Тхьэмахуэм щIигъуауэ Украинэм щекIуэкI Iуэхум дэтхэнэ зыри дегъэпIейтей. Дэ - журналистхэмрэ блогерхэмрэ - мамырыгъэм дыщIохъуэпс, нэхъапэм ди къэралышхуэм ис лъэпкъ зэмылIэужьыгъуэхэм я щыIэкIэ-псэукIэр къэдгъэлъагъуэу зэрыщытам икIэщIыпIэкIэ дыхуэкIуэжыну дыхуейщ. Иджыпсту ди гур зэтар нэгъуэщI зыгуэрщ.
Мы махуэхэм урысей зауэлIхэр щIобэн УФ-м и шынагъуэншагъэм, Украинэм урысыбзэкIэ псалъэу ис цIыху мелуан бжыгъэхэм къатехьэ лейр гъэзэкIуэжыным иужь итщ. Дэтхэнэ лъэпкъми ихабзэмрэ бзэмрэ зэрихьэжынымкIэ иIэ хуитыныгъэхэр яхъумэ. Армыхъумэ, цIыхухэр иригъэзэшащ курыт еджапIэхэм, университетхэм, лэжьапIэ IэнатIэхэм къыщыхъу зэпэщIэувэныгъэхэм. Iэщэ зыIыгъхэр уи бжэщхьэIу къытеувэным, ураудыхыным е нэгъуэщI лъэпкъ укъызэрыхэкIа къудейм щхьэкIэ уаукIыным игъэгулэз цIыхубэр шынагъуэншэу псэуну хуейщ.
Совет Союзым къыщIэна хэгъэгухэм зы лъэпкъ закъуэ фIэкIа зэрымыс щIыналъэ куэд яхэткъым. Дэ десэжащ дызэхэсу дыпсэуным. Лъэпкъ зэхэгъэжым фIым ухуишэнукъым.
Урысейм ис цIыхухэр бзэ 277-кIэ мэпсалъэ, лъэпкъыбзэ зэмылIэужьыгъуэхэмкIэ мэлажьэ хъыбарегъащIэ IэнатIэхэр, абы хохьэ украиныбзэри. Дэтхэнэми фIэмыкъабыл Iуэхум - цIыхум и бзэкIэ псэлъэныр пэубыдыным - кърикIуар къэралыр иджыпсту зыхэт гузэвэгъуэшхуэрщ.
Апхуэдэ къэрал ухуэкIэм Украинэм и унафэщIхэр щытыкIэ гугъу иригъэуващ икIи дунейпсо тхыдэм и лъэхъэнэ зэхуэмыдэхэм «ирагъэкIуэта», иджы къекIуэкI псом и фIыгъэкIэ зыкъыдэзыгъэуеину хуей къэралхэм я деж «акъылэгъухэр» къыщелъыхъуэ. Абыхэм я нэм къыщIоуэ дэ тщыщ дэтхэнэри и бзэкIэ зэрыпсалъэр, и хабзэ зэрызэрихьэжыр, и диным зэрытетыжыр, а псори зэгурыIуэу зы къэрал зэрызэдисыр.
Донецкрэ Луганскрэ щыпсэу урысхэр ягъэкIуэдыну иужь щихьам, илъэс бжыгъэкIэрэ дызыщIэлъэIуар къамылъытэу, Урысейр дакъикъитIым къриубыдэу зэхэзыкъутэфын ракетэхэр Украинэм щагъэуву щыхуежьам ди къэралым и унафэщIым нэгъуэщI хэкIыпIэ игъуэтыжакъым. Мис аращ щхьэусыгъуэ хуэхъуар ди зауэлIхэм Украинэм щрагъэкIуэкI Iуэхум. Мис аращ дэ нобэ къэрал Iэтащхьэми Урысейм и лъэпкъыбэ дзэлIхэми дакъыщIыдэщIыр.
Дахуощыгъуэ зи сэлэтхэр хэкIуэда лъэныкъуитIми. ИкIи гурэ псэкIэ ди фIэщ мэхъу Украинэм щIэх дыдэу мамырыгъэр зэрыщызэтеувэжынур, ди къэралхэр зэрызэгурыIуэнур. Нацизмыр щыземыкIуэ мамырыгъэм дрителъхьэщ. Лъэпкъ, щэнхабзэ, бзэ зэмылIэужьыгъуэхэр зи лъабжьэ мамырыгъэм дрителъхьэщ!
