Гъэм кърикIуахэр

Урысей Федерацэм Къы­зэ­рымыкIуэ щытыкIэхэмкIэ и министерствэу Къэбэрдей-Балъкъэрым щыIэм и управленэ нэхъыщхьэм щекIуэкIащ абы и унафэщI, къэралкIуэцIыдзэхэм я генерал-майор Надежин Ми­хаил и пресс-конференц.

IуэхущIапIэм и Iэтащхьэм 2021 гъэм кърикIуахэр къы­щы­зэщIикъуэжащ зэIущIэм. Надежиным къызэригъэлъэгъуамкIэ, илъэсым къриубыдэу къызэры­мы­кIуэ щытыкIэ ину 4-рэ соци­альнэ мыхьэнэ зиIэу 28-рэ ди республикэм къыщыхъуащ. МафIэсгъэункIыфI-къегъэлакIуэ IэнатIэ­хэр 2360-рэ къэхъукъащIэкIэ, 1150-рэ мафIэс гъэункIыфIыным ехьэлIауэ щытащ. Абыхэм цIыхуи 186-рэ къыщрагъэлащ, мафIэм къыпэщIахащ сом мелуан 800-м щIигъу мылъку зэмылIэужьы­гъуэ. Ди жагъуэ зэрыхъунщи, мафIэсхэм хэкIуэдащ цIыху 12.
«МафIэсгъэункIыфI-къегъэла­кIуэ гупхэр зэгурыIуэу, зэгъэ­кIуауэ зэрылажьэм и фIыгъэкIэ ­мафIэсхэм замыубгъу щIыкIэ ягъэувыIащ, мафIэсышхуэхэр щыIакъым, - къыхигъэщащ На­дежиным. - Дызэрыт илъэсым ­Управленэ нэхъыщхьэм и кIэ­лъыплъакIуэ IэнатIэм къэп­щы­тэныгъэ 450-рэ иригъэкIуэкIащ. Абыхэм къыщыщIагъэщащ мафIэсым зыщыхъумэным ехьэлIа мардэхэр къыщызэпауда щы­тыкIэ 3000. Ахэр зэрагъэзэхуэжыну тхыгъэ 256-рэ ягъэхьэзыращ, административнэ Iуэхугъуэ 400-м щIигъу къаIэтащ».
Ди жагъуэ зэрыхъунщи, псым итхьэлащ цIыху 15. Къыхэгъэ­щыпхъэщи, насыпыншагъэхэр къы­щыхъуар зыщыбгъэпскI мыхъуну щытраухуа щIыпIэхэрщ. Урысейм и МЧС-м Iуащхьэмахуэ ­лъапэ щиIэ и къэлъыхъуакIуэ-­къегъэлакIуэ гупыр 167-рэ къы­зэрымыкIуэ щытыкIэ IуэхукIэ бгым дэкIащ. А Iуэхугъуэхэм къыщрагъэлащ цIыхуи 168-рэ, 25-р къахуегъэлакъым.
«Апхуэдэ насыпыншагъэхэр къэ­хъуным и щхьэусыгъуэ нэхъыщхьэр бгым дэкI цIыхухэм ­къегъэлакIуэ гупхэр зэрыкIуэну лъагъуэм щыгъуазэ зэрамы­щIырщ, бгым и щыты­кIэм зэры­щымыгъуазэрщ, зы­хуей-зы­хуэфI­хэмкIэ нэгъэсауэ къызэгъэпэщауэ зэрыщы­мы­тырщ, - жиIащ Надeжиным. - А псом къыхохьэж дунейм и щы­тыкIэр бгыщхьэм псынщIэ дыдэу зэрызыщихъуэжыр.
2021 гъэм Къэбэрдей-Балъкъэрым щыIэ къэрал мафIэсгъэункIыфI IэнатIэхэм техникэ­щIэу 5 къэрал бюджетым къы­хэкIыу къаIэрыхьащ.