Зи бжыгъэр зэпымычу хэхъуэ машинэхэм къалэхэм ущымыбэуэжыф ящI. Ахэр зэрылажьэ гъэсыныпхъэм къапкъырыкI Iугъуэм и закъуэкъым зэраныр, атIэ, гъуэгум телъ асфальтыр нэхъ шынагъуэжщ.
Асфальт лIэужьыгъуитI щыIэщ: щIы дагъэр къыщыщIах щIыпIэхэм пэмыжыжьэу хьэзыру къыщагъуэтымрэ IэрыщIымрэ. ЩIым къыщIахыр щабэщ, махэщ, псынщIэу мэткIу. АсфальтобетонкIэ зэджэ IэрыщIыр битумкIэ зэкIэрышха мывэкIэщхърэ пшахъуэу зэхэлъщ, зэрызэпкъырылъ пкъыгъуэхэм я процент бжыгъэм елъытауи Асфальтыр лIэужьыгъуэ зыбжанэу зэщхьэщокI.
И щэбагъкIэ зэхуэмыдэ мывэкIэщхъ лIэужьыгъуэ зыбжанэ щхьэхуэ-щхьэхуэу ягъэкъабзэ, щIагъэкI, ягъэгъущ, зы кумбыгъэ иракIутэжри битум (проценти 9 нэхъыбэ мыхъуу) хакIэж. Асфальтым и фIагъымрэ ар гъуэгум зэрытелъ зэманымрэ зэлъытэжар битумращ.
Асфальтыр нэхъыбэрэ гъуэгум телъын, жьыр, псыр, уаер, хуабэр, машинэ хьэлъэхэр зэран хуэмыхъун папщIэ, ар щагъавэкIэ тхъуэбзащхъуэ (серэ), яжьэ, хьэфэ, нэгъуэщI гуэрхэри халъхьэ.
ПщIантIэкIуэцIхэм иралъхьагъащIэ Асфальтыр апхуэдэу зэранкъым, илъэси 2-5 хъуауэ телъхэм елъытауэ. Сыт щхьэкIэ жыпIэмэ, хьэуам хэлъ гъуэз щхъухь куэд зэщIешэ Асфальтым, икIи нэхъыбэрэ телъыху нэхъыбэ зэхуехьэс. ЗэщIишар къыпкъырынэу аракъым, атIэ зэман гуэр дэкIа нэужь, алъандэрэ зэхуихьэса гыныр къеутIыпщыж (псалъэм папщIэ, бзапцIэ (свинец), абы цIыхур иробауэ, и узыншагъэмкIи къызэрымыкIуу зэранщ.
ГъэщIэгъуэнракъэ, автомашинэхэр куэду щызэблэкI гъуэгущхьэхэм бзапцIэр щынэхъ мащIэщ, пщIантIэкIуэцIхэм деж къыщыщахутэм елъытауэ. Ар къызыхэкIыр - машинэм къыпих Iугъуэр жьы зэпихум зэрырихьэжьырщ.
Апхуэдэ къэхутэныгъэм урегъэгупсыс: пщIантIэкIуэцIхэмрэ лъэс лъагъуэхэмрэ Асфальтым ипIэкIэ нэгъуэщI зыгуэр телъхьэн хуейкъэ?! Асфальтыр нэхъ пудщ, дауи, дэнэкIи ар щIытралъхьэр гурыIуэгъуэщ. Пэжщ, машинэхэр зэрызекIуэ гъуэгум къозэгъ, ауэ, щIэныгъэлIхэм жаIэм уедаIуэмэ, цIыхухэр, сабийхэр нэхъыбэрэ щызэхэзекIуэ лъэс лъагъуэхэмрэ пщIантIэкIуэцIхэмрэ мывэкIэ е плиткэкIэ къищIыкIамэ, узыншагъэмкIэ нэхъ сэбэпщ.
«ПщIантIэкIуэцIхэмрэ лъэс лъагъуэхэмрэ Асфальт тезылъхьэ машинэшхуэхэр щызэблэкIыфыркъыми аращ ахэр нэхъ псынщIэу къыщIихужыр. IэкIэ яуба Асфальтымрэ машинэм иубамрэ я фIагъыр зыкъым: пщIантIэкIуэцIым телъыр нэхъ щабэу къонэ, махэщ. Апхуэдэм Iугъуэр нэхъ псынщIэу зэщIешэ, гын нэхъыби къыпкъырокIыж, жьымрэ псыIагъэмрэ нэхъ псынщIэуи зэхакъутэж. ХэкIыпIэу щыIэр зыщ - цIыхухэр нэхъыбэу щызэблэкI щIыпIэхэм мывэ е плиткэ идзынырщ. Пэжщ, абы мылъкушхуэ ихьынущ, ауэ нэхъыбэрэ лэжьэнущ, цIыхум и узыншагъэм зэран хуэхъунукъым», - жеIэ УФ-м и Санэпидемнадзорым и технолог нэхъыщхьэ Геральдов Вениамин.