«Адыгэш зэхьэзэхуэр» гъуэгу техьакIэщ

 Жэпуэгъуэм и 1-м щегъэжьауэ, Нартан къуажэм къедза «Гуэрэн» шыгъэжапIэм иджы етIуанэ щокIуэкI адыгэшыр фIыуэ зылъагъуу дунейм тет псори зыкIэлъыплъ, «Черкесское дерби» цIэмкIэ хэIущIыIу хъуа шыгъажэ кIыхьыр.

«Зышрэ зы шурэ» - а хабзэм тету зэхьэзэхуэм зэдыхыхьа цIыху 26-м махуэ къэс километри 100-м нэс зэпач. Абы къикIыр дэтхэнэ зыри зы жэщ-махуэм къриубыдэу сыхьэт 12-кIэ шыбгым имыкIыу аращ. А псори – дунейм и щытыкIэм емылъытауэ. 

 Жэпуэгъуэм зэрыщIидзэрэ уэшхыр зэпыуркъым. Абы къыхэкIыу, шыхэми шухэми бэшэчагъ егъэлея къагъэлъагъуэ. Зэпеуэу фэ тет щхьэкIэ, екIуэкI Iуэхум ипэжыпIэкIэ зэреджапхъэр «гъэунэхуныгъэщ». Аращ абы хакIуэрэ шыбзрэ фIэкIа щIыхамыгъэхьэр. Зи щытыкIэр нэхъыфIу зэхьэзэхуэм къыхэкI шыхэр иужькIэ хъупхъэхэхым къыщагъэщхьэпэнущ, адыгэшым и бжыгъэр ирырагъэбэгъуэнущ. 

Шухэм зэпач гъуэгуанэр IыхьиплIу, дэтхэнэ зыри километр 25-рэ хъууэ гуэшащ. Техьэжыгъуэ къэс шыхэр ягъэкъабзэ, ягъашхэ, я щытыкIэм Iэщ дохутырхэмрэ къэпщытакIуэхэмрэ йоплъри, етIуанэ Iыхьэм ягъакIуэ е къагъэувыIэ. Зэхьэзэхуэм ипэ зэбграгъэха хъыбарегъащIэм зэритымкIэ, гъуэгуанэм трагъэхьэр зи пульсыр 64-м фIэмыкI шыхэрщ. 

 Нэгъаби хуэдэу, «Гуэрэным» щызэхуэса къэпщытакIуэ гупым хэтщ Урысейм шы гъэхъунымкIэ и IэщIагъэлI нэхъыфI дыдэхэр. Къэбэрдей-Балъкъэрым щыщу Амщокъуэ Хьэжысмел, Вэрокъуэ Жыраслъэн, Урысейм и щIыпIэ зэмылIэужьыгъуэхэм къикIа Нечаевэ Надеждэ, Купцовэ Надеждэ, Вальтер Татьянэ, Лукьянович Александр сымэ. Езэш ищIэркъым «Адыгэшыр хъумэнымрэ зегъэужьынымкIэ фондым» и тхьэмадэ Сибэч Артури.

 Зэхьэзэхуэм и япэ махуэм гъуэгу техьащ шу 26-рэ. Махуэ ещанэм абыхэм щыщу къэнар 22-рэщ, етхуанэм – 18. 

Нэгъабэрей зэпеуэм хэтар шу 11-щ. Мыгъэрейм гъунэгъу республикэм щыщхэри къекIуэлIащ. Шыгъажэхэм кIэлъыплъхэм зэ Iуплъэгъум къацIыхуж нэхъыщIэхэм щапхъэ екIу яхуэхъу, япэрей зэхьэзэхуэми хэта Зыхъуэ Замир, ар Мороз Алёнэ иш Спартэ зи цIэм тесщ. Нэхъыжьым къыкIэлъокIуэ нэгъабэрей «Дерби»-м щытекIуахэм яз Дудэ Арсен, щIалэгъуалэм я гупсэ Хъупсырджэн Залым, Щоджэн Щамел сымэ. ЩIэуэ зэпеуэм къыхыхьахэм я цIэр иджыри тщIэркъым. 

ГъэщIэгъуэну инстаграмым щиIыгъ напэкIуэцIым щIалэхэм щатопсэлъыхь шы хуэIухуэщIэхэр зыщэ бзылъхугъэ шууей Косматовэ Ольгэ: 

«Адыгэшхэм я гъэунэхуныгъэ йокIуэкI: махуипщIым и кIуэцIкIэ километр 1000. Махуэ къэс Iуэхур нэхъ шынагъуэ мэхъу. Диван щабэм сису сфIэгъэщIэгъунщ абыхэм сакIэлъыплъыну. ГушыIэр къэгъэнауэ жыпIэмэ, шэч хэмылъу, псори гугъу йохь, щIыIэм ес, я щыгъынхэр псыфщ, гъуэгур къатохьэлъэ. УвыIэгъуэ зимыIэ уэшхым и лъабжьэм ущIэтрэ апхуэдэ ятIэшхуэм ухэту километр 500 пкIуа нэужьи, шыр бутIыпщу зыбгъэпсэху хъуркъым, нэгъуэщI Iэмали щыIэкъым, мыр гъэунэхугъуэщ». 

 «Мис мыпхуэдэщ «Адыгэш зэхьэзэхуэ – 2021» -м хэт шыхэр зрикIуэ лъагъуэм и щытыкIэр, - сурэткIэ езым и нэгу щIэкIым щыгъуазэ дыщещI зи цIэ къытхуэмыщIа гуэрым и инстаграм напэкIуэцIым. – Языныкъуэхэм деж шыхэр сантимер 15-кIэ щыпхыщэт къахуохуэ. ИтIани, аракъэ адыгэлIрэ адыгэшрэ щIыжаIэр!»