дэIыгъыныр» лъэпкъ пэхуэщIэм ипкъ иткIэ, «Си хьэрычэт IэнатIэ» щIыналъэ центрымрэ Къэбэрдей-Балъкъэрым Экономикэ зыужьыныгъэмкIэ и министерствэмрэ я нэIэ щIэту. 
ХЬЭЩЫКЪУЕЙ Олег.
  • 15 просмотров
Поделиться: