Илъэс къэс къахохъуэ

Илъэс зыбжанэкIэ узэIэбэкIыжмэ, дуней псор зэщIэзыщтауэ щыта узыфэ зэрыцIалэм къэрал гъунапкъэхэр имыгъэбыдэпами, зэхэзекIуэхэр, загъэпсэхун щхьэусыгъуэкIэ ежьэу хамэ хэкухэм кIуэхэр куэдкIэ нэхъ мащIэ ищIауэ щытащ. Иджыпсту апхуэдэ пэубыдыныгъэхэр щымыIэжми, ди цIыхухэм нэхъ къащтэ хъуащ къэралым и щIыпIэхэм зыщаплъыхьыныр.
Къэрал кIуэцI туризмэм зегъэужьыным ехьэлIа Iуэхухэм иужьрей илъэсхэм Урысейм гулъытэ хэха хуищI зэпытщ. Абы фIы куэд къызэрыдэкIуэри нэрылъагъущ. Урысей Федерацэм и Президент Путин Владимир иджыблагъэ жиIащ, туризмэм и фIыгъэкIэ абы къепхауэ лажьэ нэгъуэщI IэнатIэ 50-м щIигъум зыужьыныгъэхэр зэрагъуэтыр, лэжьапIэщIэхэр къызэрызэIуахыр, хьэрычэт IэнатIэ мыинымрэ курытымрэ адэкIэ кIуэтэнымкIэ хэкIыпIэщIэхэр къазэрыхукъуэкIыр. 
Къыхэдгъэщынщи, «Iуащхьэмахуэ» курортыр къэралым щынэхъ инхэм, щынэхъ цIэрыIуэхэм яхохьэ, абы къыдэкIуэу, зызыгъэпсэхуну ди щIыналъэм къакIуэ туристхэм илъэс къэс къахэхъуэ зэпытщ. 
Кавказ.РФ-м иджыблагъэ къита бжыгъэхэм къызэрагъэлъагъуэмкIэ, нэгъабэ ди деж щыIа хьэщIэхэм я бжыгъэм процент 27-кIэ хэхъуащ - цIыху мин 730-м щIигъуащ.
ИлъэсыщIэ махуэхэм ирихьэлIэу «Iуащхьэмахуэ» курортым зыщагъэпсэхуащ цIыху мин 43-м, ар хуэдищкIэ нэхъыбэщ ипэ ита илъэсым къагъэлъэгъуа бжыгъэхэм нэхърэ. ГугъапIэхэр щыIэщ 2026 гъэм ирихьэлIэу хьэщIэу мелуаным нэблагъэ курортым иригъэблэгъэфыну, иджырей инфраструктурэ зэпэщ зиIэ зыгъэпсэхупIэ щIыпIэу дуней псом хэIущIыIу щыхъуну.