МафIэгу-хьэщIэщыр Налшыки къыдохьэ

«Урысейм и гъущI гъуэгу­хэм» и гъусэу уи нэгу зегъэужь» проектым нэгъабэ лъандэрэ цIыхубэр дихьэ­хауэ, щIэуп­щIэр нэхъыбэ хъу зэпытщ. Абы къыхэкIыу 2022 гъэм зрагъэубгъури, «Жем­чужина Кавказа» мафIэгу-хьэщIэщым и гъуэгум хагъэхьащ Къэбэрдей-Балъкъэрымрэ Адыгеймрэ. Шэрхъ зыщIэт хьэщIэщыр махуиблкIэ нэгузегъэужьыпIэ къызэ­­рымыкIуэу къыфхущIэ­кIы­нущ. Абы мэлыжьыхьым и ­30-м лэжьэн щIидзэнурэ ­фокIадэм и 24 пщIондэ тхьэмахуэ къэс гъуэгу техьэнущ.

Москва къыщежьэу   мафIэгур Мейкъуапэ, Налшык, Грознэ, Мэхъэчкъалэ, Дербент, Кисловодск къалэхэм дыхьэнурэ къалащхьэм игъэзэжынущ. А щIыпIэхэр зэпызыщIэ гъуэгум жэщым тетынущ, махуэм къедбжэкIа къалэхэм къы­щыувыIэнущ.
ЗыгъэпсэхуакIуэхэр пщэд­джы­жьым мафIэгум къикIыурэ хэгъэгухэм я щIыпIэ нэхъ дахэхэм жэщ хъуху зыщрагъэп­лъыхьынущ.
Апхуэдэ зекIуэ телъыджэм хэтыну гукъыдэж зыщIахэр Москва махуэм сыхьэт 11-м къыщитIысхьэнурэ етIуанэ пщэдджыжьым Мейкъуапэ къэ­сынущ. МафIэгум исхэм пщэдджыжьышхэ ирагъэщIынущ. ИтIанэ автобускIэ бы-    сым республикэм и щIыпIэ ­дахэхэм яшэнущ. Адыгей программэм хагъэхьащ щIыналъэм и тхыдэм, хабзэм,     лъэпкъ шхыныгъуэхэм щыгъуазэ ухуэзыщI Iуэхугъуэхэр. ХьэщIэ­хэр яшэнущ аммонитхэм я музейм, ирагъэлъагъунущ Ла­гъуэрэ-Накъэрэ бгыщ­хьэ та­фэр, адыгэ пщэфIапIэм щагъэшхэнущ.
ЗекIуэ къежьахэр пщыхьэщ­хьэ­хуэкIуэм мафIэгу-хьэ­щIэ­щым итIысхьэжынурэ гъуэгу ­теувэжынущ. КъыкIэлъыкIуэ пщэдджыжьым ахэр къытехьэнущ Налшык гъущI гъуэгум. Къэбэрдей-Балъкъэрым абы­хэм щалъагъунущ Европэм щынэхъ лъагэ дыдэ бгыр - Iуащ­хьэмахуэ. ЗыплъыхьакIуэхэр Азау станцым яшэнурэ, Гара-Баши нэс кIапсэ гъуэгукIэ ­дэ­кIуеинущ, лъэпкъ шхыны­гъуэхэр зыIуагъэхуэнущ, Нарзан аузым яшэнущ.
СыткIи зыхуей хуэгъэза мафIэгум жэщым зыщагъэпсэ­хунурэ, пщэдджыжьым Гроз­нэм къыщикIынущ. «Грозный-Сити» унэ зыхэтым зыщап­лъы­хьынущ, «Шэшэным игу» мэ­жджытыр, къалэм и нэ­гъуэщI щIыпIэ дахэхэр зрагъэлъагъунущ, шэджагъуэ нэужьым бгылъэ нэгузегъэу­жьыпIэхэм яшэнущ. Пщыхьэщ­хьэм Грознэм дэт рестораным щышхэнурэ, адэкIэ гъуэгу техьэжынущ.
ЗыгъэпсэхуакIуэ ежьахэр етхуанэ махуэм щепсыхынущ ­Дагъыстэным. ЩIыпIэ хэха-хэмкIэ къулей хэгъэгум прог­рам­митI иIэщ, еблэгъахэм зы-      хуейр къыхахыу. Зым хохьэ Чиркей псы хъумапIэм и зып­лъыхьыпIэ утыкур, Сулак псы къуэкIийр, бдзэжьейкъуэлэн щагъэхъу IуэхущIапIэр, нэ­гъуэщIхэри. ЕтIуанэм къы­зэщIеубыдэ Дербент, Нарын-Кала хуэдэ щIыпIэ цIэрыIуэхэр.
Еханэ махуэм Минеральные Воды нэсынурэ, Псыхуабэ дэтынущ, Лермонтовым и ­фэ­еплъ здэщыIэ щIыпIэхэм ­зыщаплъыхьынущ, шхапIэм шэ­джагъуашхэ щащIа нэужь, Кисловодск яшэнущ. Абыи щызэбгъэлъагъунур гъунэжщ - Шаляпин и дачэр, Солженицыным и фэеплъыр, макъамэ зыщIагъэува псыутхыр (псалъэм къыдэкIуэу жыпIэмэ, ­Къанокъуэ Арсен иригъэщIар), къалэм и уэрам нэхъ гъэ­щIэ­рэщIар, нэгъуэщIхэри.
Минеральные Воды и къалэ дахэхэм иужькIэ, мафIэгум ис-хэм Москва ягъэзэжынущ.
МахуэщIэ къэс къалэщIэ укъыщикIыу укъезышэкI мафIэгу-хьэщIэщым тыншу уп­сэун папщIэ узыхуей псори хэтщ. Вагонхэр я фIагъ елъы­тауэ зэщхьэщокIри, узыхуейр къыхыбох, уеблэмэ уи закъуэу узыщIэлъ пэш иIэщ, езым и ­зыгъэпскIыпIи хэтыжу. Абы ­къищынэмыщIауэ, мафIэгум хэтщ вагон-ресторан, вагон-бар, вагон-зыгъэпскIыпIэ.
Узыхуей тIысыпIэм елъытауэ уасэхэри зэщхьэщокI. Билетым хохьэ гъущI гъуэгупщIэр, экскурсие узышэ транспортым и уасэр, зыплъыхьыпIэхэм щIат пщIэр, мафIэгум щыпщI ­пщэд­­джыжьышхэмрэ къалэм шэджагъуэм узэрыщышхэмрэ яте­хуэ уасэр.
Урысейм и Ипщэ, Ищхъэрэ щIыналъэхэм я дахагъымрэ щыпсэу лъэпкъхэм я хьэщIэ егъэблэгъэкIэм и беягъымрэ кърипщIэну, уи хэку уи нэгу ­зыщебгъэужьыну Iэмал гъуэ­зэджэщ «Урысейм и гъущIгъуэгухэм» къызэригъэпэща ­зе­кIуэ телъыджэр. Гуапэ лейщ абы Къэбэрдей-Балъкъэрри зэ­ры­хэ­тыр.

Мейкъуапэ

Дербент

Кисловодск

Грознэ