Налшык къалэ хэхыныгъэхэр щокIуэкI

КъБР- м и дэтхэнэ жылагъуэми щапхъэ яхуэхъуу, Къэрал думэм щылэжьэну лIыкIуэхэмрэ щIыпIэ унафэщIхэмрэ я цIэ къыщраIуа хэхыныгъэхэр щекIуэкIащ Налшык къалэми. Нэхъыжьри нэхъыщIэри, къулыкъущIэри лэжьыгъэм къыпэрыкIыжари, цIыхубэм я къэкIуэнур зыхуэдэнумкIэ яхь жэуаплыныгъэр зэрызыхащIэр нэрылъагъуу, щхьэж и хэхыпIэ участкэхэм екIуэлIахэщ фокIадэм и 17 - 19 махуэхэм къриубыдэу.

КъБКъУ- м къыщызэрагъэпэща 147-нэ хэхыпIэ участкэм Iэ щызыIэтахэм ящыщщ КъБР-м и Парламентым и УнафэщI Егоровэ Татьянэрэ и щхьэгъусэмрэ. «Хэти фIыуэ къыгуроIуэ цIыхубэ гъащIэм фIыуэ хилъхьэфыну псори иджыпсту екIуэкI хэхыныгъэм зэрелъытар, - къыжриIащ абы корреспондентым. - Мыбдежщ дэтхэнэ зыми республикэм зыгуэр щыхуищIэфынур. Нобэ зи кIэн къикIыну Къэрал Думэм и лIыкIуэхэми щIыпIэ унафэщIхэми къагурыIуэн хуейр зыщ: сыт хуэдэ IэнатIэ къыпIэрымыхьэми, нэхъыщхьэр абы жэуаплыныгъэ ббгъэдэлъу, цIыхухэм я гъащIэр ефIэкIуэн папщIэ плъэкI къыумыгъанэу убгъэдэтынырщ».

Унагъуэ-унагъуэу, я бын балигъхэмрэ нэхъыжьхэмрэ я гъусэу, уеблэмэ зэрылъэпкъыу, зэрыхьэблэу екIуэлIа куэд къахэкIащ хэхыныгъэр къыщызэрагъэпэща IуэхущIапIэхэм. Апхуэдэхэм я щапхъэщ Вольнэ Аул и 139-нэ хэхыпIэ участкэм, цIыху мин 50-м нэс щыпсэу Налшык и Iыхьэм щылажьэ Нэхъыжьхэм я зэхуэсым хэтхэр.

«ГугъэфIхэр диIэу дыкъекIуэлIащ хэхыныгъэм, - и гупсысэхэмкIэ жылэм ядогуашэ зи гугъу тщIы зэгухьэныгъэм и тхьэмадэ Пщыгъусэ Хьэталий. - Нобэ унафэр зыIэрыхьэнухэм елъытащ ди гъащIэр зэрыхъунур, ди гукъеуэхэр тщхьэщахыну дызыщыгугъхэри ахэращ».

«Дэ хэхыныгъэм и дэтхэнэ лъэныкъуэми мыхьэнэшхуэ иIэу къыдолъытэ, - къыпещэ нэхъыжьым и гупсысэхэм Ездэч Хьэсэнбий. - Ди лIыкIуэхэм фIы куэдкIэ дыкъагъэгугъэ. Ахэр я псалъэм тетыжмэ, ди къалэри ефIэкIуэнущ, ди республикэри къыкIэрыхухэм ящыщынукъым».

Езым къылъыса 118-нэ хэхыпIэ участкэм и лэжьыгъэр къызэрызэгъэпэща щIыкIэм цIыхубэр щыгъуазэ ищI зэпыту екIуэкIащ Мамбэт Залинэ. «Мис, ещанэ махуэри и кIэм нэблэгъащ, - щетх хъыджэбзым инстаграмым щиIыгъ напэкIуэцIым. - Сигу хэзыгъэхъуа куэд си нэгу щIэкIащ, псом хуэмыдэу, ди хэхыпIэ участкэ 118-нэм щылажьэхэр зэрызэкъуэтыр. Псоми фIыщIэ яхузощI ялъэкI къызэрамыгъэнам папщIэ».

ТАСС IуэхущIапIэм хъыбар къызэрыдигъащIэмкIэ, Налшык щекIуэкIа хэхыныгъэм япкъ иткIэ, макъ къагъэлъэгъуахэм щыщу «Урысей зэкъуэтым» - процент 63,8-рэ къихьащ; «Справедливая Россия - За правду» партым - процент 16,46-рэ; КПРФ-м - 13,53-рэ; ЛДПР - м - проценти 6,13-рэ. Зы мандат округымкIэ хэхыныгъэм щытекIуар «Урысей зэкъуэтым» и лIыкIуэ Щхьэгуэш Адэлбийщ. ХэхыпIэ округ №14-м абы къыщыIэрыхьащ процент 69,75-м нэс. Щхьэгуэшым и хьэрхуэрэгъуу щыта (КПРФ-м къыбгъэдэкIыу) Пащты Борис Iэ хуаIэтащ процент 13,8-м, Настуев Алисолтан («Справедливая Россия - За правду») - процент 11,8-рэ.

 ХэхакIуэ комиссэм къызэрилъытэмкIэ, Налшык IэIэтыр ныкъусаныгъэншэу щекIуэкIащ.