Налшык къалэ дэт «Синдика» хьэщIэщым щекIуэкIащ «Бизнес-старт-2021» зыфIаща щIыналъэ зэхуаку форумыр. «Хьэрычэт мащIэмрэ курытымрэ защIэгъэкъуэнымкIэ» лъэпкъ проектыр гъэзэщIэным хуэгъэзауэ лэжьыпхъэхэм хыхьэу, КъБР-м «Хьэрычэт Iуэхур дэIыгъынымкIэ центр» зи фIэщыгъэ щIыналъэ фондым игъэхьэзыра зэIущIэр зэхэшэнымкIэ щIэ- гъэкъуэн хъуащ республикэм Экономикэ зыу- жьыныгъэмкIэ и минис- терствэмрэ абы къедза IуэхущIапIэхэмрэ.
Зэхуэсыр къызэIузыхахэм къызэрыхагъэщауэ, Iуэхугъуэр мы гъэм илъэс ещанэ хъуауэ йокIуэкI, абы къыдэкIуэуи, зи щхьэ хуэлэжьэж хьэрычэтыщIэхэм, еджакIуэхэм, студентхэм, зи пенсэ кIуэгъуэ хъуахэм я бжыгъэм хэхъуэ зэпытщ.
КърихьэлIахэм фIыщIэ псалъэкIэ захуигъэзащ КъБР-м экономие зыужьыныгъэмкIэ и министрым и къуэдзэ Белецкая Ольгэ.
- Иужьрей лъэхъэнэхэм, зэрынэрылъагъущи, унэтIыныгъэщIэрэ хэкIыпIэщIэу къэунэхухэм я бжыгъэр, дызыщыгуфIыкIын хуэдизу, куэд дыдэщ. Ауэ щыхъукIи, мыбдежым щIалэгъуалэр нэшхуэгушхуэу зэрыщытлъагъур дэркIэ гуфIэгъуэщ. Мы зэманым ирихьэлIэу, республикэм зи щхьэ хуэлэжьэжыну хуейхэм ящыщу ди деж зыщезыгъэтхахэм я бжыгъэр мин 12-м щхьэдэхащ, - къыхигъэщащ министрым и къуэдзэм.
Апхуэдэуи, Белецкая Ольгэ и гугъу ищIащ зытепсэлъыхь Iуэху зехьэкIэм фIагъыу хэлъхэми, лэжьыгъэкIэ зыкъызэзыгъэпэщыжхэм КъБР-м Бжыгъэ Iэмалхэм зыщегъэужьынымкIэ и министерствэр щIэгъэкъуэн къазэрыхуэхъунури (я компьютерхэм къыщагъэсэбэпыфыну программэу ди къэралым щызэхагъэувахэр къыщащэхукIэ).
Зэхуэсым и лэжьыгъэм адэкIэ къыпищащ хьэрычэт мащIэмрэ курытымкIэ ехъулIэныгъэ щызыгъуэта IэщIагъэлIхэм я къэпсэлъэныгъэкIэ. Къызэхуэсахэм ахэр «ядэгуэшащ» я лэжьыгъэм къащыхуэщхьэпа Iэмалхэр зыхуэдэхэмкIэ, я Iуэху зехьэкIэм бгъэдыхьэкIэщIэу къыщагъэсэбэпхэми я гугъу ящIащ.
«Хьэрычэт Iуэхур дэIыгъынымкIэ центр» щIыналъэ фондым и унафэщI Дыду Мадинэ зэхыхьэм кърихьэлIахэр щыгъуазэ хуищIащ «Си хьэрычэт» зыфIаща центрым зыхуэзыгъазэхэр зыщыгугъ хъуну щIэгъэкъуэныгъэр зыхуэдэми, апхуэдэ дэIэпыкъуныгъэр унэтIыныгъэщIэу зэрыщытри абдежым къыщыхигъэщащ.
Къызэхуэсахэм я пащхьэ къыщыпсэлъащ, чэнджэщ щхьэпэхэмкIи ядэгуэшащ КъБР-м и «Сату-промышленнэ палатэ» зэгухьэныгъэм и унафэщIым и къуэдзэ ГъукIэлI Мурат, республикэм ТриатлонымкIэ и федерацэм и Iэтащхьэ, шхапIэ зыбжанэм я унафэщI Iэпщэ Руслан, МСП ахъшэ хъумапIэм и лIыкIуэ Байсултанов Асхьэт сымэ, нэгъуэщIхэри.
Зэхуэсым и кIэм «2021 гъэм и социальнэ проект нэхъыфI» урысейпсо зэпеуэм щытекIуахэр щагъэпэжащ, тыгъэ зэмылIэужьыгъуэхэмкIи щахуэупсащ.