Къэбэрдей-Балъкъэрыр ядоIэпыкъу

Къэбэрдей-Балъкъэрым аргуэру егъэхьэзыр Донецк, Луганск цIыхубэ республикэхэм зэрызащIигъэкъуэн псапэхуэщIэхэр. Пщэдей гъуэгу техьэнущ ерыскъыхэкIрэ цIыхухэр зыхуэныкъуэ хьэпшыпу тонни 100-м нэблагъэ зэрылъ автомашинэшхуэхэр.

Бэлыхь хэхуа цIыхухэм зыщIагъэкъуэныр зи жэрдэмыр хьэрычэтыщIэхэм я зэгухьэныгъэмрэ гукъэкI зыщIа цIыху гумащIэхэмрэщ. Донбассым ирагъэшэнущ хьэжыгъэу тонни 100, минеральнэ псыуэ тонн 30, мыIэрысэ тонн 20, хадэхэкI фIэIугъэу тонн 20, кIэртIоф тонн 20, щыгъын, махуэ къэс узыхуэныкъуэ хьэпшып цIыкIуфэкIухэр.
«ЩIыналъэ сыхьэт» щригъэкIуэкIым, КIуэкIуэ Казбек къыхигъэщащ Луганскрэ Донецкрэ дадэIэпыкъуным мыхьэ­нэшхуэ зэриIэр. Республикэм и Iэтащхьэм фIыщIэ яхуищIащ апхуэдэ гукъэкI зыщIа хьэрычэтыщIэ гупми цIыху щхьэхуэхэми. «Къэбэрдей-Балъкъэрым гулъытэкIэ къыщыгугъыу зэи зыри игъэщIэхъуакъым. Ди цIыхубэм сыт щыгъуи фIыуэ ­къагуроIуэ зэманым къахуигъэув къалэнхэри, зыхуей хуэ­зауэ ягъэзащIэ», - жиIащ КIуэкIуэ Казбек.
Нэхъ пасэу Донбассым хыхьэ республикитIым КIуэкIуэ Казбек и унафэкIэ хурагъэшауэ щытащ тонн 40 зи хьэлъагъ псапэхуэщIэхэр, псом хуэмыдэу сабийхэм япэIэбащ. Щхьэхуимыту зи хэку зыбгынэнкIи хъуну цIыху 800-м нэс къригъэблэгъэным хуэхьэзырщ Къэбэрдей-Балъкъэрыр. Сабийхэм я узыншагъэм кIэлъыплъурэ республикэм ит школхэм зэрыщрагъэджэнум епха унафэхэри къащтакIэщ.